Hudźba a reje na staroměšćanskim festiwalu
- 30.8.2019, 17 hodź.: Serbska reja
Jako zazběh staroměćanskeho festiwala „woda, wuměłstwo, swětło“ přeprošujemy w 17 hodź. k lóštnym rejam a k bjesadźe! Wšitcy zajimcy su wutrobnje witani, reje so zhromadnje nazwučuja. (zastup bjezpłatny)
- 31.8.2019, 17 hodź.: koncert „Aliquis“
Čěska skupina „Aliquis“ hraje w 17 hodź. hudźbu srjedźowěka, renesansy a baroka. Tak zaklinča lubosćinske spěwy a lóštne rejowanske štučki wšelakich krajow. Zběrka historiskich instrumentow wuprudźa zynki tutoho časa. (zastup bjezpłatny)
Wjedźenje, čitanje a koncert na kónc tydźenju
Pjatk, dnja 23.8.2019 w 14 hodź. poskićuje so zjawne wjedźenje po wuměłskej wustajeńcy w serbskej rěči.
Přizamknje so w 16.30 hodź. w rumnosćach wosebiteje wustajeńcy čitanje ze serbskej awtorku Lubinu Hajduk-Veljkowićowej a słowjenskej basnicu Anju Golob. Tworjenje wobeju literatkow je so wjacekróć wuznamniło.
Mjez wjedźenjom a čitanjom poskićuje so kofej a tykanc.
Njedźelu, dnja 25.8.2019 w 15 hodź. přeprošujemy wutrobnje na koncert a finisažu wustajeńcy.
Pod titulom TŠUGA. ALLES FLIEßT (VSE TEČE) zaklinča wjacore nowokompozicije serbskich komponistow, při tym zhudźbnjenja lyriskich tekstow Kita Lorenca. Wjeselće so na saksofonowy kwartet modernsax berlin, Heidemarie Wiesnerec (klawier), Walbugu Wałdźic (spěw) a Gerolda Gnauscha.
Zastup je na wobě zarjadowani darmotny.
