Uncategorized

Lětsa je Josefine Falkenberg jedna z našich praktikantow. Wona přewjedźe swój štyridźenski praktikum w ramiku swojeho studija a zaběra so po nadrobnej rešerši z drastami zapadnych Słowjanjow w zažnym srjedźowěku kaž tež z hrodźišćemi a zasydlenjemi wokoło 11. a 12. lětstotka. K tomu zhotowi wona tež rysowanki a skicy. Wotmysł jeje dźěła budźe, wjedźenja za dźěći přez muzej bóle nazornje wuhotować. Knjeni Falkenberg studuje archeologiju grjekskeho, romskeho a bycantineskeho swěta kaž tež etnologiju (2 předmjetaj na Bachelor) na Georga-Augustowej-Uniwersiće w Göttingenje.

Prěni raz wěnuje Serbski muzej w Budyšinje wot 09.10.2016 hač do 01.03.2017 wosebitu wustajeńcu stawiznam fotografije we Łužicy a prašenju, hdy jewjachu so w fotografijach serbske elementy jako wotmolowanja hódny motiw. (Hlej: https://sorbisches-museum.de/?lang=wen)  K tomu přehladachu so we łužiskich archiwach a muzejach kaž tež pola priwatnych wosobow njesměrnje wjele originalnych fotografijow.

Wobsedźiće tež wy zajimawe historiske wobrazy z časoweje doby 1850 hač do 1930? Potom njedwělujće a poskićće tute Serbskemu muzejej za čas wustajeńcy abo jenož na wobmjezowanu chwilu! Za to stej dwě wosebitej sćěnje rezerwowanej. Prošu přizjewće so pola nas, zo bychmy motiwy wupytali.  Z tym móžeće přinošować, zo so wustajeńca stajnje znowa přeměnjuje. Stawizny su žiwe wot  žiweho kaž tež wot zachodneho wokomika; žadyn druhi medij njewujasni to tak jasnje kaž fotografija.

Přichodnu srjedu přeprošuje Serbski muzej wšěch zajimcow zaso na “Kofej w třoch”. Tema je tónraz njewšědny eksponat, kotryž chcemy Wam rady předstajić.

Naš restawrator knjez Bart budźe při tym ke konserwatoriskim aspektam rěčeć.

hdy: srjedu, dnja 07.09.2016

čas: w 15.00 hodź.

hdźe: Serbski muzej na Hrodźe 3, 2. poschod Muzejowy kabinet

Zastup 5 € na wosobu + 1,50 € za pohosćenje.

Z Wašim přizjewjenjom móžemy lěpje planować.

Serbski muzej wobdźěli so na lětušim dnju „Wotewrjeneho pomnika“ njedźelu, dnja 11.09.2016. Zastup do Serbskeho muzeja je na tutym dnju darmotny.

Předstajimy na tutym dnju projekt „Swědki stawiznow“ (djo-Deutsche Jugend in Europa.). Projektna skupina Budyskich šulerjow a maturantow, slědźeše pod nawodom Michaela Jemeljanowa k architektoniskim a stawizniskim pozadkam něhdyšeje Sólnicy, dźensnišeho Serbskeho muzeja. Wukony tuteje prócy pokazujemy na dnju „Wotewrjeneho pomnika“ jako mału wustajeńcu tu w domje.

Wustajeńca wobsteji z:

1. filmom wo stawiznach Serbskeho muzeja a serbskeje kultury, kotryž bu wuhotowany z pomocu 3D-technologije.
2. animaciskim filmom k projektnej iniciatiwy
3. prezantaciju wirtuelneje reality (VR) z wosebitymi 3D-nałočemi za wobhladowanje twarjenja Sólnicy, nětčiši Serbski muzej w 360°.
4. předstajenjom BIM (Building Information Modeling)-technologije z wužiwanjom nałočow za wirtualnu realitu. Z tutej techniku skići so wopytowarjam móžnosć wirtuelneho wopyta Serbskeho muzeja.
5. informaciskimi sćěnami k stawizniskim aspektam Serbskeho muzeja a serbskeje kultury.
6. modelom Serbskeho muzeja z papjery.

Projektowcy budu tu w domje za prašenja a jako rozkładowarjo přitomni.

Serbske jejko kontra “ajfon”

Serbski muzej a Spěchowanski kruh za serbske ludowe wuměłstwo přeprošujetej ludowych wuměłcow wšelakich spartow a kaž tež wšitkich zajimcow, wosebje młodźinu na rozmołwny wječor “Serbske ludowe wuměłstwo w 21.lětstotku?!” do muzeja na Budyskim hrodźe srjedu, 31.8.2016 w 19 hodź. Mjezdruhim dźe wo prašenje, hač ma naša tradicionelna serbska kultura woprawdźe šansu napřećo Pokémon Go a podobnym powabkam a kak móžeš młodu generaciju za nju zahorić. Tež nowe ideje a serbske inowatiwne wudźěłki su witane. Diskusija so přez słuchatka do němčiny přełoži. Moderaciju přewozmjetej Andrea Pawlikowa a Rejzka Wałdźic. We 18 hodź. je wjedźenje po wustajeńcy ”Pruhi, kruhi, třiróžki”.

