30.08.2023 Knižne předstajenje “Maria Grollmuß (1896-1944). Biografische Annäherung und Erinnerungsnarrative”
Serbski institut přeprošuje zhromadnje ze Załožbu Sakske wopomnišća/Wopomnišćo Budyšin a Serbskim muzejom wutrobnje na moderěrowane knižne předstajenje srjedu, dnja 30. awgusta 2023 w Serbskim muzeju:
Awtorka Birgit Sack (Załožba Sakske wopomnišća) předstaji w rozmołwje z Jessicu Bock (Digitalny němski žónski archiw) swoju nowu knihu wo Mari Grólmusec (1896-1944). W njej wopisuje wotměnjawy žiwjenski puć intelektualneje w Němskej 1920tych a 30tych lět. Na zakładźe wobšěrnych rešeršow přirunuje awtorka tež přećiwne posthume stilizowanje Marje Grólmusec ke katolskej martrarce, serbskej patriotce, socialistiskej wojowarce a zakitowarce žónskeje emancipacije kritisce z wobchowanymi žórłami. (Kniha je wušła w Wallsteinowym nakładnistwje.)
Do prezentacije 18:00 hodź. poskića Serbski muzej kuratorske wjedźenje po wosebitej wustajeńcy “Čej’ da sy? Wurzeln im Wandel”. Knižne předstajenje započina so w 19:00 hodź.
Wo awtorce:
Birgit Sack je historikarka a nawjeduje Wopomnišćo Mnichowske naměsto w Drježdźanach při Załožbje Sakske wopomnišća. K jeje slědźerskim ćežišćam liča spjećowanje a justicielne přesćěhowanje w nacionalsocializmje, žónske a splažne stawizny kaž tež politiski katolicizm we Weimarskej republice. Dr. Birgit Sack je jako PostDoc-stipendiatka w Serbskim instituće (1995-1997) započała z rešeršemi wo žiwjenju Marje Grólmusec a reflektowanju wo tym w regionalnej pomjatnej kulturje. Wot toho časa sem je swoje přepytowanja wobstajnje wudospołniła a wuhódnoćiła. W měrcu 2023 je wobšěrna biografija wo Mari Grólmusec w nakładnistwje Wallstein w Göttingenje wušła.
Wo moderatorce:
Dr. Jessica Bock studowaše srjedźne a nowše stawizny na Lipšćanskej uniwersiće. Ze stipendijom Zwjazkoweje załožby k předźěłanju SED-diktatury promowowaše na temu “Žónske hibanje we wuchodnej Němskej. Zběhnjenje – rewolta – transformacija w Lipsku 1980-2000”. Za swoju disertaciju, kotraž wuńdźe w lěće 2020 w nakładnistwje Mitteldeutscher Verlag, dósta w lěće 2019 disertaciske myto GenderConceptGroup Techniskeje uniwersity w Drježdźanach. Wot 2016 je Jessica Bock wědomostna sobudźěłaćerka při Digitalnym němskim žónskim archiwje. Tuchwilu zdźěłuje w nadawku towarstwa “Weiterdenken – Heinrich Böll Stiftung Sachsen” brošurku wo přetorhnjenju samodruhosće w Sakskej mjez 1945 a 1989/90.
Dar historiskeho pućowanskeho pasa
Sobudźěłaćerjo Serbskeho muzeja wjesela so jara nad najnowšim eksponatom. Jedna so wo originalny pućowanski pas k wupućowanju do Texasa w Americe z lěta 1854. 44lětny ratar Jakub Pampel z Noweje Wjeski pola Hućiny měješe wotmysł domiznu wopušćić. Z hišće njeznatych přičin wón tola njewupućowaše, tak zwosta pas w swójbnym wobsydstwje. Dźakujemy so darićelej Theodorej Henselej ze Zubornički wutrobnje za přepodaće derje zdźeržaneho pućowanskeho pasa za našu zběrku. Nětko móže so z rešeršu k objektowym stawiznam započinać, zo bychu so dalše informacije k wosobje a tehdyšim wobstejnosćam namakali. Na foće přepoda swójba Hensel pućowanski pas muzeologoce Iloni Bierlingowej.
14.6.2023 w 15 hodź.: Kofej w třoch – Składowanje, naslědnosć a regionalne produkty
“Sušić, naselić, zawarić. Składowanje w burskim hospodarstwje.”
15 hodź. přednošk: Andrea Pawlikowa
16 hodź.: přednošk wo zežiwjenju, referantka: Silvia Melde wot Přetrjebowarskeho centruma Budyšin
18.6.2023: Wotewrjenje pućowaceje wustajeńcy PRISMA
Wotewrjenje pućowaceje wustajeńcy “PRISMA. Žiwjenje při Klóšterskej wodźe” na Klóšterskim a swójbnym swjedźenju w Pančicach-Kukowje składnostnje 775. róčnicy załoženja klóštra Marijina hwězda.
hdy: njedźelu, 18.6.2023 w 15 hodź.
7. junija wot 18 hodź.: Kuratorkske wjedźenje a filmowy wječor z přednoškom a diskusiju
- 18 hodź.: kuratorkske wjedźenje
- 19 hodź.: filmowy wječor, přednošk, diskusija
Serbski katolski miljej – kak dale?
