Uncategorized

chorosće dla so koncert njewotměła, nowy termin budźe 18.12.

“Gastspiel CASAPIETRA – Die schönsten Himmelslieder”

-> klasiske twórby kaž “Ave Maria, “Ave Verum”, “Eine Mondscheinnacht”,  “Hallelujah”, atd.

Na slědy serbskich Wojerec poda so sobotu 10. awgusta Spěchowanske towarstwo Serbskeho muzeja z Budyšina. Bywši referent Domowiny Werner Sroka wjedźeše po měsće, kiž bě něhdy srjedźišćo serbskeje holanskeje kónčiny, 1912 kolebka Domowiny a w 1950ych lětach přechodnje serbski centrum Łužicy. Wo změnach přez industriju, z tym zwjazanym přeněmčenjom a wo róli šule w běhu časow zhonichu zajimcy w šulskej a domizniskej stwě w Ptačecach wot Martiny Pečikoweje.

Lube dźěći, starši kaž tež wowki a dźědojo – wjeselimy so hižo na lěćne prózdniny a smy wšelake poskitki přihotowali. Tuž hač do bórze!

04.07.2024 + 11.07.2024, 10 – 12 hodź.: Twarić a bydlić w měsće přichoda

Kak předstajimy sej přichod: bydlenja, drastu, žiwjenske wašnje, mobilitu, ludźi, přirodu a twarstwo? K tomu wopytamy wosebitu wustajeńcu a potym swójske kreatiwne ideje namolujemy abo paslimy sej naše měst(n)o přichoda. Wudźěłki so 08.09.2024 na Dnju wotewrjeneho pomnika w muzeju prezentuja. (staroba: wot 6 lět, płaćizna: 6 €)

09.07.2024 + 23.07.2024, 10 – 11.30 hodź.: Što nam wobrazy powědaja

Wupytamy sej w galeriji Serbskeho muzeja wuměłske twórby, kiž nas wosebje narěča. Ze zynkami a słowami wopisujemy a wotrysujemy wupytany wobraz. Štó z was ma najlěpšu stawiznu k swojemu wobrazej? (staroba: 5 lět, płaćizna: 4 €)

25.07.2024, 10 – 11.30 hodź.: Na slědach serbskich bajow

Tutón program wjedźe najprjedy přez stajnu wustajeńcu, w kotrejž móža šulerjo schowane bajowe figury nadeńć. K tomu předstaja so jednotliwe baje abo bajki. Potom smě kóždy swoju najlubšu figuru molować. (Staroba: 5 lět, płaćizna: 4 €)

 30.07.2024, 10 – 12 hodź.: Mosaikowe wobrazy

Chcemy wuknyć, kak hodźa so wšelakobarbne keramiske kamužki k dekoratiwnemu mustrej zestajeć abo kak wuhotuje so wobrazowy motiw. Štóž chce, njech tež wobraz jako mozaik sam moluje. (staroba: wot 5 lět, płaćizna: 6 €)

-> Přizjewjenja pod: ticket@sorbisches-museum.de abo 03591 270 870 0.

Na prěnim zjawnym předstajenju noweje wustajenskeje koncepcije za nowotwar Serbskeho muzeja wobdźěli so něhdźe 40 zajimcow w Serbskim domje. Jan Budar wot Załožby za serbski lud jako nošer projekta, dr. Ulrich Hermanns wot grafiskeje firmy Ausstellung Medien Transfer GmbH a Christina Boguszowa jako wjednica muzeja kaž tež dalši muzejownicy wopisachu prěnje ideje a dźěłowy staw. Nowa trajna wustajeńca njebudźe chronologiska, ale modularnje natwarjena. Temowe wobłuki zahaja so w přitomnosći, sahaja wróćo do zašłych lětstotkow a kónča zaso w přitomnosći. Namjet z publikuma, tež přichod zaplesć, muzejownicy rady přiwzaja. Wjele dobrych idejow a impulsow so na zjawnej diskusiji nahromadźi. Tež kritiske přispomnjena pomhaja dale koncepciju wuwić.

