Přizjewjenja za dźěłarnički debjenja jutrownych jejkow hišće móžne
W dojutrownym času wotměwaja so dźěłarnički k debjenju jutrownych jejkow. Tu wobsteji móžnosć, bosěrowanje a wóskowanje pod wěcywustojnym nawodom nawuknyć. Wobdźělenje wotměje so w dwěmaj skupinomaj po stajnje 2 hodźinomaj wot 13-15 hodź. a wot 15-17 hodź. Na někotrych terminach móža so hišće zajimcy přizjewić:
so 11.03.2023 w 15-17 hodź.
nje 12.03.2023 w 13-15 hodź. abo 15-17 hodź.
so 18.03.2023 w 13-15 hodź. abo 15-17 hodź.
nje 19.03.2023 w 13-15 hodź. abo 15-17 hodź.
nje 26.03.2023 w 13-15 hodź. abo 15-17 hodź.
so 01.04.2023 w 13-15 hodź. abo 15-17 hodź.
nje 02.04.2023 w 13-15 hodź. abo 15-17 hodź.
Kurs płaći za dźěći 5,00 €, za dorosćenych 7,50 € a za swójby 16,00 €. Kóždy wobdźělnik dóstanje jedne wudute kokošace jejko za debjenje. Kóžde dalše jejko płaći 0,50 €. Prosymy wo zwjazowace přizjewjenje pod ticket@sorbisches-museum.de abo 03591 270 8700.
Prózdninski poskitk “Klinčace wobrazy a mozaik”
14. a 21.02.2023 10 hodź.
Zeznawamy wuměłca a twórby Jana Buka a damy jeho wobrazy ze zynkami tež klinčeć. Wězo njepřińdźe kreatiwne překrótko, přetož po tym molujemy a paslimy mozaikowe wobrazy. Wot 6 lět, kóšty 6 €, přizjewjenja pod ticket@sorbisches-museum.de abo 03591 270 870 20.
24.02.2023 Mjezynarodny wědomostny kolokwij “Jan Buk”
Serbski muzej přeprošuje pjatk, 24. februara wot 10 hodź. na mjezynarodny wědomostny kolokwij k žiwjenju a tworjenju serbskeho wuměłca.
Dopołdnja wobswětluja referentki a referenća Bukowe skutkowanje pod wšelakimi aspektami. Sćěhowacy referenća su prošeni: dr. Małgorzata Mieczkowska – slědźerka wo narodnych mjeńšinach w Europje (uniwersita Szczecin); prof. Piotr Pałys – stawiznar, nawoda wotrjada za šleske studije (Šleski institut, Opole); dr. Kathleen Rosenthal – wuměłstwowa stawiznarka, Drježdźany; dr. Jacek Cybis – architekt a syn wuměłca Jana Cybisa kaž tež dr. Peter Michel – wuměłstwowy wědomostnik, Berlin. Popołdnju móža so wobdźěleni w rozmołwnym kole ze časowymi swědkami, wuměłskimi kolegami a přećelemi Jana Buka wuměnjeć. Po tym poskićeja so wodźenja we wustajeńcy. Zarjadowanje wotměje so w němskej a pólskej rěči ze simultanym přełožkom a měri so na wšitkich zajimcow.
11.01.2023 w 17 hodź.: Wjedźenje za čłonow spěchowanskeho towarstwa Serbskeho muzeja
Składnostnje 100. posmjertnych narodnin wuznamneho serbskeho molerja Jana Buka (1922-2019) wěnuje Serbski muzej zhromadnje ze swojimi projektnymi partnerami wuměłcej jubilejnu wustajeńcu “Wšo je krajina. Serbski moler Jan Buk”. Kuratorka a projektowa nawodnica Christina Boguszowa přeprosy čłonow spěchowanskeho towarstwa Serbskeho muzeja z.t. na wjedźenje a to 11. januara w 17 hodź.
22.1.2023 w 15 hodź.: Swójbne popołdnjo “Barby rejuja!”
We wobłuku wuměłskeje wustajeńcy “Wšo je krajina. Serbski moler Jan Buk” přeprošujemy njedźelu, 22. januara w 15 hodź. na swójbne popołdnjo. Wočakuje was wotměnjacy program z wjedźenjom we wustajeńcy, pytanjom małeho pokłada, wuměłskim paslenjom k temje mosaik, rejowanjom a dalšimi překwapjenkami! Štóž ma lóšt, njech sej drasty ze swojej najlubšu barbu zwobleka, přetož hesło rěka “barby rejuja”.
9.12.2022 wot 17 hodź.: Wjedźenje a hudźbno-literarny wječor
17 hodź.: Christina Boguszowa přeprošuje na kuratorske wjedźenje “Wšo je krajina. Serbski moler Jan Buk”. Při tym wobswětla žiwjenje a skutkowanje najwažnišeho serbskeho wuměłca moderny.
18 hodź.: Z poeziju a hudźbu wěnuja so serbske awtorki a awtorojo kaž tež pólscy hudźbnicy Bukowym twórbam. Ze serije “Kóždy wobraz je nowy započatk ” serbskeho kulturneho časopisa Rozhlada čitaja Měrana Cušcyna, Róža Domašcyna, Ingrid Hustetowa, Měrka Mětowa a Měrćin Wjenk basnje a krótkopowědančka. Wo hudźbne wobrubjenje postara so jazzowa trójka z Jacekom Szreniawom, Jakubom Olejnikom a Mateuszom Maniakom z Jelenjeje Góry wo wotměnjacy wječor.
