Chcemy našim hosćom rjane adwentne dožiwjenje popřeć. Přeprošujemy Was tuž wutrobnje na naše swójbne popołdnjo dokoławokoło fotografije.

Wosebje w dohodownym času přeješ sej rjanu dopomnjenku na zhromadne swójbne dožiwjenje. Swójbny portret w ateljejowej kulisy by móhła tajka dopomnjenka być.

Składnostnje tučasneje wosebiteje wustajeńcy „Wotmolowane. – Mit Licht gemalt.“ wo tema zažneje fotografije w serbskimaj Łužicomaj, chcemy dobu, hdyž běše wopyt pola fotografa wosebitosć, wožiwjeć. Podajće so z nami na časowu jězbu k spočatkam fotografije.

Mjeztym, zo so Waš wobraz pola nas „wuwije“, móžeće z Wašimi dźěćimi kwizy wupjelnić a přichodny ramik za wobraz wupyšić. Wězo zmejemy tež přikusk a horce napoje za Was přihotowane.

Wjeselimy so na Wašu cyłu swójbu!

Hdy: Njedźelu, dnja 04.12.2016 15.00 – 18.00 hodź.

Hdźe: Serbski muzej, Hród 3

Zastup: dorosćeni 5 €, dźěći 2,50 €, swójbna karta 10 €

Tež přichodne lěto chcemy Was zaso na muzejowy kofej wutrobnje přeprosyć.

Po dołhej klawzurje, móžemy Wam za kapsnu protyku skónčnje terminowy přehlad dać:

29.03.2017, 10.05.2017, 09.08.2017 a 29.11.2017 přeco w 15.00 hodź. w muzejowym kabineće.

Lětsa wobsteji hišće móžnosć 30.11.2016 na muzejowy kofej k temje serbskich motiwach na pohladnicach přinc. Tohorunja w 15.00 hodź.

Wjeselimy so na Waš wopyt!

Prěni raz wěnuje Serbski muzej w Budyšinje wot 09.10.2016 hač do 01.03.2017 wosebitu wustajeńcu stawiznam fotografije we Łužicy a prašenju, hdy jewjachu so w fotografijach serbske elementy jako wotmolowanja hódny motiw. (Hlej: https://sorbisches-museum.de/?lang=wen)  K tomu přehladachu so we łužiskich archiwach a muzejach kaž tež pola priwatnych wosobow njesměrnje wjele originalnych fotografijow.

Wobsedźiće tež wy zajimawe historiske wobrazy z časoweje doby 1850 hač do 1930? Potom njedwělujće a poskićće tute Serbskemu muzejej za čas wustajeńcy abo jenož na wobmjezowanu chwilu! Za to stej dwě wosebitej sćěnje rezerwowanej. Prošu přizjewće so pola nas, zo bychmy motiwy wupytali.  Z tym móžeće přinošować, zo so wustajeńca stajnje znowa přeměnjuje. Stawizny su žiwe wot  žiweho kaž tež wot zachodneho wokomika; žadyn druhi medij njewujasni to tak jasnje kaž fotografija.

Dla wjacorych próstwow našeho “kruteho kruha” wopytowarjow smy so rozsudźili přichodny muzejowy kofej hižo na srjedu, dnja 30.11.16 w třoch přepołožić.

Tónraz je tema “„Postrow ze Serbow“ – Serbske motiwy na historiskich fotach a pohladnicach.

Přednošuje naša kuratorka Andrea Pawlikowa. Z organizatoriskich přičin prosymy po móžnosći wo přizjewjenje.

Štóž chce, smě rady tež swójske pohladnicy abo historiske fotografije ze serbskimi motiwami sobupřinjesć.

Wjeselimy so na Waš wopyt!

Lětsa je Josefine Falkenberg jedna z našich praktikantow. Wona přewjedźe swój štyridźenski praktikum w ramiku swojeho studija a zaběra so po nadrobnej rešerši z drastami zapadnych Słowjanjow w zažnym srjedźowěku kaž tež z hrodźišćemi a zasydlenjemi wokoło 11. a 12. lětstotka. K tomu zhotowi wona tež rysowanki a skicy. Wotmysł jeje dźěła budźe, wjedźenja za dźěći přez muzej bóle nazornje wuhotować. Knjeni Falkenberg studuje archeologiju grjekskeho, romskeho a bycantineskeho swěta kaž tež etnologiju (2 předmjetaj na Bachelor) na Georga-Augustowej-Uniwersiće w Göttingenje.

