„Mjez škitnym listom a swjećatkom – žohnowančka a přiwěrki“
Kofej w třoch, srjedu, dnja 7.3.2018
Kak přiwěrkojći běchu naši prjedownicy je prašenje, kotrež tematizuje so na „Kofeju w třoch” srjedu, 7. měrca w Budyskim Serbskim muzeju. Hač katolscy abo ewangelscy wěriwi, pola wobeju rozšěrichu so něhdy tak mjenowane njebjeske abo škitne listy, z ruku wotpisane abo ćišćane. Wosebje w časach wójny a nuzy sej je ludźo doma skradźu chowachu abo kaž amulet při sebi nošachu. Su pak tež druhe formy škitnych objektow, kotrež so zdźěla hač do dźensnišeho wužiwaja. Andrea Pawlikowa přeprošuje na lóštne popołdnjo, na kotrymž móžeja so po zwučenym wašnju tež swójske wěcy předstajić.
Dźěłarnička z Reginu Herrmann 17.2.18
Sobotu, dnja 17.02.2018 móža so dźěći a dorosćeni na dźěłarničce „Rjekojo z filca“ wobdźělić.
Pod nawodom knjenje Reginy Herrmannoweje zhotowiće w běhu soboty wot 10.00 – 17.00 hodź. swójskeho rjeka respektiwnje swójsku powěšćowu postawu jako ručnu klanku.
Regina Herrmannowa je diplomowa designerka z wosebitym zajimom za figuriny a bajkowe postawy. Pod jeje nawodom nastanu pyšne klanki. Přidatne wudawki nimo zastupa su 5,00 €.
Prosymy wo přizjewjenje. (https://sorbisches-museum.de/besucherservice/?lang=wen#kontakt )
Poskitki w zymskich prózdninach
Dźěćacy program
Zyma je jedyn wosebity počas. Pokazamy w programje „Zymske wjeselo“, kak dźěći před wjac hač sto lětami při sněhu a zmjerzku hejsowachu a kotre nałožki pěstowachu. Na wosebity wuběrk z “łubje” móžeće wćipni być: Kak drje su so tehdy na lodźe a w sněze pohibowali? Na kóncu rysujemy sej zymsku krajinu.
terminaj: srjedu 14.2.2018 w 10 hodź. a pjatk 23.2.2018 w 14 hodź.
Dźěłarnička
Na wosebitu dźěłarničku „Rjekojo z filca“ přeprošujemy sobotu, dnja 17.2. wot 10 do 17 hodź. Tu móžeće sej ručnu klanku zhromadnje z Reginu Herrmannowej zhotowić. Klanka móže być powědkowa abo bajkowa figura abo z fantazije nastata postawa. Poskitk je za dźěći a dorosćenych. Prosymy wo přizjewjenje.
Wudawki: 5,00 € nimo zastupa
WORKSHOP „move to move“ – Přizjewjenja su hišće móžne
„move to move
20. do 22. februara 2018
Kak nastanje siluetowy trikowy film?
Pod fachowym nawodom nawuknješ na 3-dnjowskej dźěłarničce, kak so figury pasla a kak so woni w filmje wožiwjeja, kak so zwuk natoči a so film zestaja.
Film „Mlada powěda – Jedyn dźeń před 1000 lětami“ pokaza so potom w nowej wosebitej wustajeńcy Serbskeho muzeja w Budyšinje!
Sy znajmjeńša 12 lět stara/stary a maš lóšt?
->Potom móžeš so rady přizjewić!
Kino w muzeju. Film „Krabat” (2008) sobotu, dnja 3.2.2018
Hdyž zastupiš do wotrjada wosebiteje wustajeńcy wuhladaš fascinowacu kulisu Čorneho młyna. Požčonka Krabatoweho młyna Čorny Chołmc z. t. je original z filma „Krabat” wot režisara Marka Kreuzpaintnera, kotryž běše w premjerowym lěće 2008 jako kinowy film dosć wuspěšny.
Sobotu, dnja 3.2.2018 pokazamy tutu hač dotal najnowšu adapciju Krabatoweje powěsće.
Film nasta zdźěla w Rumunskej a zdźěla w južnej Němskej.
Tež dźensa, dźesać lět po premjerje, wuwoła pak film hišće kopicu zaćišćow a měnjenjow pola přihladowarjow.
KRABAT-přednošk 17.1.2018 „Bajki jako žórło wědy“
Přichodnu srjedu, dnja 17.1.2018 w 19:00 hodź., skići Serbski muzej wšěm zajimcam Krabatoweje powěsće wosebitostku.