Załožba za serbski lud a Serbski muzej přeprošujetej wutrobnje wšitkich zajimcow, sej prěnje koncepcionelne ideje za nowu trajnu wustajeńcu Serbskeho muzeja w přichodnym „Serbskim forumje wědy na Lawskim arealu“ wobhladać. Předstaji so tuchwilny staw planowanja. Za koncepciju zamołwity wuhotowanski běrow Dr. Hermanns Ausstellung Medien Transfer GmbH zarjadowanje moderěruje. Dwě hłownej prašeni tworitej žro zarjadowanja: Kak rozdźěla so rumnosće a wustajenišća w nowotwarje a kotre inowacije na hosći noweho muzeja w přichodźe čakaja? Rady chcemy zajimcow do procesa wuwića zapřijeć a witamy swójske mysle a dodawki.

Zarjadowanje so tež přez livestream (Youtube-kanal Załožby) přenjese, direktny link namakaće sčasom na internetnej stronje stiftung.sorben.com.

termin: póndźelu, 24.06.2024 w 17 hodź. na žurli Serbskeho domu (Póstowe naměsto 2, Budyšin)

“Lejpold. Korčma při serbskim highwayju ”
Hižo přez 200 lět steji při dróze mjez Chróšćicami a Delanami něhdyši hosćenc. Mjez domoródnymi jako “Lejpold” znaty, liči k poslednim hišće zdźeržanym tykowanym domam. Ludźo chodźachu tam na piwo, towarstwa so zetkawachu a samo křćeńcy a kwasy so tu swjećachu. Jako swójbny statok běše we wobsydstwje swójby Opicec, pozdźišo Brankačkec a Šenkec. Wo stawiznach a namakankach za starymi murjemi rěči Daniela Heckowa, rodźena Šenkec.

„Twarski inženjer Eberhard Dučman

Mjez łužiskej drjewowej architekturu a industrielnym twarjenjom”

 Němsko-serbski twarski inženjer Eberhard Dučman ( 1926 – 2005) słuša k najwuznamnišim zastupjerjam industrielneho twarjenja a inženjerskotwarskeho wuměłstwa – nic jenož w architekturnym wuwiću w NDR, tak mjenowaneje wuchodneje moderny, ale tež w mjezynarodnym měritku. Wustajeńca je prěnja prezentacija jeho tworjenja a pokazuje w šěsć stacijach Dučmanowe projekty. Ekspozicija je zdobom wuraz připóznaća składnostnje 20. posmjertnin a 100. narodnin twarskeho inženjera, wysokošulskeho wučerja, slědźerja na polu twarstwa a hladarja pomnikow.

Přewodny program k wustajeńcy je mnohostronski. K wustajeńcy je w nakładnistwje LND kniha ze samsnym titulom wušła kiž je w muzeju na předań.

Kedźbu: Parkowanje na Hrodźe njeje móžne.

Pod hesłom “Muzeje z wjeselom wotkryć” móže so Serbski muzej njedźelu darmo wopytać.

Trajna wustajeńca k stawiznam, kulturje a rěči skića mnoho wotměny. W 15 hodź. poskićujemy wjedźenje. Dale so wšelake pućowace wustajeńcy muzeja skrótka předstajeja.

Na kuratorske wjedźenje po wustajeńcy “Jutry w Serbach & Kósktu dać” přeprošuje Serbski muzej zhromadnje z wuměłču Karoline Schneider, sobotu, 27. apryla w 16 hodź. Wustajeńca wěnuje so nałožkam a tradicijam Serbow wot zeleneho štwórtka hač k jutrońčce. Wosebitu kedźbnosć zasłuža sej dobyćerske kolekcije kóždolětneho wubědźowanja wo najrjeńše serbske jutrowne jejko. Nimo toho spomina so na serbskeho spisowaćela Bena Budarja z inscenaciju “Na křižerjach” Němsko-Serbskeho ludoweho dźiwadła Budyšin. Pod hesłom “kóstku dać” zaběra so wuměłča Karoline Schneider z wuznamom kawrijowych šlinkow za serbsku křižersku tradiciju a za kultury po wšěm swěće. Jeje wuměłske rozestajenje z tutej křižerskej debu a jeje symboliku zwjazuje wuměłča z feministiskimi refleksijemi.