Za čas nazymskich prózdnin poskićuje Serbski muzej wjacore programy. Młodym zajimcam předstaji so při dźěćacym wodźenju serbski rjek wosebiteje wustajeńcy „KRABAT. Muž. Mytos. Marka.”. Dalši poskitk pokaza dźěćace žiwjenje něhdy. W druhim prózdninskim tydźenju wobsteji hišće raz móžnosć, město Budyšin přez dyrdomdejske wodźenje zeznać.

Terminowa zestawa:

štwórtk, dnja 5.10.2017
10.00 hodź. wodźenje za dźěći „Krabat – Serbski kuzłar a rjek”

pjatk, dnja 6.10.2017
Dźěćatstwo něhdy
10.00 hodź. – serbsce
13.00 hodź. – němsce

wutora, dnja 10.10.2017
10.00 hodź. Dyrdomdejske wodźenje po měsće

štwórtk, dnja 12.10.2017
14.00 hodź. wodźenje za dźěći „Krabat – Serbski kuzłar a rjek”

Kónc tydźenja po prózdninach sćěhujetej dwě tohorunja zajimawej zarjadowani

Swójbny poskitk

Štóž ma wotpohlad sej trajacu dopomnjenku spaslić, móže to sobotu, dnja 14.10.2017 w dźěłarničce „Rjekojo z filca” wot 10.00 do 17.00 hodź. Pod nawodom Reginy Herrmannoweje so ručne klanki serbskich bajowych postawow pasla. Regina Herrmannowa je wuměłča, kotraž je jónkrótne figuriny za Serbski muzej w Budyšinje a za Serbski muzej w Choćebuzu wuhotowała.
Za wobdźělenje wza so materialny popłatk we wysokosći 5,00 € na wosobu. Wobmjezowanych městnow dla, prosymy wo přizjewjenje pod sekretariat@sorbisches-museum.de .

Sceniske wodźenje

Prěni z třoch krutych terminow za sceniske wodźenja je njedźelu, dnja 15.10.2017 w 15.00 hodź. Sceniske wodźenje? – Haj, so wě! Dieter Klimek, Wolfgang Kraus a Hans-Jürgen Schröter wustupuja w jich wotpowědnej roli jako Čorny Młynk, Krabat a Pisar a přewodźuja na zabawne wašnje po wustajeńcy. Přidatne wodźenja z Krabatom a Pisarjom hodźa so přez Serbski muzej knihować.

Runja Lutherowemu wuprajenju: „A bych-li wědźał, zo jutře swět zańdźe bych dźens hišće jabłučinku sadźił”, mějachmy w rumnosćach wosebiteje wustajeńcy k reformaciji štom nadźije stejo. Wjele dźěći a dorosćenych pjelnichu pilnje jón z „jabłukami”, na kotrež pisachu sony a přeća. Kotre přeća to běchu? Najwažniše do přichoda je drje wopytowarjam měr na swěće a strowota. Ale tež wosobinske cile a sony wokoło swójby, dźěła a swójskeho přichoda zaběraja ludźi. Nětko pyši štom dźěćacy kabinet, wšako je reformaciska wustajeńca so zakónčiła.

Druhi, mjeńši štomik nasta na projektnym dnju Ralbičanskeje Serbskeje wyšeje šule. Tež tu so šulerjo z reformaciju zaběrachu a korjenjam, zdónkej a krónje štoma mysle, přeća a wažne zakłady přirjadowachu. Přeja sebi mjez druhim, zo so naša Łužica zdźerži a Serbstwo wostanje. Tutym přećam so rady přizamknjemy!

Z jara poradźenej finisažu zakónčichmy njedźelu, dnja 27.8.2017 wustajeńcu “Pjeć lětstotkow. Serbja a reformacija”.
Zarjadowanski program k wustajeńcy wobsahowaše dźewjeć zjawnych zarjadowanjow,  tři přednoški a sydom zjawnych wodźenjow po wustajeńcy.
Mnoho šulskich a hortowych skupin je sej wustajeńcu wobhladało, zwjetša zwjazane z pedagogiskim poskitkom.
Staw wopytowarstwa leži pola něhdźe 5900 wopytowarjow. Za paralelnu wustajeńcu w Michałskej cyrkwi běchu tole 4800 wopytowarjow, to rěka wšo dohromady něhdźe 10700 wopytowarjow.
Wjeselimy so z wuspěšnej  wustajeńcu, kotraž je wulke mnóstwo ludźi na relewancu reformaciskeho hibanja za wuwiće serbskeho naroda skedźbniła.

