Monthly Archives: September 2023

5.10.2023 + 12.10.2023 wot 10 hodź.

Prózdninski poskitk „Wšitko samozhotowjene – mydło a tekstilne wuhotowanje“
Wuhotujće waše T-shirty abo płatowe měški z płatowymi barbami, pisakami, parličkami, atd. sami! Wo čistej ruce stara so samodźěłane mydło za doma. Přizjewjenje pod ticket@sorbisches-museum.de, popłatk 7 €, wot 6 lět

Jedne městno – mnoho rěčow

Serbski muzej je zetkawanišćo za ludźi z regiona a ze cyłeho swěta. Tu nadeńdźeš rěčnu mnohotnosć. Na tutym dnju přeprošuje Serbski muzej mjezynarodnych hosći w 15 hodź. na wjedźenje w pólskej rěči a w 16 hodź. na wjedźenje w jendźelšćinje. Stawizny Serbow a wosebita wustajeńca “Čej´da sy?” so při tym předstajeja.

Krajnoradny zarjad Budyšin, Zarjad za wokrjesne wuwiće, wupisa za Serbski muzej

• kuratorske městno wobłuk kulturne stawizny / literatura (m/ž/d) (cyfra: 2023-68259)
• wěcywobdźěłar za financy / sekretariat (m/ž/d) (cyfra: 2023-68273)

Wjace pod https://www.landkreis-bautzen.de/stellen-und-ausbildungsangebote.php

Požadanski čas za wobej wupisani kónči so 24.9.2023.

Spominanje na molerja romantiki Carla Blechena  (* 1798 + 1840) w Muzeju Budyšin, Žitne wiki

Hižo moler Max Liebermann spózna ženij romantikarja Carla Blechena. Na zakładźe wubranych wuměłskich twórbow mj.dr. z Berlinskich zběrkow a Carla Blechowych twórbow w Choćebuzu předstaja knižny awtor a wuměłstwowy stawiznar Rocco Thiede žiwjenje a twórbu romantiskeho molerja. Blechenec mać bě Serbowka a jeje swójba pochadźa z Delnjeje Łužicy. Nan, katolski, přińdźe z Regensburga. Hraje swójbny pochad wuměłca za jeho wuwiće rólu? W přednošku hódnoći so wosebje jězba Blechena po Italskej 1828 / 29. Jězba hódnoći so jako wuměłski přełam kaž tež wjeršk jeho tworjenja. Nimo toho wočakuje wopytowarja přirunjanje a poćahi k někotrym zažno- kaž tež pózdnjoromantiskim mólbam, kotrež wisaja we wobrazowej galeriji muzeja Budyšin.

Zhromadne zarjadowanje Muzeja Budyšin, Serbskeho muzeja a Mättigoweje załožby.

zastup: 7 €, potuńšene: 2 €

tura 4: Přez cyrkwinske a rěčne kupy

Sobotu, 16. septembra podamy so na našu poslednju něhdźe 50 km dołhu turu přez katolsku Łužicu. Zetkamy so w 10 hodź. w Smochćicach při kubłanišću biskopa Bena.  Wot tam podamy so na puć přez Haslow do Baćonja k tamnišej wosadnej cyrkwi “Jězusoweje wutroby”, kotraž bu wot katolskich Serbow mjez 1882 a 1887 natwarjena. Znowa přez Haslow jědźemy k Zarěčanskemu wětrnikej mjez Łuhom a Chasowom. Dale wjedźe nas puć do Radworja, wosadna wjes z třomi cyrkwjemi, kotraž je zdobom tež ródna wjes zbóžneho Alojsa Andrickeho. Nimo zhubjeneje wsy Hronow dojědźemy sej naposledk do Zdźěrje a wot tam jědźemy přez Delnju Hórku wróćo do Budyšina.

15 hodź.  “Wosebitostki ze zběrkow Serbskeho muzeja”, referentka: Rebecca Wöppelowa

Předstajeja so wosebite eksponaty a kuriozity ze zběrkow. Dale budźe něhdyši direktor Arnošt Kowar (1961 – 1980) składnostnje 100. posmjertnych narodnin počesćene.

16 hodź. přednošk Přetrjebowarskeje centrale (Verbraucherzentrale), wotnožka Budyšin: „Kedźbu wobšudnik!“ Rěči so wo zjebanju při nakupje pječa drohotnych knihow

17 hodź. wospjetowanje přednoška Serbskeho muzeja w němskej rěči

Na Dnju pomnika njedźelu, dnja 10. septembra je w Serbskim muzeju zastup darmo.

W 15 hodź. budźe kuratorske wjedźenje po wustajeńcy „Čej´da sy?“, w 16 hodź. přizamknje so přednošk Trudle Kuringoweje „Serbske křiže a nabožne pomniki“.

Wupadnje!  Dźěłarnička pantomimy  “Čej’ da sy?“ z dźiwadźelnikom Měrkom Brankačkom

Kak zwuraznjamy naše začuća ze swojim ćěłom, z mimiku a gestiku?

přizjewjenje: ticket@sorbisches-museum.de, 03591/2708700

zastup: šulerjo 2 €, studenća 4 €, dorosćeni 7 €