Jónu z profijemi dźěłać! Dožiw fotografisku dźěłarničku z prawym fotografom!
Za přichodne zymske prózdniny poskićimy w Serbskim muzeju něšto wosebite za wšěch zajimcow fotografije we wšěch starobnych skupinach!
Wobdźěliće so na dźěłarničce z nazhonitym profijowym fotografom a změjeće składnosć, sami fotografować kaž tež zhromadnje wobrazy wuhódnoćić. W druhim dźělu dźěłarnički maja so starše fotografije wot Was diskutować. Na tute wašnje dóstanjeće wjele pokiwow za Waše dźěło z fotowym aparatom.
Trěbne je, zo Was Waše starši najpozdźišo w běhu druheho februarskeho tydźenja přizjewja. Waš fotowy aparat a wobrazy, kotrež so Wam lubja, dyrbiće wot doma sobupřinjesć. Dźěłarnička wotměje so pod nawodom Jürgena Maćija.
Dźěłarnička wobsteji z dweju dźělow. K přenjemu razej wotměje so srjedu, dnja 15.2.2017 wot 9.00 – 13.00 hodź. a po tym hišće raz srjedu, dnja 22.2.2017, tohorunja wot 9.00 – 13.00 hodź.
Terminy: 15.2.2017, 9.00 – 13.00 hodź.
22.2.2017, 9.00 – 13.00 Hodź.
Zetkamy so w foyeru Serbskeho muzeja na Budyskim hrodźe.
Móžnosć, so na jednotliwym terminje wobdźělić, wobsteji. Druhi termin pak wobsahowje na prěni termin nawjaza.
wědomostny wolontariat
Wot januara 2017 dźěła Mónika Ošikowa jako wědomostna wolontarka w Serbskim muzeju. Na dwě lěće ma tu dohlad do wšěrokeho muzeologiskeho dźěła dóstać. Studowana krajna architektka wěnuje so hłownje muzeologiskej pedagogice, wutworjenju programow a přewjedźenje wjedźenjow. Dale stara so tež wo zjawnostne dźěło. Po dlěšim praktikumje w Kamjenskim muzeju Elementarium wjeseli so tu na wopytowarjow Serbskeho muzeja.
Knižna premjera wobrazoweju zwjazkow z historiskimi fotografijemi Łužicy
Na knižnu premjeru wobrazoweju zwjazkow z historiskimi fotografijemi Łužicy wot spočatka hač do 1930tych lět přeprošujetej LND a Serbski muzej
srjedu, 22. 02. 2017, 19.00 hodź., do Serbskeho muzeja, Budyšin.
Wudawaćel Jürgen Maćij kaž tež awtorki Andreja Pawlikowa, Marija Měrćinowa a Martina Nowakojc předstaja zwjazkaj, kotrejž wěnujetej so Hornjej kaž tež Delnjej Łužicy. Wšitcy zajimcy su wutrobnje přeprošeni.
18.00 hodź. wotměje so w Serbskim muzeju w Budyšinje wjedźenje z kuratorom Jürgenom Maćijom po wosebitej wustajeńcy ze samsnym titulom.
Serbski muzej spěchuje so přez Załožbu za serbski lud, kotraž dóstawa lětnje přiražki z dawkowych srědkow na zakładźe hospodarskich planow, wobzamknjenych wot zapósłancow Zwjazkoweho sejma, Krajneho sejma Braniborskeje a Sakskeho krajneho sejma, kaž tež přez wokrjes Budyšin a Kulturny rum Hornja Łužica-Delnja Šleska. Serbski muzej je zarjadnišćo wokrjesa Budyšin.
