Z herbstwa Serbstwa | Objekt des Monats 10_26
Serbske wašnja w keramice
Małoplastika „Slepjanske žony při pjecy“ předstaja historisku scenu wšědneho dnja. Pječenje chlěba měješe dołhu tradiciju na wsy, tež hdyž pjekarjo wjesnjanow z pječwami zastarachu. Něhdźe kóždej dwaj tydźenjej zatepichu hospozy pěc, zo bychu chlěby za swójbu napjekli. Chlěb njebě jenož zežiwidło, ale steješe symbolisce za ćežke dźěło, česćownosć a dźakownosć.
Christa Elisabeth Eitnerowa, rodźena Szardingec (31.10.1943 – 31.07.2024), bě po swojej žeńtwje w Brjazynje žiwa. Tam žony hišće w 1970tych lětach wšědnje w serbskej dźěłanskej drasće chodźachu a delnjoserbsce rěčachu. Jako wukubłana knihikupča wopyta wona ludowuměłske kružki na Choćebuskej inženjerskej wysokej šuli, hdźež jej moler a keramikar Walter Heinrich wuměłske rjemjesło zbliži.
W swojej Grodkowskej dźěłarni „Eitner Keramik“ pod dekornym mjenom „Łužyca“ stwori wona wot 1981, wot 1995 zhromadnje ze swojej dźowku Carolu Eitner, małoplastiki, wazy a wužiwansku keramiku. Přez dokładne wobkedźbowanje kaž tež studije nastachu figury a formy, kotrež pokazuja swojorazne wjesne sceny, nałožki, powěsće a serbske drasty. Tute njepyša jenož domjacnosće a zjawne rumy, ale su tež předmjet muzealnych zběrkow. Wustajeńcy w tu- a wukraju předstajichu jeje keramiki. Fascinowana wot kulturneje mnohotnosće wěnowaše so Christa Eitnerowa tematisce domiznje a wobchowa ze swojimi twórbami serbske žiwjenske wašnja.
- małoplastika „Slepjanske žony při pjecy“, SM-VI-005570
- Christa Eitnerowa, Grodk
- 1990, nadawkowa twórba za Dom za serbsku ludowu kulturu
- škleńčele: brune, mochzelene, čorne, kobaltowa módrina
