Uncategorized

SORBIAN STREET STYLE wot 1. februara 2019 do 31. meje 2019

Wubědźowanje SORBIAN STREET STYLE wupisa wot 1. februara Ludowa banka Drježdźany-Budyšin w kooperaciji ze Serbskim muzejom w Budyšinje a ze zarjadnišćom KREATIWNA SAKSKA, Sakskim centrumom za kulturne a kreatiwne hospodarstwo.  Namołwjeni su młodźi studowacy modowi designerojo a designerki, wuměłcy a wuměłče, mišterscy šulerjo a šulerki, wosebje w zakónčacych lětnikach kaž tež  profesionalnje skutkowacy w starobje mjez 18 do 35 lět. Wubědźowanje je wusměrjene na wuwiće łužiskospecisfiskeho modoweho a tekstilneho designa z hospodarskim potencialom na zakładźe tradicionelnych serbskich regionalnych drastow a łužiskeho ludoweho wuměłstwa, jich charakteristiki, materiala, technikow, barbow, přitřihow a accessoirow. Zapodać móžeja so jednotliwe produkty kaž tež kolekcije wot jednotliwcow abo dźěłowych skupin. Dobyćerjam kiwa nahladne pjenježne myto za produkciju swojich kreacijow a zmóžni so prezentacija we wustajeńcy SORBIAN STREET STYLE a w katalogu wot 22.septembra. Posledni termin wotedaća je 31.meja 2019.

Dalše informacije a download pod:

SorbianStreetStyle_Wubědźowanje

SorbianStreetStyle_Přizjewjenje

SorbianStreetStyle_Jury

Serbski muzej přeje wjele wjesela a wuspěcha!

Ja – wuměłc! Kreatiwnje přeměnjene wuměłstwo

19.2.19 a  28.2.19             10 hodź.

W galeriji wupytaš sej wobraz, kiž potom z mnoho fantaziju přeměniš. Wot A kaž app do Ž kaž žaba- tak nastanje twój moderny abo po počasu interpretowany wobraz.

Stary lud – Dyrdomdej w srjedźowěku

21.2.19 a 26.2.19              10 hodź.

Zeznajemy žiwjenje Łužičanow a Milčanow, kiž so před wjac hač 1000 lětami we Łužicy zasydlichu. Dopomnjenki sej w kožanym měšku sobu domoj wozmjemy.

(material: 1 €)

čas: 1-1,5 h                 płaćizny: 2,50 €                přizjewjenje: tel. 03591/2708700, sekretariat@sorbisches-museum.de

Njedźelu, dnja 20.1.2019 witamy wšitkich wot 13 do 18 hodź. na srjedźowěkowske zarjadowanje. Z rjemjesłom, hudźbu a dalšimi překwapjenkami chcemy stary čas wožiwjeć. Tak móžeće słowjanski srjedźowěk ze wšěmi zmysłami dožiwić. Kak so naši prjedownicy drasćachu a kak běchu před wjac hač 1200 lětami žiwi? Što sydaše k snědani abo k wobjedu? Štó zadźěła kak woheń? Wšo to a wjele wjac so pokaza ze žiwjenja Łužičanow a Milčanow! Tuž podajće so z nami na wosebite swójbne popołdnjo do zašłosće!

Srjedu, dnja 28.11.2018 we 18 hodź. přeprošuje kuratorka Andrea Pawlikowa do wosebiteje wustajeńcu „Stary lud. Ze žiwjenja Łužičanow a Milčanow”. Podamy so na slědy našich prjedownikow, kotrež so něhdźe 700 po Chr. we Łužicy zasydlichu. Wustajene su něhdźe 400 wurywankow, rekonstrukcijow a předstajenjow słowjanskeho žiwjenja před wjac hač 1000 lětami.

Přizamknje so w 19 hodź. přednošk dr. Tomasa Westphalena, wjednika wotdźěla za hladanje archeologiskich pomnikow při krajnym zarjedźe za archeologiju Sakskeje, k temje „Budyšin w 10. a 11. lětstotku“. Dr. Westphalen rěči wo Budyskim měrje, kiž so w lěće 1018 w Budyšinje mjez Bolesławom Chrobłym a Heindrichom II. wujedna. Tež aktualne archeologiske wurywanja wokoło hrodu Ortenburg so wopisuja. Přednošk je w žurli muzeja.

Im 11. Jahrhundert war das Plateau der späteren Ortenburg das Zentrum des Milzenerlandes. Unterhalb fanden sich Hinweise auf eine dichte Bebauung. (Foto: Landesamt für Archäologie Sachsen)

Srjedu, dnja 5.12.2018 w 15 hodź. wotměła so dalši KOFEJ W TŘOCH. Składnostnje wosebiteje wustajeńcy přednošuje Werner Měškank z tamnišeho Serbskeho muzeja w Choćebuzu wo „Słowjanskich slědach we Wendlandźe a w něhdyšim kraju Obodritow“.

