11.09.2016 Dźeń wotewrjeneho pomnika – Swědki stawiznow
Serbski muzej wobdźěli so na lětušim dnju „Wotewrjeneho pomnika“ njedźelu, dnja 11.09.2016. Zastup do Serbskeho muzeja je na tutym dnju darmotny.
Předstajimy na tutym dnju projekt „Swědki stawiznow“ (djo-Deutsche Jugend in Europa.). Projektna skupina Budyskich šulerjow a maturantow, slědźeše pod nawodom Michaela Jemeljanowa k architektoniskim a stawizniskim pozadkam něhdyšeje Sólnicy, dźensnišeho Serbskeho muzeja. Wukony tuteje prócy pokazujemy na dnju „Wotewrjeneho pomnika“ jako mału wustajeńcu tu w domje.
Wustajeńca wobsteji z:
- filmom wo stawiznach Serbskeho muzeja a serbskeje kultury, kotryž bu wuhotowany z pomocu 3D-technologije.
- animaciskim filmom k projektnej iniciatiwy
- prezantaciju wirtuelneje reality (VR) z wosebitymi 3D-nałočemi za wobhladowanje twarjenja Sólnicy, nětčiši Serbski muzej w 360°.
- předstajenjom BIM (Building Information Modeling)-technologije z wužiwanjom nałočow za wirtualnu realitu. Z tutej techniku skići so wopytowarjam móžnosć wirtuelneho wopyta Serbskeho muzeja.
- informaciskimi sćěnami k stawizniskim aspektam Serbskeho muzeja a serbskeje kultury.
- modelom Serbskeho muzeja z papjery.
Projektowcy budu tu w domje za prašenja a jako rozkładowarjo přitomni.
“Serbske ludowe wuměłstwo w 21.lětstotku?!”
Serbske jejko kontra “ajfon”
Serbski muzej a Spěchowanski kruh za serbske ludowe wuměłstwo přeprošujetej ludowych wuměłcow wšelakich spartow a kaž tež wšitkich zajimcow, wosebje młodźinu na rozmołwny wječor “Serbske ludowe wuměłstwo w 21.lětstotku?!” do muzeja na Budyskim hrodźe srjedu, 31.8.2016 w 19 hodź. Mjezdruhim dźe wo prašenje, hač ma naša tradicionelna serbska kultura woprawdźe šansu napřećo Pokémon Go a podobnym powabkam a kak móžeš młodu generaciju za nju zahorić. Tež nowe ideje a serbske inowatiwne wudźěłki su witane. Diskusija so přez słuchatka do němčiny přełoži. Moderaciju přewozmjetej Andrea Pawlikowa a Rejzka Wałdźic. We 18 hodź. je wjedźenje po wustajeńcy ”Pruhi, kruhi, třiróžki”.
Koncertny wječor z Berndom Pittkunigsom
Sobotu, 27.8.2016 wotměje so koncertny wječor z serbskim spěwowym poetom Berndom Pittkuningsom. Zastup je darmotny a žurla budźe wot 18.15 hodź. přistupna.
Spěwy Bernda Pittkuningsa wobjednawaja serbsku identitu mjez wšědnym dnjom a serbskej kulturu, němskim kubłanjom a cyrkwju, hórnistwom a turizmom.
Serbski muzej spěchuje so přez Załožbu za serbski lud, kotraž dóstawa lětnje přiražki z dawkowych srědkow na zakładźe hospodarskich planow, wobzamknjenych wot zapósłancow Zwjazkoweho sejma, Krajneho sejma Braniborskeje a Sakskeho krajneho sejma, kaž tež přez wokrjes Budyšin a Kulturny rum Hornja Łužica-Delnja Šleska. Serbski muzej je zarjadnišćo wokrjesa Budyšin.