Prěni raz wěnuje Serbski muzej w Budyšinje wot 09.10.2016 hač do 01.03.2017 wosebitu wustajeńcu stawiznam fotografije we Łužicy a prašenju, hdy jewjachu so w fotografijach serbske elementy jako wotmolowanja hódny motiw. (Hlej: https://sorbisches-museum.de/?lang=wen)  K tomu přehladachu so we łužiskich archiwach a muzejach kaž tež pola priwatnych wosobow njesměrnje wjele originalnych fotografijow.

Wobsedźiće tež wy zajimawe historiske wobrazy z časoweje doby 1850 hač do 1930? Potom njedwělujće a poskićće tute Serbskemu muzejej za čas wustajeńcy abo jenož na wobmjezowanu chwilu! Za to stej dwě wosebitej sćěnje rezerwowanej. Prošu přizjewće so pola nas, zo bychmy motiwy wupytali.  Z tym móžeće přinošować, zo so wustajeńca stajnje znowa přeměnjuje. Stawizny su žiwe wot  žiweho kaž tež wot zachodneho wokomika; žadyn druhi medij njewujasni to tak jasnje kaž fotografija.

Přichodnu srjedu přeprošuje Serbski muzej wšěch zajimcow zaso na “Kofej w třoch”. Tema je tónraz njewšědny eksponat, kotryž chcemy Wam rady předstajić.

Naš restawrator knjez Bart budźe při tym ke konserwatoriskim aspektam rěčeć.

hdy: srjedu, dnja 07.09.2016

čas: w 15.00 hodź.

hdźe: Serbski muzej na Hrodźe 3, 2. poschod Muzejowy kabinet

Zastup 5 € na wosobu + 1,50 € za pohosćenje.

Z Wašim přizjewjenjom móžemy lěpje planować.

Serbski muzej wobdźěli so na lětušim dnju „Wotewrjeneho pomnika“ njedźelu, dnja 11.09.2016. Zastup do Serbskeho muzeja je na tutym dnju darmotny.

Předstajimy na tutym dnju projekt „Swědki stawiznow“ (djo-Deutsche Jugend in Europa.). Projektna skupina Budyskich šulerjow a maturantow, slědźeše pod nawodom Michaela Jemeljanowa k architektoniskim a stawizniskim pozadkam něhdyšeje Sólnicy, dźensnišeho Serbskeho muzeja. Wukony tuteje prócy pokazujemy na dnju „Wotewrjeneho pomnika“ jako mału wustajeńcu tu w domje.

Wustajeńca wobsteji z:

1. filmom wo stawiznach Serbskeho muzeja a serbskeje kultury, kotryž bu wuhotowany z pomocu 3D-technologije.
2. animaciskim filmom k projektnej iniciatiwy
3. prezantaciju wirtuelneje reality (VR) z wosebitymi 3D-nałočemi za wobhladowanje twarjenja Sólnicy, nětčiši Serbski muzej w 360°.
4. předstajenjom BIM (Building Information Modeling)-technologije z wužiwanjom nałočow za wirtualnu realitu. Z tutej techniku skići so wopytowarjam móžnosć wirtuelneho wopyta Serbskeho muzeja.
5. informaciskimi sćěnami k stawizniskim aspektam Serbskeho muzeja a serbskeje kultury.
6. modelom Serbskeho muzeja z papjery.

Projektowcy budu tu w domje za prašenja a jako rozkładowarjo přitomni.

Serbske jejko kontra “ajfon”

Serbski muzej a Spěchowanski kruh za serbske ludowe wuměłstwo přeprošujetej ludowych wuměłcow wšelakich spartow a kaž tež wšitkich zajimcow, wosebje młodźinu na rozmołwny wječor “Serbske ludowe wuměłstwo w 21.lětstotku?!” do muzeja na Budyskim hrodźe srjedu, 31.8.2016 w 19 hodź. Mjezdruhim dźe wo prašenje, hač ma naša tradicionelna serbska kultura woprawdźe šansu napřećo Pokémon Go a podobnym powabkam a kak móžeš młodu generaciju za nju zahorić. Tež nowe ideje a serbske inowatiwne wudźěłki su witane. Diskusija so přez słuchatka do němčiny přełoži. Moderaciju přewozmjetej Andrea Pawlikowa a Rejzka Wałdźic. We 18 hodź. je wjedźenje po wustajeńcy ”Pruhi, kruhi, třiróžki”.

Sobotu, 27.8.2016 wotměje so koncertny wječor z serbskim spěwowym poetom Berndom Pittkuningsom. Zastup je darmotny a žurla budźe wot 18.15 hodź. přistupna.

Spěwy Bernda Pittkuningsa wobjednawaja serbsku identitu mjez wšědnym dnjom a serbskej kulturu, němskim kubłanjom a cyrkwju, hórnistwom a turizmom.