04.06.2025, wot 18 hodź.: Wjedźenje “Što rěka tu mjeńšina” a přednošk “RomArchive”
We 18 hodź. wotměła so kuratoriske wjedźenje po wustajeńcy “Što rěka tu mjeńšina?” z dr. Robertom Lorencom w němskej rěči.
Přizamknje so w 19 hodź. zajimały přednošk „RomArchive jako modelowy projekt: Mjeńšinowe kultury w digitalnej dobje“. Zběrka RomArchiva wobsahuje objekty z dźesać wobłukow: tworjace wuměłstwo, wobrazowa politika, film, flamenco, literatura, hudźba, reja, dźiwadło a drama, hibanje wobydlerskich prawow Sintow a Romow a » Voices of the Victims «. RomArchive zdoby w lěće 2020 renoměrowany Grimme Online Award 2020 w kategoriji „wěda a kubłanje“. Z tutym mytom wuznamjenja so posrědkowanske poskitki, kotrež za powšitkownosć relewantne wobsahi k dispoziciji staja a towaršnostnemu kubłanju, poradźowanju a rozswětlerstwu słuža. Referent němskeho přednoška je André Raatzsch, wědomostny sobudźěłaćer Marburgskeje Philipps-uniwersity.
25.6.2025 w 15 hodź.: Kofej w třoch „Derje składowane je poł restawrowane”
„Derje składowane je poł restawrowane. Objektej wotpowědowace hladanje za dołhodobne zdźerženje.”
Kak so historiske fota, mólby, dokumenty abo tekstilije prawje składuja? Zo bychu so swójbne drohoćinki abo archiwarije prawje hladali, so tu pokiwy a zakładne informacije posrědkuja. Nimo toho so kmane składowanske wuměnjenja za objekty a powšitkowny wobchad z nimi wujasnja. Přetož zachowanje kulturneho herbstwa wužada najlěpši škit před klimowymi wliwami, kaž tež swěcu.
18.05.2025, 10 do 18 hodź.: Mjezynarodny dźeń muzejow
Njedźelu, k mjezynarodnemu dnjej muzejow, je wopyt darmotny! Wopytajće trajnu wustajeńcu k stawiznam a kulturje Serbow a wužiwajće tež přewodnik za dorosćenych abo lóštny dźěćacy přewodnik. Nimo toho móžetej so hnydom dwě přidatnej prezentaciji wopytać: pućowanska wustajeńca “Što rěka tu mjeńšina?” a wosebita wustajeńca “Jutry w Serbach”. Wjele wjesela!
08.05.2025, 19 hodź.: Narodne mjeńšiny po wólbach do Zwjazkoweho sejma
Narodne mjeńšiny po wólbach do Zwjazkoweho sejma – refleksije, wužadanja, perspektiwy
Mjeńšinowa rada Was wutrobnje přeprošuje, so do aktualneje mjeńšinoweje politiki zanurić. Podiumowi hosćo su:
- Gitte Hougaard-Werner, předsydka Mjeńšinoweje rady
- Dawid Statnik, předsyda Domowiny – Zwjazk Łužiskich Serbow
- Ingwer Nehmensen, městopředsyda Frasche Rädj / Friziska rada sekcija sewjer z. t.
- Tobias Neuburger, politiski referent Centralneje rady Němskich Sintow a Romow
Zarjadowanje moderěruje Roman Kühn, nawoda Mjeńšinoweho sekretariata. Diskusijny wjěcor dawa móžnosć, wosobinsce do rozmołwy přińć a pućowansku wustajeńcu “Što rěka tu mjeńšina?” wopytać. Zarjadowanje Mjeńšinoweje rady štyrjoch awtochtonych narodnych mjeńšin a ludowych skupin Němskeje a zjednoćenstwa Bundesraat för NedderDüütsch, w němskej rěči.
16.-17.05.2025: Mjeńšiny w Němskej meets serbsku młodźinu
A štó sy ty? Mjeńšiny w Němskej meets serbsku młodźinu
Kooperaciski projekt serbskeho młodźinskeho towarstwa PAWK z.t. ze Serbskim muzejom
Serbski muzej spěchuje so přez Załožbu za serbski lud, kotraž dóstawa lětnje přiražki z dawkowych srědkow na zakładźe hospodarskich planow, wobzamknjenych wot zapósłancow Zwjazkoweho sejma, Krajneho sejma Braniborskeje a Sakskeho krajneho sejma, kaž tež přez wokrjes Budyšin a Kulturny rum Hornja Łužica-Delnja Šleska. Serbski muzej je zarjadnišćo wokrjesa Budyšin.
