Monthly Archives: December 2023

15 hodź.: přednošk Serbskeho muzeja “Zastaranje chorych a starych na kraju”

Nimo znatych domjacych srědkow hospozow starachu so něhdy baby, zelerki a pomocne organizacije wo zakładne medicinske zastaranje na kraju. Kak je so wobchad ze starymi a chorymi přeměniło a kak je so strowotnistwo w běhu časa wuwiło, so w přednošku wobswětli.

16 hodź.: přednošk Přetrjebowarskeje centrale (Verbraucherzentrale), wotnožka Budyšin. Jens Passlack rěči wo aktualnym stawje zastaranju chorych a k strowotniskemu škitej dźensa.

17 hodź.: “Zastaranje chorych a starych na kraju” wospjetowanje přednoška w němskej rěči

Na literarno-hudźbny wječor přeprošuje Jürgen Maćij zhromadnje ze Serbskim muzejom pjatk, dnja 8. decembra. We 18 hodź. wjedźe kurator Alexander Pólk po wustajeńcy “Jürgen Matschie. Ducy domoj. Unterwegs nach Hause. Fotografije 1972-2022” w serbskej rěči. Přizamknje so w 19 hodź. literarno-hudźbny wječor na žurli. Měrana Cušcyna, Měrka Mětowa a Róža Domašcyna čitaja teksty z knihow Jürgena Maćija. Hudźbnje wobrubi program Jakub Čornak alias “Jacke Schwarz”. Zarjadowanje je w serbskej rěči, při prašenjach kontaktujće nas pod 03591 270 870 0 abo ticket@sorbisches-museum.de.

Měrka Mětowa, Róža Domašcyna a Měrana Cušcyna. foto: Jürgen Maćij

Srjedu, dnja 29. nowembra přeprosy kurator Jürgen Maćij zhromadnje z Němskej fototeku do Serbskeho muzeja na wjedźenje “Ducy domoj. Unterwegs nach Hause”. Přizamkny so rozmołwa “SPOTLIGHT #5” na žurli. Nawoda Němskeje fototeki dr. Jens Bove a kuratorka Archiwa fotografow dr. Agnes Matthias so z Maćijom wo jeho skutkowanju a dalšim pobytku twórbow w fototece rozmołwjaštaj. Cyłkownje 35 zajimcow wopyta zarjadowanje, kotrež tež jara čiłu diskusiju zbudźi. Temy kaž lěpšiny a njelěpšiny předwostajenstwa, Maćijowy stil minimalneje- abo scyła falowaceje inscenacije, abo (nje-)konkurenca na polu wuměłstwa přez kumštnu inteligencu so tu narěčichu.

Wjedźenje z Jürgenom Maćijom

FOTOTHEK.spotlight#5: rozmołwne koło