Srjedu dnja 23.8.2017 w 19.00 hodź.

W lěće 1931 zwěsći zasłužbny serbski kulturnowědnik Ota Wićaz “Ochranowska Bratrowska Jednota je była studźeń najwjetšeho žohnowanja za naš lud. My Serbja dyrbimy Jednoće wěčnje dźakowni być.” Što pak Ota Wićaz ze “studnju žohnowanja” měni a za čo měli Serbja Bratskej Jednoće dźakowni być, na to chce serbskorěčny přednošk spytać wotmołwu dać.
(tekst: Lubina Malinkowa)

W „žnjenskim“ měsacu smědźa so přećeljo muzeja na wjacore zarjadowanja wjeselić. Při muzejowym kofeju srjedu, dnja 16.8.2017 w 15.00 hodź. rozprawja muzejowa wolontarka Mónika Ošikowa k temje „Burska zahroda něhdy a dźensa“.
W poslednim awgustowym tydźenju skedźbnja so hišće raz na so skónčacu reformacisku wustajeńcu.
Dr. Lubina Malinkowa rozprawja srjedu, dnja 23.7.2017 w 19.00 wo poćahach mjez Ochranowskej wosadu a Serbstwom.  Předstaja aktualne wuslědki swojeho slědźenja wosebje nastupajo wuwiće serbskeho šulstwa. Hodźinu do toho, we 18.00 hodź., poskići so wodźenje po wosebitej wustajeńcy.
Finisaža njedźelu, dnja 27.8.2017 wuhotuje so jako swójbne popołdnjo. Program započina so w 15.00 hodź. ze serbskorěčnym wodźenjom sperintendenta Jan Malink po wustajeńcy. 17.00 hodź. přizamkny so němskorěčne wodźenje.
Po tym sćěhuje literarno-hudźbny program lyrikarki Mirany Cyšcyneje a chóra „Budyšin“. W mjezyčasu  poskićimy kofej a tykanc.
A mjeztym zo so jedna wustajeńca swjatočnje skónči – dźěłamy z prócu na přichodnej!-> „KRABAT. Muž. Mytos. Marka“  

Za čas prózdnin čaka w muzeju  tu a tam Lucky Lutk na našich młodych wopytowarjow. Skići krótke informacije, ma prašenja a nadawki. Tak ma so w galeriji tworjaceho wuměłstwa wěsty wobraz mjez druhimi namakać. Hdyž so wšitke nadawki spjelnja, čaka na Was małka překwapjenka.

Štwórtk, dnja 6.7.2017 wotmě so prózdninski poskitk „Dyrdomdejske wjedźenje po měsće“. Naša bobrija je na wšelakich stacijach hódančka rozrisała a so wšelakim wužadanjam stajiła: dźěći třělachu kaž hober Sprjewnik, zapłaćichu při Młynskich wrotach „cło“ a twarjachu symboliski rěbl za Karaseka.

Tučasnje pokazuje so hóstna wustajeńca Serbskeho muzeja w Zapadnokašubskim muzeju w pólskim Bytowje z titulom „Serbja. Mały Lud. Bohata kultura. Die Sorben. Kleines Volk. Reiche Kultur.“ Předstajeja so serbske stawizny a moderna, kaž tradicije a drasty. Kooperaciski projekt mjez serbskim a kašubskim muzejom započinaše so hižo 2014 z wosebitej wustajeńcu ke Kašubam w Serbskim muzeju. Wot wotewrjenja wustajeńcy pjatk, dnja 16.6.2017 hač do kónca, njedźelu, dnja 15.10.2017 informuje ekspozicija wo dwurěčnej Hornjej  a Delnjej Łužicy. Tohorunja zajimawa je zapřijata pućowaca wustajeńca „Prjedy hač woteńdźeš – Bevor Du gehst“ z fotogafijemi Maćija Bulanka.