Ja rěkam Rebecca Wöppelowa a wopytach Serbski gymnazij w Budyšinje. Po maturje studowach w  Heidelbergu stawizny. Nětko sym nowa wolontarka w Serbskim muzeju a so jara wjeselu, zo sym zaso w domiznje.

Ja rěkam Maurice Effenberger a sym 16 lět stary. Moje realnošulske zakónčenje złožich na Serbskej wyšej šuli w Budyšinje. Tučasnje wopytam Powołanski šulski centrum (BSZ) w Kamjencu, tam chcu 2020 moju maturu zakónčić. Jako praktikant w Serbskim muzeju inwentarizuju na přikład historiske wobrazy a druhe wažne dokumenty.

8.9.2018               10 – 17 hodź.  

Dźěłarnička „ Bohowki do kapsy“

Na dźěłarničce móže so z tróšku wušiknosću mała škitna postawa – bohowka do kapsy zhotowić. Je to dobra móžnosć, wuměłču zeznać a sej mały jónkrótny dar zhotowić. Knjeni Herrmannowa poskići tež někotre figury na předań. Čas za zhotowjenje je fleksibelny. Městna su na 10 wosobow wot 14 lět wobmjezowane, přizjewjenja su hišće móžne! Přidatne wudawki nimo zastupa su 5,00 €.

9.9.2018               10 -18 hodź.

Dźeń wotewrjeneho pomnika, zastup bjezpłatny

11/15 hodź. Wodźenje po wosebitej wustajeńcy “Dźěl wote mnje” z wuměłču Reginu Herrmann. Při wodźenju rěči designerka wo dźěłowym stilu a kotre mysle, začuća a mytiki so w skulpturach a powědkowych postawach chowaja.

Dale stej na žurli dalšej wustajeńcy přihotowanej. Numismatikarjo pokazaja wuběrk medaljow a pjenjez. Składnostnje “1000 lět Budyski měr” je tež wosebita wobrazowa a medijowa prezentacija Kamjentneho domu w muzeju přihotowana.

„Žónske wobliča – wubrane podobizny z wuměłskeje zběrki Serbskeho muzeja“ dnja 26.9.2018 w 15 hodź.

Zběrka wuměłstwa Serbskeho muzeja wobsahuje něhdźe 6.900 eksponatow. Z tutoho wobstatka předstaja so žónske portrety a jich wosobinska stawizna.

přednošuje: Christina Boguszowa, direktorka

płaćizna: 4,50 € inkl. kofej a tykanc

Pjatk, dnja 31.8.2018 w 16 hodź.

wotewrětej Towarstwo filatelistow z.t. kaž tež Towarstwo numismatikarjow w Budyšinje zhromadnje ze Serbskim muzejom wustajeńcy k temje

Póstowe stawizny w serbskej Hornjej a Delnjej Łužicy. Ze zběrki dr. Waltera Raucha

Wustajeńca wěnuje so dwurěčnej Łužicy z motiwami wot srjedźowěka hač do přitomnosće.

1000 lět Budyski měr – 50 lět Towarstwo numismatikarjow w Budyšinje z.t.

Tu wustajena zběrka pjenjez wěnuje so temje Budyski měr z lěta 1018. Dalše eksponaty skedźbnjeja na měry wšelakich lětstotkow hač do dźensnišeho. Tež towarstwowe žiwjenje so prezentuje.

(zastup je bjezpłatny)

1.9. a 2.9.2018

WODŹENJA

11/17 hodź.     stajna wustajeńca

15 hodź.           wosebita wustajeńca: Dźěl wote mnje. Skulptury a klanki Reginy Herrmann

WOSEBITE WUSTAJEŃCY

– Dźěl wote mnje. Skulptury a klanki Reginy Herrmann

– Póstowe stawizny w serbskej Hornjej a Delnjej Łužicy. Ze zběrki dr. Waltera Raucha

– 1000 lět Budyski měr – 50 lět Towarstwo numismatikarjow w Budyšinje z.t.

Wosebita wustajeńca “Dźěl wote mnje. Skulptury a klanki Reginy Herrmann” wotewrě so njedźelu, dnja 19.8.2018 w 15 hodź. a bu hudźbnje wobrubjena wot budyskeho Trio con moto, zastup je bjezpłatny.

Wustajeńca tradiciju wuskeje zwjazanosće wuměłče ze Serbskim muzejom pokročuje. Je nam wěc wutroby, zo na Reginu Herrmann z jubilejnej wustajeńcu składnostnje jeje 70. narodnin wosebje skedźbnimy, jeje žiwjenski skutk hódnoćimy. W swěće swojich myslow pućuje Regina Herrmann přez časy, kultury a nabožiny, štož jej inspiraciju za tworjenje skića. Z tutoho duchowneho rozestajenja sem je ansambl njeličomnych twórbow, skulpturow a klankow stworiła. Swojim postawam daruje čwak swojeje duše, přetož kóžda z nich je dźěl wot njeje.

K wosebitej wustajeńcy wuńdźe katalog, kiž w muzeju na předań předleži. (9,90 €, na dnju wotewrjenja wustajeńcy 7,00 €)