Finisaža “Party w 21. lětstotku”, 4.9.2022
Dźěłarnička “Serbska drasta a bodypainting? Wot party k borće“
Serbska drasta a bodypainting, hodźi so to scyła hromadźe? Štóž chce tole wědźeć, njech přińdźe na finisažu, 4. septembra wot 10-17 hodź. do Serbskeho muzeja w Budyšinje pohladać. Tam wotměje so workshop za młodych kreatiwnych pod hesłom „Wot party k borće“. Katrin Salmen a Matej Dźisławk pokazatej, što maš při pomolowanju wobliča z ornamentami a při portretowej fotografiji wšo wobkedźbować. Słowakski wustajenski projekt „PARTY w 21. lětstotku“ skića ideje tež za nas Serbow. Za hru ze symbolemi a barbami je wšelaka serbska swjedźenska pycha přihotowana. Štóž chce, móže sej swójski make-up, wěcy za šminkwanje a kameru sobu přinjesć. Tež młodźi mužojo su wutrobnje witani! Přizjewće so pod ticket@sorbisches-museum.de abo tel. 03591/2708700, kóšty 10 €.
Nimo toho poskići so w 15 hodź. němskořěčne wjedźenje, w 16 hodź. wjedźenje w serbskej rěči a w 17 hodź. zakónčaca rozmołwa z kuratorami wustajeńcy!
Dźeń wotewrjeneho pomnika na 11.09.2022 wot 10-18 hodź.
Sólnica – sudnistwo – Serbski muzej
Pod hesłom “Mjez kulturnym dožiwjenjom a pomnikoškitom” wotměwa so lětuši dźeń pomnikow.
Na srjedźowěkowskim hrodźišću Milčanow bu 1782 sólnica natwarjena, kiž składowaše sól za Budyski kraj. Wot 1869 so dom po přetwarje jako sudnistwo wužiwaše. Hakle wot lěta 1974 so tu na městnje Serbski muzej zadomi, zběrka a narodne herbstwo pak sahatej wróćo do lěta 1856. Na žurli kaž tež na dalšich stacijach so stawizny domu pokazuja. zastup je darmotny
W prózdninach do muzeja
Pohladajće pod “kalender” abo “kubłanje a posrědkowanje”, tam namakaće naše prózdninske poskitki za dźěći a swójby. Tež septemberske zarjadowanja su tam hižo zapisane.
Serbski muzej spěchuje so přez Załožbu za serbski lud, kotraž dóstawa lětnje přiražki z dawkowych srědkow na zakładźe hospodarskich planow, wobzamknjenych wot zapósłancow Zwjazkoweho sejma, Krajneho sejma Braniborskeje a Sakskeho krajneho sejma, kaž tež přez wokrjes Budyšin a Kulturny rum Hornja Łužica-Delnja Šleska. Serbski muzej je zarjadnišćo wokrjesa Budyšin.
