Uncategorized

Nimale 1700 turistow, ale tež domoródnych je zaso jutrowny kónc tydźenja wužiło składnosć, sej wobhladać Budyski Serbski muzej, jeho wustajeńcy a debjenje jejkow. Wosebity wjeršk pak bě program sobotu popołdnju w štyrjoch. Před kopaće połnej žurlu wustupištej Marta a Hanka Zahrodnikec z Ćiska hromadźe z maćerju Anett Zahrodnikowej. Serbske stučki na dudach, serbskich husličkach a pišćałce, ale tež krasnje zanjeseny duet “Komu su sněhowki” publikum zahorichu.

Wosebje zajimawe běchu rozłoženja k jutrownym serbskim nałožkam, serbskej drastu a serbskim hudźbnym nastrojam kaž tež situaciji Serbstwa wokoło Wojerec, kotrež wšitcy třo wotměnjejo přewzachu. Hólču drast prezentowaštaj bratr Werner Zahrodnik a přećel Paul Mautz. Připosłucharjo wužichu po tym hišće składnosć k rozmołwje z talentowanej młodej swójbu z Ćiska.

Wot lońšeho nowembra sem je so wobłuk tworjaceho wuměłstwa w našim muzeju z nowej koncepciju wuhotował, přewažnje dla zasadźenja wěstych nowonazběranych twórbow do sstajneje wustajeńcy. To wotmě so w zwisku z twórbami, kotrež su so we wosebitej wustajeńcy “Wuzwolene. Nowonakupjene twórby tworjaceho wuměłstwa.” zdzěla hižo wustajeli.

Tutón wobšěrny projekt njeby so móhł bjez wulkomyslneje pjenježneje podpěry Zwjazkoweho programa “Inwesticije za narodne kulturne zarjadnišća Wuchodneje Němskeje” přez Sakske statne ministerstwo za wědomosć a wuměłstwo kaž tež Wuchodněmsku nalutowansku załožbu hromadźe z Wokrjesnej nalutowarnju Budyšin, Załožbu za serbski lud realizować.

Wšitkim spěchowarjam so dźakujemy, hladajo na nowonakupy poslednich pjěć lět wosebje Załožbje za serbski lud a Sakskim krajnym centrumej za muzejownistwo při Statnych wuměłstwowych zběrkach w Drježdźanach.

Za wšěch  zajimowanych rěka to – dalša přičina za wopyt!

W zwisku z wustajeńcu “Pruhi, kruhi, třiróžki. Pisane serbske jutrowne jejka.” poskićimiy za čas jutrownych prózdninow nimo bosěrowanja tež nawuknjenje technikow škrabanja a wužrawanja.

Kurs wotměje so: Wutoru 29. měrca wot 10.00-12.00 hodź.

Prosymy tohodla wo přizjewjenje!

Dalši praktiski pokiw: Njech sej kóždy, kotryž so na bosěrowanju wobdźěli wudute, běłe jejka sobupřinjese. Štóž chce škrabanje abo wužrawanje zwučować, sej njech wotpowědnje hižo barbjene jejka (wudute abo warjene) sobupřinjese. K tomu jedyn kónčkojty předmjet, z kotrymž hodźi so drobnje dźěłać.

16. měrca 2016 wotměwa so přichodny muzejowy kofej. Na tutym městnje chcemy hišće raz na to skedźbnić, zo započina so tutón raz hižo w dwěmaj.

Přednošk dźerži so w němskej rěči. Tema budźe nałožki nalěća, při ćimž maja so za šěrši němskorěčny a srjedźnoeuropski rum wšelake podobnosće a paralely wobjednawać.

Wjeselimy so na Waš wopyt!

Přednošuje Měrćin Brycka.

Katalog k wosebitej wustajeńcy “Pruhi, kruhi, třiróžki. Pisane serbske jutrowne jejka” je wušoł. Kniha płaći pola nas 10 €.

Na jednym boku namakaće w tutym katalogu najnowše a najwobšěrniše wědomostne rozestajenje z wuwićom, rozšěrjenjom a pozadkami jejkadebjenja kaž z dalšimi z jejkami zwjazanymi nałožkami. Na druhim boku je cyła kniha jara čitajomna pisana a estetisce wuhotowana. W druhim dźělu knihi předstaja so znaći jejkadebjerjo. Wšo dohromadźe je to prosće idealny dar k jutram.

