7. junija wot 18 hodź.: Kuratorkske wjedźenje a filmowy wječor z přednoškom a diskusiju
- 18 hodź.: kuratorkske wjedźenje
- 19 hodź.: filmowy wječor, přednošk, diskusija
Serbski katolski miljej – kak dale?
“Ta naša serbska katolska Łužica. Budźa te ludźo to hač do kónca zdźeržeć?” praša so Marta Markowa w dokumentaciji „Čej’ da sy?”. Filmowc Reiner Nagel je w nadawku Serbskeho muzeja a zhromadnje z nim w koronalěće 2021 interviewy natočił, z kotrychž bu krótki film zestajeny. Dalši nazhonići Serbja – ratar, rjemjeslnik, drastynošerka, wučer a dekan jimaja so słowa. Jim napřećo staji so młody wuhlad krótkofilma „SMY” Sofije Cyžec a Luizy Nawkec. Na wječornym zarjadowanju Serbskeho muzeja srjedu, 7. junija w 19 hodź. je składnosć, za wotmołwami zhromadnje pytać. Po wurězkach z filmow, kotrež pokazuja so tež we wosebitej wustajeńcy, hdźež je we 18 hodź. wjedźenje, slěduje přednošk „Serbski katolski miljej – kak dale?” dr. Měrćina Wałdy. Zajimawe je prašenje, što rozeznawa cyrkej w socializmje porno dźensnišej? Pod hesłom „Łužica 2050” je gymnaziast situaciju zjimał: „Tež našu nabožinu widźu wohroženu. Widźomne je hižo nětko, zo ludźo, wosebje młodźi, z cyrkwje wustupja. Ličba kemšerjow lěto wob lěto spaduje … Myslu sej, zo budu naše serbske wosady zjednoćene a horstka wěriwych Serbow swjeći Božu mšu zhromadnje w jeničkej cyrkwi.”
10. junija w 10 hodź.: Z kolesom po serbskej katolskej kónčinje – tura 1
Na štyrjoch wšelakich turach chcemy sej zhromadnje serbsku katolsku kónčinu z kolesom wotkryć. Pod nawodom Tadeja Šimana njewopytamy jenož wšitke wosadne wsy, ale tež najwažniše stawizniske, kulturne a krajinowe zajimawostki. Prošu dźiwajće na fungowace kolesowotpowěduwacu drastu a škitny nahłownik. Prosymy tež wšitkich wobdźělnikow, sej jědź a pićo sobu wzać. Přizjewjenja su móžne pod ticket@sorbisches-museum.de abo 03591/2708700. Wšitcy wobdźělnicy rukuja priwatnje, wobdźělenje je darmotne.
Tura 1: “Klóšterski kraj – serbski raj”
Sobotu, 10. junija wjedźe nas něhdźe 22 km dołha tura pod hesłom “Klóšterski kraj – serbski raj” přez južnu kónčinu serbskeho katolskeho swěta. Startujo w 10 hodź. na parkowanišću při awtodróze A4 w Hornim Wujězdźe podamy so na puć k 3000 lět staremu Wotrowskemu hrodźišću a wot tam dale do Pančic ke klóštrej Marijina hwězda. Přez Kukow, ródnu wjes wuznamneho serbskeho basnika Jakuba Barta-Ćišinskeho, jědźemy do Chrósćic a dale na Kopšinjanske hrodźišćo, kotrež bě něhdy srjedźišćo słowjanskeho kmjena Milčanow. Wot tam podamy so na wróćopuć do Hornjeho Wujězda.
zetkanje: 10 hodź. na parkowanišću při awtodróze A4 w Hornim Wujězdźe
3.6.2023 wot 18-23 hodź. “Dołha nóc kultury”
- 18.30 hodź.; 20 hodź.; 21.30 hodź.: wjedźenja we wosebitej wustajeńcy “Čej´da sy?” z Andreju Pawlikowej
- paslenski poskitk za dźěći w kabineće
- filmowy loop a prezentacija dźěłarnički na žurli
3.6.2023: Dźěłarnička “Na(po)hlady”
Sy bóle romantikar abo žortny typ? Sobotu 3.junija přeprošuje Serbski muzej na dźěłarničku z wuměłču Maju Nagelowej a grafikarjom Štefanom Hanušom. Mjeztym zo so nawuknješ pod nawodom Štefana Hanuša, kak problemy na žortne a šćipate wašnje z karikaturami rozrisaš, wěnuje so Maja Nagelowa po přikładźe dwěsćě lět stareje sćěny wokoło chorołoža z Chrósćic, kiž namakaš w aktualnej wustajeńcy „Čej da sy?“, prašenju, kak móžeš na moderne wašnje swoju dušu hojić přez pomolowanje parawenta/sćěny z mandala abo krajinu jako estetiski změrowacy element. Waše wuslědki móža być za swójsku stwu doma, młodźinski klub atd. Dajće so překwapić a čińće sobu!
