Sobotu, dnja 29. meje kaž tež njedźelu, 30. meje so wotewrjenski čas wo hodźinu podlěši. Wot 10 do 19 hodź. móže so po knihowanju termina muzej wopytać. Wjedźenja we wosebitej wustajeńcy „Barby daliny. Moler Ante Trstenjak a Łužiscy Serbja“ so takle přewjedu:

• 29.5.2021: 10 hodź. swójbne wjedźenje, 15 hodź. kuratorske wjedźenje w němskej rěči, 16 hodź. kuratorske wjedźenje w serbskej rěči. Po přizjewjenju a wobmjezowanje na 10 wosobow. Liča so dorosćeni kaž tež dźěći.
• 30.5.2021: 14 hodź. swójbne wjedźenje, 15 hodź. kuratorske wjedźenje w němskej rěči, 16 hodź. kuratorske wjedźenje w serbskej rěči. Po přizjewjenju a wobmjezowanje na 10 wosobow. Liča so dorosćeni kaž tež dźěći.

Serbskej wustajeńcy w Libercu

Wustajeńca “Lužičtí Srbové, neznámí sousedé / Łužiscy Serbja, njeznaći susodźa” so wot 3.5.2021 do 28.5.2021 w Regionalnej wědomostnej bibliotece w Libercu pokazuje. Na iniciatiwu towarstwa Societas Amicuum Liberec (SAL) zestaji Serbski muzej tutu prezentaciju, kotruž towarstwo w susodnym kraju natwari. Postrowne słowa a wotewrjenske zarjadowanje su na YouTube wozjewjene. Z pomocu srědkow Němsko-Čěskeho fonda přichoda wuńdźe specielna publikacija k wustajeńcy. W zwisku z prezentaciju so tři přednoški online poskićeja.

W Liberecu pokazuje so tuchwilu we wobłuku Serbskeho lěta tež personalna wustajeńca wuměłče Maje Nageloweje “na okraji- na kromje” w Galerie Lázně, kiž bu hač do kónca meje podlěšena.

Wobě zarjadnišći stej zaso normalnje přistupnej. Dalše informacije pod www.salliberec.cz

Nadawki w Zarjedźe za wokrjesne wuwiće/w Serbskim muzeju

• wědomostne slědźerske dźěło we wobłuku serbskich kulturnych stawiznow
• fachowědomostne wudźěłanje wustajenskich koncepcijow a publikacijow
• wědomostna dokumentacija a techniska systematizacija muzejoweho wobstatka přez
• inwentarizaciju a archiwizowanje
• zjawnostne dźěło a kulturne sposrědkowanje přez wjedźenja, přednoški a prezentacije
• na projekty poćahowane sobudźěło we wobłuku muzejoweje pedagogiki

Požadanski čas kónči so 07.04.2021.

Wupisanje dźěłoweho městna: wolontariat kulturne stawizny 2021

Po informacijach zamołwiteje za projekty Spěchowanskeho kruha za serbsku ludowu kulturu, Weroniki Suchoweje, je so lětsa 37 zapodarjow z 67 kolekcijemi na wubědźowanju dorosćenych wo najrjeńše jutrowne jejko 2021 wobdźěliło. Na žurli Serbskeho domu w Budyšinje je jury wo prěnich městnach w šěsć kategorijach rozsudźiła.

Babette Zenkerowa (Dolna Łužyca), Wolfgang Kotissek (Slepjanski region), Jěwa-Marja Čornakec (Hornja Łužica) běchu lětuši čłonojo juryje.

Hač do kónc meje so dobyćerske kolekcije w kabineće Serbskeho muzeja prezentuja.

(* 11.9.1928 –  † 20.12.2020)

Serbski muzej žaruje wo nestorku serbskeho tworjaceho wuměłstwa Wóršu Lanzynu, kotraž zemrě 92lětna krótko do hód 2020.

Kreatiwnosć a tworićelske dźěło woznamjenitej za wuměłču tajke něšto kaž domizna, zwučeny teren, na kotrymž čuješe so wěsta, trjebana a wužadana.