Dnja 5. měrca 2016 wotměje so na žurli Serbskeho muzeja lětna hłowna zhromadźizna Maćicy Serbskeje. To je tež za nas jako Serbski muzej wažny podawk, hladajo na historiske wuwiće našeho zarjadnišća. Wjac hač dwaj lětdźesatkaj do załoženja prěnjeho Serbskeho doma nastaji so koncepcija za Serbski muzej wot dr. Arnošta Muki . Wona běše wobšěrna a jara načasna.
Do załoženja Maćicy Serbskeje (delnjoserbsce: Maśica Serbska, załoži so 1880 w Choćebuzu.) wobstachu hižo Maćicy jako wědomostne towarstwa w słowjanskim wukraju, kotrež běchu serbskim prócowarjam znate a ke kotrymž wudźeržowachu dobre styki. Serbski muzej je čłon Maćicy Serbskeje.
Lětsa spominamy na 200. narodniny Jana Arnošta Smolerja. Z tuteje přičiny je so Smolerjowe lěto z mnoho podawkami zarjadowało.

W času jejkowych wikow w Serbskim domje ma Serbski muzej na Budyskim hrodźe cyle wosebity poskitk: Kirsten Bejmic budźe hromadźe ze swojej dźowku Marielenu pokazać, kak so po starym, wašnju jejka škrabaja a wužrawaja. Za to budźemy ekstra tež jejka z cyblowej jušku barbić. Chcemy cyle po starej tradiciji tutej wosebje we Wojerowskej kónčinje rozšěrjenej technice ze zajimcami zwučować. Poskitk je jónkrótny a jenož tutu sobotu. We 18 hodź přizamknje so zetkanje jejkadebjerjow a zajimcow, tohorunja w Serbkim muzeju.

Wjeselimy so, pola nas nowu koleginu za wobłuk wopytowarskeje posłužby powitać. Knjeni Madlen Wjelina nastupi tak na městno, kotrež bu z wuměnkom mnoholětneje koleginy knjeni Škodźiny k lětnej změnje swobodne.
Zdobom zawjeselace: knjeni Wjelina ma samo hižo nazhonjenja w muzejowm dźěle.

Witajće k nam!

Lubi přećeljo Serbskeho muzeja! Wulki róžk je skerje nimo a z tym skónči so wustajenska doba nowonakupjenych twórbow poslednich pjeć lět. Tohodla přeprošamy wšěch zajimcow, so njedźelu, 31.01.2016 w třoch na kuratornym wjedźenju wobdźělić. Muzejowa wjednica knjeni Boguszowa dźěła z načasnymi wuměłcami hromadźe a je tež mnohich mjeztym zemrětych derje znała.
Ale tež starše dźěła schowaja wjele zajimawostkow w sebi. Husto je stawizna „zady“ wobrazoweho ramika jimaca kaž dobra kniha!
Dźěl nakupjenych twórbow so po tym do stajneje wustajeńcy do wotrjada tworjaceho wuměłstwa zarjaduja. Wjeselimy so na Was!

Přichodnu srjedu, dnja 13.01.16 w 19.00 hodź. wotměwa so nawjazujo na wosebitu wustajeńcu „Wuzwolene. Nowonakupjene twórby tworjaceho wuměłstwa“ zjawna rozmołwa pod hesłom „Lóšt a tróšt zběranja“.
Ju nawjeduje Jurij Łušćanski, kotryž ma dołholětne nazhonjenja na polu wuměłskeho zběraćelstwa. Najznaćiše „wotkryće“Jurja Łušćanskeho w zwisku z wustajeńcu „Wuzwolene. Nowonakupjene twórby tworjaceho wuměłstwa“ je drje Mišnjanska pórclinowa figura „Serbski braška“ po předłoze Huga Spielera z lěta 1897/98. Při slědźenjach pokazaše so, zo je figura dźěl serije wo němskich ludowych drastach, na kotruž bě so mjeztym pozabyło.

Na čo maš při zběranju dźiwać, a što takle při tym wšo dožiwiš, wo tym budźe zběraćel na tutym wječoru rozprawjeć. Chcemy rady jednu zjawnu rozmołwu w lochkej atmosferje zahaiić, tuž su wšitcy wutrobnje přeprošeni, ze swójskich dožiwjenjow a nazhonjenjow powědać.

Štóž zajimuje so za pozadki jednotliwych wobrazow a za wuměłcow, ma k tomu wot 18.00 hodź sem we wobłuku zjawneho wjedźenja přez wosebitu wustajeńcu składnosć.
Wobraz: Serbski Braška 1897/98 Mišnjanski pórclin, barbnje pomolowany © Serbski muzej 2015.