W zwisku z Krabatowej wustajeńcu přednošuje knjeni dr. Susanne Hozyna (Serbski Institut) pod titulom „Bajki jako žórło wědy. Powědančko wo kuzłarju a jeho šulerju“ . Přednošk dźerži so w serbskej rěči a so simultanje do němčiny přełožuje.
Hodźinu do toho, w 18:00 hodź., skići so wodźenje po wosebitej wustajeńcy „KRABAT. Muž. Mytos. Marka.“
Hdy: 17.1.2018
Čas: 19:00 hodź.
Hdźe: Serbski muzej, Budyšin, Hród 3
Zastup: 5 €.
Kak nastanje siluetowy trikowy film?
WORKSHOP
„move to move“
20.februar do 22. februara 2018
Kak nastanje siluetowy trikowy film?
Pod fachowym nawodom nawuknješ na 3-dnjowskej dźěłarničce, kak so figury pasla a kak so woni w filmje wožiwjeja, kak so zwuk natoči a so film zestaja.
Film „Mlada powěda – Jedyn dźeń před 1000 lětami“ pokaza so potom w nowej wosebitej wustajeńcy Serbskeho muzeja w Budyšinje!
Sy znajmjeńša 12 lět stara/stary a maš lóšt? Zapisaj-> so do lisćiny!
Lětuša hodowna karta
Nětko w času do hód a po hodźoch namakaš w muzeju wotpowědnje jendotliwym woknam w adwentnym kalendru małke wot 1 do 24 čisłowane pakćiki z hodownymi zapřijećemi w serbšćinje a němčinje. Na kóncu rozrisaš z kóždej wotmołwu kwiz.
Wot samo k Wam přińdu kaž kóžde lěto postrowy Serbskeho muzeja! Lětsa přez swěrneho jěcharja pod hwězdami kotryž postrowy Serbskeho muzeja do ludźi roznošuje. Přejemy Wam žohnowane hody a strowe nowe lěto!
Swójbne popołdnjo a adwentnička
Serbski muzej přeprošuje cyle wutrobnje, sobotu, dnja 16.decembra 2018 w 15.00 hodź. na swójbne popołdnjo. Chcemy zhromadnje ze spěwami, basnjemi a bajkami adwentny čas swječić. Nimo paslenja postaramy so wo swačinu. Tež z překwapjenku smědźa wšě dźěći ličić.
Wosebitej hosćej budźetaj Lydija Maćijowa za hudźbu a Štefan Paška jako powědar. Wjeselimy so na Was!
Pismo w Krabatowej wustajeńcy
Druhdy su podrjadowane dźěle jedneje wustajeńcy za sebje dosć zajimawe. Někotřim je snano hižo elegantne a přijomne pismo we wustajeńcy a we wustajenskim katalogu nadpadnyło. Druhzy tajke aspekty pře-widźa.
Byšće wěrili, zo pochadźa wone pismo z doby Johanna von Schadowitza?
Wunamakar a rězbar pismikoweho składa, madźar Miklós Kis, narodźi so 1650 w Misztótfalu w dźensnišej Rumunskej. Tehdom běše Johann von Schadowitz 26 lět stary. Prěnjotnje jako wučer skutkowacy Kis chcyše w Amsterdamje teologiju studować a so hakle přez nadawk, ćišć madźarskeje Biblije dohladować, k ćišćerstwu namakaše.
Pismikowy skład Kisa słuša k Antiqua-pismam, kotrež so přež kulowate łuki (Bögen) charakterizuja a so na antiknych přikładach wusměrjeja, na rozdźěl z “łamanymi” pismami kaž Šwabachskim abo Fraktur-pismom.
Kisowe Antiqua-pismo hodźi so za diakritiske znamjenja, kaž je w madźarskim a słowjanskim pismowstwje namakaš. Po nawróče z Nižozemskeje dźěłaše Kis w Klausenburgu, madźarsce Kolozsvár a w dźensnišej Rumunskej Cluj-Napoca, hdźěz w lěće 1702 zemrě.
Najdlěši čas běše jeho pismikowy skład z jeho wobdźěłanymi formami pod mjenom Janson znaty.
(Za dalečitanje hlejće n.př. http://www.typografie.info/3/artikel.htm/wissen/janson-antiqua-kis)
To rěka, hdyž Wy našu wustajeńcu wopytaće abo we wustajeńskim katalogu čitaće, Was tež pismo knihi do časa von Schadowitza zanjese.
Dźakujemy so designowej agentury logoform za tute typografiske doporučenje.