24.6.15 Kofej w třoch:
Pod hesłom „W kuzle janskeje nocy“ wjerći so tutón króć wšo wokoło wašnjow a přiwěrkow kołowokoło lětneje wróćicy słónca.
Wokoło swjateho Jana zběraja so tež hojerske zela, wšako maja potom najsylnišu skutkownosć. Wšelake bajki wo dźiwnych podawiznach wudospołnjeja přednošk sobudźěłaćerki muzeja Andreje Pawlikoweje.
Přednošk wotměje so w muzejowym kabineće. Přidatnje k zastupej wobliča so 1,50 € na wosobu za pohosćenje z tykancom a kofejom.
Wšitcy přećeljo muzeja a zajimcy su zaso na „Kofej w třoch“ wutrobnje přeprošeni.
Za lěpšu organizaciju prosymy po móžnosći wo přizjewjenje hač do wutory 23.6.15 pola sekretarki.
Wjeselimy so na Waš wopyt!

Dołha nóc kultury w Budyšinje 13 .06.2015
Lětuše programowe poskitki Serbskeho muzeja poćahuja so na tučasnu wosebitu wustajeńcu „Karl Vouk. Satkula abo (s)twor(jen)a krajina“.
Knjez Karl Vouk budźe sobotu wječor přitomny w Serbskim muzeju a poskići wodźenje přez swójsku wosebitu wustajeńcu w 19.00 a w 22.00 hodź.
Hłowny poskitk je w 20.30 hodź., jako zhromadny projekt ze Załožbu za serbski lud, předstajenje literarneho koncerta „Rekwiem za Mata Starika“. Na zakładźe teksta „Mato Starik“ dr. Tonija Bruka a po koncepciji Michaela Stöckla, wobjednawa so wosud wosoby, kotraž přez dalše wudobywanje brunicy, swójski dom, zdobom doma zhubi.
„Rekwiem za Mata Starika“ pokaza so k prěnjemu razej 12.8.2014 w zwisku z Pliberskimi dźiwadłowymi dnjami (Bleiburger Theatertage.) jako zhromadny projekt słowjenskich/rakuskich a serbskich wuměłcow.
Zastupne lišćiki za Dołhu nóc kultury hodźa so při kasy Serbskeho muzeja kupić w předpředani abo při wječornej kasy.
Za našich wopytowarjow poskićimy zakuski a wšelke napoje.
Filmowy wječor “Rublak” 27.05.2015
Přeprošujemy Was a Wašich přećelow
wutrobnje na wodźenje přez wustajeńcu a filmowy wječor we wobłuku wosebiteje wustajeńcy
KARL VOUK: SATKULA ABO (S)TWOR(JEN)A KRAJINA
srjedu, dnja 27.meje 2015
do Serbskeho muzeja w Budyšinje na Hrodźe.
18 hodź wodźenje přez wustajeńcu
19 hodź pokazuje so film „Rublak – Die Legende vom vermessenen Land” (1982) po powědančku „Mój wuměrjeny kraj” wot Jurja Kocha w njekrótšenej wersiji
režija Konrad Herrmann
zawod k filmej poda kameramuž a režiser Reiner J. Nagel
Wustajeńca je zhromadny projekt Serbskeho muzeja a Załožby za serbski lud.
Zastup 5,00 € / potuńšene 2,50 €
Wotewrjenje. Satkula. 03.05.2015
Přeprošujemy Was a Wašich přećelow
wutrobnje na wotewrjenje wosebiteje wustajeńcy
KARL VOUK: SATKULA ABO (S)TWOR(JEN)A KRAJINA
njedźelu, dnja 3.meje 2015 w 15.00 hodź.
do Serbskeho muzeja w Budyšinje na Hrodźe.
Powitanje
Christina Boguszowa, direktorka Serbskeho muzeja
Postrowne słowa
Marko Suchy, direktor Załožby za serbski lud
Zawod do wustajeńcy
Karl Vouk, wuměłc, Celovec / Rinkole, Awstriska
Hudźba
Skupina DeyziDoxs
Wustajeńca je zhromadny projekt Serbskeho muzeja a Załožby za serbski lud.
Wopytowarjo wotewrjenja wustajeńcy dóstanu składnosć potuńšeneho zastupa za poslednje předstajenje dźiwadłoweje hry „Mój wuměrjeny kraj” wot Jurja Kocha w Němsko-Serbskim ludowym dźiwadle dnja 3. meje 2015 w 17.00 hodź.
Zhromadna akcija Serbskeho muzeja z Němsko-Serbskim ludowym dźiwadłom.
Zastup do Serbskeho muzeja darmotny
Płaćizna za potuńšeny zastupny lisćik na předstajenje w NSLDź wot 8,00 €