Uncategorized

Doba našeje wustajeńcy „Wuzwolene. Nowonakupjene twórby tworjaceho wuměłstwa“ chila so ke kóncej.
W zwisku z wustajeńcu chcu Was wosebje na srjedu 13.01.2016 skedźbnić. Poskići so kuratorne wodźenje přez wustajeńcu wot 18.00 hodź. sem a 19.00 započina so zajimawy kolokwij z nazhonjenym zběraćelom wuměłskich twórbow a čłonom spěchowarskeho towarstwa, knjezom Jurijom Łušćanskim.
23.01.16 zaruči so ludźom, kotřiž rady kreatiwnje dźěłaja móžnosć, so na eksperimentelnej dźěłarničce (workshop) knjeni Spengleroweje wobdźělić.
A k finisaži njedźelu 31. januara skónčimy, kaž husto z wašnjom, ze zjawnym wodźenjom

Přiležnje k dźensnišemu poslednjemu „Muzejowemu kofeju“ lěta 2015 k temje serbska zymska drasta wjeselimy so, Wam terminy za přichodne lěto wozjewić móc. Nadal budźe so wón jónu za štwórć lěta srjedu w třoch wotměwać.
Termin 16. měrca 2016 započina so wuwzaćnje hižo w 14.00 hodź., takrjec „Kofej dwěmaj“ a nic „Kofej w třoch“. Tema maja wšelake nałožki nalěća być.
1.junija a 7. septembra je potom zaso prawidłowny čas 15.00 hodź.
Zymski termin budźe 7.12.2016. Hlejće prošu tež do našeje protyki tu na stronje.

Lubi přećeljo serbskich stawiznow a kultury! W druhej połojcy nazymnika wužada so Waša wutrajnosć! Dla přetwara kasoweho ruma a wotrjada tworjace wuměłstwo wostanje zjawny dźěl Serbskeho muzeja wot 16.11.15-04.12.15 zawrjeny. Wšitke, zarjadowanja so pak runje kaž přizjewjene skupinske wodźenja wotměja, kaž wozjewjene.
W třećim poschodźe so rumnosć wuměłstwa zdźěla přetwori. Foyer z kasu so tež přeměni.

A k swjatemu Mikławšej wobradźamy Wam hižo sobotu 5.12.15 potom hotowu překwapjenku, a Wy směće sej kaž wćipne Jěwy naše nowe rumnosće wobhladać!

Wčera wječor skićiše so zajimowanemu wopytowarjej móžnosć, cyłk filmow Maje Nageloweje w chronologiskim rjedźe widźeć.
Hač na bóle dokumentarisce wusměrjeny film „Cerne jagody“ jednaše so wo animaciske filmy. We wašnju rozmołwy z referentku dr. Grit Lemke rozkładźe wuměłča někotre motiwy a ideje, kotrež tworja zakład jeje filmoweho dźěła.
Wosebity dźak chcemy na tutym městnje knjezej Andreasej Großmannej wuprajić, kotryž je jako pokazowar filmow projektorowy typ Tk35 za originalne 35mm’ske filmowe róle posłužował.
Tak je na žurli woprawdźita atmosfera něhdyšich wjesnych kinow nastała.

Srjedu, dnja 30.09.15 předstaji a rozestaji so Serbski muzej z filmowym tworjenjom łužiskeje wuměłče Maje Nageloweje. Jeje mnohostronske dźěło, kotrež zwobraznuje so w 7 filmach wobsahuje:
rysowane metamorfozy, nahrawanja perfomancow, dopomnjenja na wotbagrowane wsy a poetiske wobhladowanje so pozhubjaceje Mužakowskeje hole.
Zawodne słowa poda, fachowa žurnalistka a wjednica filmoweho programa „Dok Leipzig“, dr. Grit Lemke z Berlina.
Wšě filmy traja hromadźe někak jednu hodźinu.
19:00 hodź – na žurli

Dr. Grit Lemke:

Wjednica filmoweho programa DOK Leipzig, awtorka/kuratorka

Narodźi so 1965 w Grodku/ Delnja Łužica. Wukubłanje jako fachowa twarska dźěłaćerka a dźěło w dźiwadłowym a kulturnym wobłuku. Studij kulturnych wědomosćow, etnologije a literatury w Lipsku, promocija w europskej etnologiji. Wot lěta 1991 dźěło za DOK Leipzig, a wot 2014 sem tam wjednica filmoweho programa. Wot lěta 2001 do lěta 2003 wuběrkowe dźěło za Sheffield International Documentary Festival. Wot 1998 sem we wšelakich funkcijach za festiwal wuchodo-europskeho filma w Choćebuzu, tam wot lěta 2014 sem zamołwita za němsko-serbski wotrjad „Heimat / Domownja“. Kuratěrowaše rjady filmowe rynki, mjez druhim za DOK Leipzig, Akademiju wuměłstwa w Berlinje, GoEast Festival srjedźno- a wuchodoeuropskeho filma we Wiesbadenje a za Goethowy institut. Měješe wjacore kubłanske nadawki we wobłukomaj wizuelneje antropologije a dokumentarneho filma na wjacorych wysokich šulach a institutach. Skutkowaše jako mentorka we wjacorych treningowych programach, sobudźěło jako awtorka za dokumentarne filmy a –serije kaž tež za publikacije k dokumentarnemu filmej, pisa za nowiny a časopisy.