Sobotu, 27.8.2016 wotměje so koncertny wječor z serbskim spěwowym poetom Berndom Pittkuningsom. Zastup je darmotny a žurla budźe wot 18.15 hodź. přistupna.

Spěwy Bernda Pittkuningsa wobjednawaja serbsku identitu mjez wšědnym dnjom a serbskej kulturu, němskim kubłanjom a cyrkwju, hórnistwom a turizmom.

Oficialny započatk lětnych prózdnin so bliži! Husto sej swójby, dźěći a młodostni w prózdninach za nowych cilow prašeja. Za tutón pad mamy dźěłarničku „Stare mustry na nowych wěcach“ , dnja 16.07. a 27.07.16 jako kruty termin na poskitik. Wobsteji tež móžnosć, sej přidatne terminy wotrěčeć. Naše zwučene wjedźenja a programy za dźěći wězo dale poskićimy.

Dalši wuhlad:

Na pózdne lěćo, srjedu, 31.08.16 wotměje so pola nas, hišće raz w zwisku z wustajeńcu „Pruhi, kruhi, třiróžki“ temowy wječor. Wot 18.00 hodź. wjedźe so přez wustajeńcu a w 19.00 hodź. započina so zjawna rozmółwa (podiumowa diskusija) k temje „Serbske ludowe wuměłstwo w 21. lětstotku?“. Wjacori znaći ludowi wuměłcy budu přitomni.

Wočakujemy žiwu diskusiju.

Přiwisnicy muzejoweho kofeja njech sej srjedu, 07.09. 2016 w 15.00 hodź. spomjatkuja. Potom rěči naš restawrator wo njewšědnym eksponaće z našeje zběrki.

Lubi wopytowarjo, lubi hosćo a přećeljo Serbskeho muzeja!

Wot 09.06.2016 dožiwi nam z dźěćatstwa znata banda – “Olsenbande” swoje dyrdomdejstwa na hrodźe! NSLDź předstaji hru “Die Olsenbande und der große Hintermann”.

Za čas lětnjeho dźiwadła płaća terminowe změny nastupajo wotewrjenske časy w Serbskim muzeju, na kotrež chcemy tu hišće raz pokazać! Tohodla njewobdźěli so Serbski muzej lětsa na Dołhej nocy kultury w Budyšinje, sobotu 11.06.2016.

Njeprawidłowne wotewrjenske časy su za Was tež do protyki zapisane.

Prošu wobkedźbujće sćěhowace změny:

Za wšě zbytne dny płaća prawidłowne wotewrjenske časy.

Zwučenosć, zo wuhladaš na přichodnym wotewrjenju wosebiteje wustajeńcy Serbskeho muzeja kruh dosć derje znatych, swěrnych wopytowarjow muzeja, njebudźe so tutón raz z wěstotu spjelnić. Hišće do wotewrjenja wustajeńcy k stotym narodninam Jurja Brězana předstaji Serbski muzej Serbow jako lud a jich kulturu w muzeju Deutsches Museum Nordschleswig. Tam wotměwa so tematiske lěto wo Serbach. A tež akcent wustajeńcy „Mały lud. Bohata kultura“ je k wjetšemu podźělej na načasne žiwjenje a Serbstwo wusměrjeny.

Adresa:

Deutsches Museum Nordschleswig

Rønhaveplads 12

DK 6400 Sønderborg

Link:  www.deutsches-museum.dk 

Zwučenosć, zo wuhladaš na přichodnym wotewrjenju wosebiteje wustajeńcy Serbskeho muzeja kruh dosć derje znatych, swěrnych wopytowarjow muzeja, njebudźe so tutón raz z wěstotu spjelnić. Hišće do wotewrjenja wustajeńcy k stotym narodninam Jurja Brězana předstaji Serbski muzej Serbow jako lud a jich kulturu w muzeju Deutsches Museum Nordschleswig. Tam wotměwa so tematiske lěto wo Serbach. A tež akcent wustajeńcy „Mały lud. Bohata kultura“ je k wjetšemu podźělej na načasne žiwjenje a Serbstwo wusměrjeny.

Adresa:

Deutsches Museum Nordschleswig

Rønhaveplads 12

DK 6400 Sønderborg

Link:  www.deutsches-museum.dk