Kofej w třoch “Łužica we wobrazach. Fotografka Gudrun Kubenz”, 14.12.2022
“Łužica we wobrazach. Fotografka Gudrun Kubenz”
Fotowa žurnalistka Gudrun Kubenz (* 1931) słuša k emancipowanym žonam powójnskeho časa, kotrež so w muskich domenach přesadźi. Ze swojim trabantom bě wšudźe pódla. Při tym dokumentowaše NDR-ske twarstwo, milinarnju Čorna Pumpa, žony w prodrustwje, kulturny a kubłanski wšědny dźeń kaž tež serbski kulturny festiwal. Připódla dźěłaše tež za serbske nowiny.
Serbski muzej móžeše wulki konwolut łužiskich motiwow nakupić a fotografije a negatiwy přehladać a rjadować. Přeprošujemy 14.12.2022 w 15 hodź. na zhromadne popołdnjo, zo bychmy w zběrce Gudrun Kubenz listowali a stawiznički ze wšědneho dnja NDR wuměnjeli.
Referentce: Daniela Heckowa, Andrea Pawlikowa
Wjedźenje a přednošk 15.11.2022 wot 18 hodź.
Hačkuli wuměłc Jan Buk w swojej domiznje znaty był, wě lědma něchtó něšto wo jeho twórbach na a w twarjenjach. Byrnjež so wjace hač dwaceći nadawkow dopokazać hodźało, wuměłskohistoriske wobdźěłanje dotal wuwosta. W nadawku wšelakich zjawnych nadawki dawarjow stwori wuměłc sćěnowe wuhotowanja za nutřkowne a wonkowne rumy we Łužicy. Při tym nastachu najprjedy mozaiki a škleńčane wokna a pozdźišo přewažnje sgrafiti a keramiske wobrazy. Dwaj pomnikaj za serbskeju poetaj wudospołnjatej jeho oeuvre. Serbski muzej wěnuje so ze zarjadowanjomaj tutej temje.
škleńčane wokno Jana Buka, Budyšin Glasbild von Jan Buck, Juri-Gagarin-Schule, Bautzen
Dnja 15. nowembra 2022 přednošuje w 19 hodź. Silke Wagler, nawodnica Fondsa wuměłstwa při Statnych wuměłstwowych zběrkach Drježdźany, wo twórbach Buka na a w twarjenjach. Při tym so twórby do jich časoweho, rumnostneho a kulturneho konteksta zarjaduja. Po tym předstaji so katalog wustajeńcy z wjace hač 300 stronami, barbnymi wobrazami a fachowymi přinoškami přez Christinu Jäger-Ulbricht, jednaćelku Sandstein nakładnistwa w Drježdźanach. Před tym přeprošuje Christina Boguszowa, nawodnica Serbskeho muzeja, we 18 hodź. na kuratorske wodźenje po jubilejnej wustajeńcy “Wšo je krajina. Serbski moler Jan Buk”.
Dnjowska ekskursija k wubranym objektam z twarskim wuměłstwom Jana Buka – 20.11.2022
Hačkuli wuměłc Jan Buk w swojej domiznje znaty był, wě lědma něchtó něšto wo jeho twórbach na a w twarjenjach. W nadawku wšelakich zjawnych nadawki dawarjow stwori wuměłc sćěnowe wuhotowanja za nutřkowne a wonkowne rumy we Łužicy. Při tym nastachu najprjedy mozaiki a škleńčane wokna a pozdźišo přewažnje sgrafiti a keramiske wobrazy. Dwaj pomnikaj za serbskeju poetaj wudospołnjatej jeho oeuvre.
Mozaik na kulturnym domje w Sulšecach, foto Jürgen Maćij Wandmosaik von Jan Buck in Sollschwitz
Njedźelu, 20. nowembra 2022 wotměje so dnjowska ekskursija k wubranym objektam z twarskim wuměłstwom w Bukowej domiznje. Ekskursija započina so w 10 hodź. při Serbskim muzeju w Budyšinje a skónči so někak we 18 hodź. w Budyšinje. Zhromadna busowa jězba wjedźe přez Bukecy k dalšim stacijam a wuklinči w ródnej wsy wuměłca w Njebjelčicach. Dlěša připołdniša přestawka za indiwiduelny wobjed je w Njeswačidle zaplanowana. Wo kofej popołdnju je postarane. Za ekskursijnu jězbu a kofejpiće wobliča so 20 € na wosobu. Přizjewić móžeće so pod sekretariat@sorbisches-museum.de abo 03591 270 870 11, tute je zwjazowace . Dalše informacije hlej www.sorbisches-museum.de.
06.11.2022 w 16 hodź.: Wjedźenje po wosebitej wustajeńcy „Wšo je krajina. Serbski moler Jan Buk“
Wuměłstwo bě jeho žiwjenje, přetož „Za mnje je wuměłstwo nutřkowne duchowne rozestajenje z realitu“, tak Jan Buk (1922-2019). Składnostnje 100. posmjertnych narodnin wuznamneho serbskeho molerja Jana Buka wěnuje Serbski muzej zhromadnje ze swojimi projektnymi partnerami wuměłcej jubilejnu wustajeńcu. Christina Boguszowa přeprošuje wutrobnje na kuratorske wjedźenje njedźelu, dnja 6.11.2022 w 15 hodź. w němskej a w 16 hodź. w serbskej rěči.
Serbski muzej spěchuje so přez Załožbu za serbski lud, kotraž dóstawa lětnje přiražki z dawkowych srědkow na zakładźe hospodarskich planow, wobzamknjenych wot zapósłancow Zwjazkoweho sejma, Krajneho sejma Braniborskeje a Sakskeho krajneho sejma, kaž tež přez wokrjes Budyšin a Kulturny rum Hornja Łužica-Delnja Šleska. Serbski muzej je zarjadnišćo wokrjesa Budyšin.