Wórša Lanzyna čerpaše z bohatstwa słowjanskeje a serbskeje ludoweje kultury a ornamentiki. Wuchadźejo z toho wuwi cyle swójski barbypołny, zmysłojty a bujno-žiwy wuměłski rukopis. Za wšěm jeje wuměłskim skutkowanjom steješe radosć tworjenja a wjeselo nad fabulěrowanjom ju wobdawaceho žiwjenja. Žanry nałožowaneho wuměłstwa, w kotrychž je so Wórša Lanzyna pohibowała, so mjez sobu wudospołnjeja: ilustratiwnje powědajo formowaše figuralnoreliefowu keramiku, plakaty a knižne wuhotowanje wotbłyšćuja zajimawe rozrisanja z pomocu kaligrafije. W brilantnym wobknježenju wuměłskeho pisma ležeše drje wosebita sylnosć wuměłče, čehož wuraz su mnoho wuznamjenjenjow a připóznaćow na narodnej a mjezynarodnej runinje. Njeličomnym knižnym produkcijam spožči wobličo, kotrež wotbłyšćowaše princip jeje  tworićelskeho stila – zasadźowaše najwšelakoriše warianty pisma jako sposrědkowacy srědk, wědźo, zo zamóža typy runja wobrazam naladu, napjatosć abo harmoniju wuwołać.

Jako najkompleksniše wužadanje začuwaše Wórša Lanzyna nimo cyłografiskeho wupyšenja festiwalow serbskeje kultury, wuhotowanje serbskich folklornych hosćencow, zjaw, kiž ležeše wot kónca 1960tych lět sem w trenće časa. Tak nastachu pod jeje nawodom, charakteristiske hosćency kaž “Wódny muž” w Malešecach, “Hospoda” w Załomju, “Słónco” w Choćebuzu a klubowy hosćenc SLA “Wjelbik” w Budyšinje.

Zhromadnje ze swojim mandźelskim Steffenom Langu (1931–2006) zwjazowaše jeju najebać wobchowanja swójskeho wuměłskeho rukopisa a indiwidualneho charaktera jeju wuměłskeho wuwića, so wudospołnjace, płódne zhromadne tworićelske dźěło za Łužicu.

(fotografija: Jürgen Maćij, 1988)

Srjedu, dnja 14.10.2020, přeprošujemy we 18 hodź. na wjedźenje po wosebitej wustajeńcy “Barby daliny. Moler Ante Trstenjak a Łužiscy Serbja“.

Prizamknje so w 19 hodź. serbski přednošk Jurja Łušćanskeho „Moja zaběra z Ante Trstenjakom“ ( ze simultanym přełožkom).

foto: Ante Trstenjak, Serbski institut

Sobotu, dnja 24.10. 2020, poskići so wot 10-16 hodź. dźěłarnička “Zakłady akwarela”. Wuměłča Isa Bryccyna předstaji zakłady molowanskeje techniki, kotrež so při wšelakich zwučowanjach nałožuja. Materialije so k dispoziciji staja. Za dorosćenych a dźěći wot 12 lět, přinošk: 15 €, potuńšene: 10 €

Přizjewjenje pod: 03591/270 870 0 abo sekretariat@sorbisches-museum.de

Wosebita wustajeńca “Barby daliny. Moler Ante Trstenjak a Łužiscy Serbja” je za zjawnosć na dnju wotewrjenja njedźelu, dnja 20.9.2020, wot 17:30 hodź. do 19 hodź. přistupna.

Prosymy wo přizjewjenje pod 03591 270 8700 abo sekretariat@sorbisches-museum.de za wopyt wustajeńcy w časach 17:30 hodź., 18 hodź. abo 18:30 hodź. Skupinska wulkosć je na 20 wosobow wobmjezowana. Zastup je darmotny.

Pišćelowa kniha k “Spěwawa Jězußowa Wincza”

W zběrce Serbskeho muzeja je rukopisna pišćelowa kniha k hłosami kěrlušow kancionala “Spěwawa Jězußowa Wincza” z pjera Budyskeho tachanta Michała Jana Wałdy (1721-1794). Rěči so wo trajacym woznamje za stawizny serbskeho katolskeho cyrkwinskeho spěwa.

referent: Alexander Pólk

płaćizna: 4,50 € inkl. kofej a tykanc

Přizjewjenje pod: 03591/270 870 0 abo sekretariat@sorbisches-museum.de

„Sólnica – Sudnistwo – Serbski muzej“

Serbski muzej wotkryje stawizny domu! Wot 1782 hač do dźensnišeho wotbłyšćuja so funkcije sólnicy, sudnistwa a muzeja we wšelakich detailach.

Zastup bjezpłatny