Za lětuše lěćne prózdniny ma Serbski muzej štyri programy na poskitku. Dźěći móža so na dyrdomdejskim wjedźenju po měsće wobdźělić abo na kreatiwnej dźěłarničce prózdninske dopomnjenki zhotowić. Dale poskićuje so kostimowa bajkaca hodźinka a program k wosebitej wustajeńcy „Zbóžny, štóž wěri“. Tam wupytaja sebi zajimcy bibliske hrónčko a k tomu rjanu paslenku zhotowja. Wězo móža dźěći tež nowu hru wuspytać.

Tuž wjeselimy so na prózdninski čas a na Waš wopyt!

Zarjadowanska brošura: -> link.

Nadrobniše informacije k poskitkam: …

1. „Zbóžny, štóž wěri“

Hdźe chowaja so bibliske hrónčka we wšědnej rěči? W ramiku reformaciskeje wustajeńcy zeznaja dźěći wobrazliwu rěč biblije, wupytaja sebi bibliski citat a jón kreatiwnje přesadźa. Nimo toho hraje so nowa zabawna hra ke kóstkowanju.

Čas : ca. 1,5 h                                           materialowe wudawki: 1€

terminy: 29.06.2017, 14.07.2017, 27.07.2017, přeco w 10 hodź.

2. Dyrdomdejske wjedźenje po měsće

Zeznaj město Budyšin na druhe wašnje! Wuhotowany z potajnej kartu, dyrbiš puće pytać, nadawki spjelnić a prašenja wotmołwić. Štó namaka tajny pokład?

čas: ca. 1,5 h                                            přeco w 10 hodź.

terminy: 06.07.2017, 25.07.2017, 02.08.2017

     3. Kostimowa bajkaca hodźinka

Chcemy někotre krótke serbske bajki a stawiznički nic jenož słyšeć, ale tež sobu wuhotować a hrać. Za to móže sebi kóžde dźěćo swójski kostim sobupřinjesć. Tak wulećimy sebi do raja sonow a bajkow!

čas: ca. 1 h                                                terminy: 27.06.2017, 12.07.2017, 19.07.2017

serbsce: 9.45 hodź.

němsce : 11 hodź.

    4. Kreatiwna dźěłarnička

Pisać, torhać, wutřihać abo sfałdować, lěpić a wumolować. Hač swójska ideja abo něšto přihotowane, wšitcy su witani tu w muzeju so wuspytać a něšto kreatiwneho zhotowić. Paslenki a molowanki móžeš sebi potom wězo sobu domoj wzać!

 čas: ca. 1 – 1,5 h                                      materialowe wudawki : 1€

terminy: 04.07.2017, 21.07.2017, přeco w 10 hodź.

Prosymy wo přizjewjenje: 03591/2708700, sekretariat@sorbisches-museum.de

Budyski hród je někak 540 km wot pólskeho Bytówa, w kotrymž nańdźeš Muzeum Zachodniokaszubskie [Zapadnokašubski muzej] zdaleny. Dnja, 13.6.2017 poda so dźěl našich kolegow z hóstnej wustajeńcu wo Serbach na tutón puć. W Bytówje ma so pjatk, dnja 16.6.2017 wustajeńca „Serbja.Mały lud. Bohata kultura. – Die Sorben. Kleines Volk. Reiche Kultur.“ wotewrić.

Do toho běše wot oktobra 2014 hač do februara 2015 pola nas w Budyšinje wustajeńca „Kašubojo. Ludowa skupina w Pólskej. Něhdy a dźensa“ widźeć, kotraž předstaješe narodnu mjeńšinu Kašubow ze sewjerneje Pólskeje. Za to so lětsa w kašubskim regionje Pólskeje žiwa kultura Serbow pokazuje. Přidatnje wustaji so fotografiske dźěło Maćija Bulanka „Prjedy hač woteńdźeš“. Jedna so tu wo portrety serbskich žonow, kotrež tehdy hišće wšědnje w serbskej drasće chodźachu.

Wustajeńca je wotewrjena hač do 15.10.2017.