(Janina Krygarjowa)
Nowy plakat “Serbske stawizny w 160 wobrazach” so 23. septembra 2015 w 19.00 hodź. w Serbski muzeju zjawnosći předstaji.
W 160 wobrazach a krótkich tekstach poda so přehlad wo faktach serbskich kulturnych stawiznow w Hornjej a Delnjej Łužicy. Wot prěnjeho pisomneho naspomnjenja Serbow w chronice Fredegara wokoło 630 hač k stotej róčnicy załoženja Domowiny w lěće 2012 so stawizny Serbow zwobraznjeja. Historiske dokumenty a objekty steja jako symbol za wažne mězniki serbskich stawiznow. Awtoraj dr. Hans Mirtschin a Ralf Reimann, kotrajž staj tež awtoraj plakata k stawiznam Budyšina, staj nimo znatych dokumentow a wobrazow wušiknje tež nowy material wuzwoliłoj. Zmóžnitaj z tym wobhladowarjej wosebity wid na serbske kulturne stawizny.
Byrnjež so stawizny Serbow chronologisce wobjednawaja, so přez wosebite wuhotowanje zdobom paralelne zhladowanje na wěste časowe wotrězki zmóžnja. Tomu polěkuje tež barbny časowy přehlad, kotryž zmóžnja zarjadowanje podawkow do stawiznow wobeju Łužicow a Němskeje.
Plakat, kotryž so jako ryzy plakat we wulkosći 63 cm x 89,1 cm a na wulkosć A4 fałdowany poskića, předleži w serbskej a němskej rěči. Wón ma wosebje pola młodostnych zajim za stawizny Serbow a dwurěčneje Łužicy budźić.

Wudawaćeljo: Domowina – Zwjazk Łužiskich Serbow z.t., Rěcny centrum WITAJ, Serbski institut z.t., Serbski muzej Budyšin
Awtoraj: Ralf Reimann a dr. Hans Mirtschin

W přichodnych šěsć tydźenjach podpěruje Daniela Šenkec ze Smjerdźaceje Serbski muzej při digitalnym archiwizowanju plakatow na komputeru.
Za to wužiwa 23lětna studentka katolskeje teologije, wuměłskich stawiznow a stawiznow čas mjezy 6. a 7. semestrom jeje studijow na bachelor-wotzamknjenje.
Při jeje dźěle nawjeduje ju naša muzeologowka knjeni Bierlingowa.
„Jedna so wo jedyn tmj. wólbnowinowaty praktikum, tuž chcych jón rady w Serbskim muzeju złožić.“

Za čas lětneho dźiwadła přindźe na slědowacych kónc tydźenjach k změnam wotewrjenskich časow.
Prosymy tute wobkedźbować:

25.07.2015 – zawrjene wot 14.00 hodź.
01.08.2015- zawrjene wot 15.30 hodź.
02.08. 2015 – zawrjene wot 14.00 hodź.

Ličba wobdźělnikow drje běše w druhim tydźenju lětnych prózdninow hišće přehladna, za to pak stachu so resultaty ručneho dźěła ćim lěpje!
A tež jedyn wěsty muzejowy pedagoga, kotryž swójskej radźe njesćěhowaše a spytaše na čornej bałmje dźěłać – je so wo jedne nazhonjenje wobohaćił.
Za zajimowanych su te dalše wobrazy dźěłow knjeni Palmanoweje pod zapisom poskitka – w rubrice Kubłanje a posrědkowanje – zapołožene.

Hižo druhi raz přewjedźe so wčera, dnja 24.06. w 15.00 hodź. „Kofej w třoch“. Wobdźělichu so samo wjace hosći hač na zahajenskim přednošku. Tema přednoška běchu wašnja wokoło swjatojanskeje nocy.
Referentka Andrea Pawlikowa widźi tendencu pozitiwnje. Posktik wužiwachu starši kaž tež młódši hosćo. Wón pak njeměri so jenož na Serbow, ale tež němskich zajimcow. Referenća potom wotpowědnje reaguja.
Přeńdźewši wot zawodneho přednoška do diskusije nasta žiwa rozmołwa při kofeju a tykancu.
„Jara so mi lubi, zo wopytowar njewostanje tu jenož ‚němy’ wobkedźbowar, ale zo so aktiwnje wobdźěli.“ tak kónčny komentar wjednicy Serbskeho muzeja knjeni Boguszoweje.
Přichodny „Kofej w třoch“ budźe 23.09.2015. Referuje Christina Boguszowa wo wuměłskej zběrce Serbskeho muzeja.