Za wšitkich zajimcow wot 12 lět kaž tež za dorosćenych. Popłatk za kurs su 10 €, přizjewjenje pod ticket@sorbisches-museum.de abo 03591 270 870 0.
21.05.2023: Mjezynarodny dźeń muzejow z wjedźenjom
Pod hesłom “Muzeje z wjeselom wotkryć” móže so Serbski muzej mjez 10 a 18 hodź. darmo wopytać. Trajna wustajeńca k stawiznam, rěči a kulturje Serbow kaž tež wosebita wustajeńca „Čej´da sy?“ skića mnoho wotměny.
W 15 hodź. wjedźe kuratorka Andrea Pawlikowa w němskej rěči po wustajeńcy „Čej´da sy?“ a w 16 hodź. w serbskej rěči. Wustajeńca ma za kóždu generaciju zajimawe fakty přihotowane. Zdobom postaraja so eksponaty, fota a medialne elementy wo wotměnjace posrědkowanje wobsahow. Tuž pohladajće do pisaneje prismy wustajeńcy.
Wupisanje dźěłoweho městna
Krajnoradny zarjad Budyšin, Zarjad za wokrjesne wuwiće, wupisa za Serbski muzej městno muzeologi (ž/m/d), cyfra: 044-23.
Wjace pod “muzej – karjera”. Wjeselimy so přez Waše powabjenje!
Jutrowna wustajeńca Serbskeho muzeja so ke kóncej chila
Štóž njeje hišće lětušu jutrownu wustajeńcu w Serbskim muzeju widźał, měł so do spěcha měć. Jenož hač do njedźele je hišće přistupna. Mjez druhim wopomina so 400. křižerski jubilej Radworskeho a 30. jubilej wožiwjenja Budyskeho procesiona. Tež wěnčki nestora serbskeho křižerstwa dr. Pětra Brězana, kiž bě 75 lět křižer, su widźeć. Hač dotal je muzej z wopytom jara spokojom. Wosebje wabješe młode swójby konik Luna, kiž bu z pomocu kolegow muzeja a Spěchowanskeho towarstwa pyšeny. Šabraku zeši Angelika Korjeńkowa a křižerske banty wudebi wustojnje Blandina Ledźborjowa. Wuměłsce so z pasionom rozestaji Budyski grafikar Ralf Reimann.
Na zakónčacym wjedźenju, njedźelu w 15 hodź. předstaji Reimann křižowy puć, Marijanske titule kaž tež fotografije swjateho křiža kiž přeprošuja k přemyslowanju.
Jutrowny program na žurli, 8. apryla w 15 hodź.
Sobotu předstaji so w 15 hodź. program z rejemi a hudźbu na žurli. Serbska rejowanska skupina Smjerdźaca z.t. pěstuje předewšěm serbsku rejowansku folkloru a zwuraznja na tute wašnje tradicije a nałožki.
Jutrowne wiki wot 7. do 10. apryla 2023
Wot wulkeho pjatka do jutrowneje póndźele wustajeja a předawaja ludowi wuměłcy jutrowne jejka w znatych serbskich debjenskich technikach.
1.3.2023 je „Kofej w třoch“
„Naslědnosć a zlutniwosć něhdy a dźensa“
Srjedu, dnja 1. měrca w 15 hodź. rěči so w Serbskim muzeju wo naslědnosći w 20. lětstotku, wosebje w powójnskim a NDR-skim času. K prěnjemu razej wotměwa so “Kofej w třoch” w kooperaciji z přetrjebowarskej centralu, wotnožka Budyšin (Verbraucherzentrale), kotraž po tym wo móžnosćach naslědneho žiwjenja, wosebje hladajo na lutowanje miliny w dźensnišim času, poradźuje. Wšitcy zajimcy su wutrobnje witani.
referentki: Ilona Bierlingowa, Daniela Heckowa, Annegret Winde
Serbski muzej spěchuje so přez Załožbu za serbski lud, kotraž dóstawa lětnje přiražki z dawkowych srědkow na zakładźe hospodarskich planow, wobzamknjenych wot zapósłancow Zwjazkoweho sejma, Krajneho sejma Braniborskeje a Sakskeho krajneho sejma, kaž tež přez wokrjes Budyšin a Kulturny rum Hornja Łužica-Delnja Šleska. Serbski muzej je zarjadnišćo wokrjesa Budyšin.