“Ta naša serbska katolska Łužica. Budźa te ludźo to hač do kónca zdźeržeć?” praša so Marta Markowa w dokumentaciji „Čej’ da sy?”. Filmowc Reiner Nagel je w nadawku Serbskeho muzeja a zhromadnje z nim w koronalěće 2021 interviewy natočił, z kotrychž bu krótki film zestajeny. Dalši nazhonići Serbja – ratar, rjemjeslnik, drastynošerka, wučer a dekan jimaja so słowa. Jim napřećo staji so młody wuhlad krótkofilma „SMY” Sofije Cyžec a Luizy Nawkec. Na wječornym zarjadowanju Serbskeho muzeja srjedu, 7. junija w 19 hodź. je składnosć, za wotmołwami zhromadnje pytać. Po wurězkach z filmow, kotrež pokazuja so tež we wosebitej wustajeńcy, hdźež je we 18 hodź. wjedźenje, slěduje přednošk „Serbski katolski miljej – kak dale?” dr. Měrćina Wałdy. Zajimawe je prašenje, što rozeznawa cyrkej w socializmje porno dźensnišej? Pod hesłom „Łužica 2050” je gymnaziast situaciju zjimał: „Tež našu nabožinu widźu wohroženu. Widźomne je hižo nětko, zo ludźo, wosebje młodźi, z cyrkwje wustupja. Ličba kemšerjow lěto wob lěto spaduje … Myslu sej, zo budu naše serbske wosady zjednoćene a horstka wěriwych Serbow swjeći Božu mšu zhromadnje w jeničkej cyrkwi.”
10. junija w 10 hodź.: Z kolesom po serbskej katolskej kónčinje – tura 1
Na štyrjoch wšelakich turach chcemy sej zhromadnje serbsku katolsku kónčinu z kolesom wotkryć. Pod nawodom Tadeja Šimana njewopytamy jenož wšitke wosadne wsy, ale tež najwažniše stawizniske, kulturne a krajinowe zajimawostki. Prošu dźiwajće na fungowace kolesowotpowěduwacu drastu a škitny nahłownik. Prosymy tež wšitkich wobdźělnikow, sej jědź a pićo sobu wzać. Přizjewjenja su móžne pod ticket@sorbisches-museum.de abo 03591/2708700. Wšitcy wobdźělnicy rukuja priwatnje, wobdźělenje je darmotne.
Tura 1: “Klóšterski kraj – serbski raj”
Sobotu, 10. junija wjedźe nas něhdźe 22 km dołha tura pod hesłom “Klóšterski kraj – serbski raj” přez južnu kónčinu serbskeho katolskeho swěta. Startujo w 10 hodź. na parkowanišću při awtodróze A4 w Hornim Wujězdźe podamy so na puć k 3000 lět staremu Wotrowskemu hrodźišću a wot tam dale do Pančic ke klóštrej Marijina hwězda. Přez Kukow, ródnu wjes wuznamneho serbskeho basnika Jakuba Barta-Ćišinskeho, jědźemy do Chrósćic a dale na Kopšinjanske hrodźišćo, kotrež bě něhdy srjedźišćo słowjanskeho kmjena Milčanow. Wot tam podamy so na wróćopuć do Hornjeho Wujězda.
zetkanje: 10 hodź. na parkowanišću při awtodróze A4 w Hornim Wujězdźe
3.6.2023 wot 18-23 hodź. “Dołha nóc kultury”
- 18.30 hodź.; 20 hodź.; 21.30 hodź.: wjedźenja we wosebitej wustajeńcy “Čej´da sy?” z Andreju Pawlikowej
- paslenski poskitk za dźěći w kabineće
- filmowy loop a prezentacija dźěłarnički na žurli
3.6.2023: Dźěłarnička “Na(po)hlady”
Sy bóle romantikar abo žortny typ? Sobotu 3.junija přeprošuje Serbski muzej na dźěłarničku z wuměłču Maju Nagelowej a grafikarjom Štefanom Hanušom. Mjeztym zo so nawuknješ pod nawodom Štefana Hanuša, kak problemy na žortne a šćipate wašnje z karikaturami rozrisaš, wěnuje so Maja Nagelowa po přikładźe dwěsćě lět stareje sćěny wokoło chorołoža z Chrósćic, kiž namakaš w aktualnej wustajeńcy „Čej da sy?“, prašenju, kak móžeš na moderne wašnje swoju dušu hojić přez pomolowanje parawenta/sćěny z mandala abo krajinu jako estetiski změrowacy element. Waše wuslědki móža być za swójsku stwu doma, młodźinski klub atd. Dajće so překwapić a čińće sobu!
Za wšitkich zajimcow wot 12 lět kaž tež za dorosćenych. Popłatk za kurs su 10 €, přizjewjenje pod ticket@sorbisches-museum.de abo 03591 270 870 0.
21.05.2023: Mjezynarodny dźeń muzejow z wjedźenjom
Pod hesłom “Muzeje z wjeselom wotkryć” móže so Serbski muzej mjez 10 a 18 hodź. darmo wopytać. Trajna wustajeńca k stawiznam, rěči a kulturje Serbow kaž tež wosebita wustajeńca „Čej´da sy?“ skića mnoho wotměny.
W 15 hodź. wjedźe kuratorka Andrea Pawlikowa w němskej rěči po wustajeńcy „Čej´da sy?“ a w 16 hodź. w serbskej rěči. Wustajeńca ma za kóždu generaciju zajimawe fakty přihotowane. Zdobom postaraja so eksponaty, fota a medialne elementy wo wotměnjace posrědkowanje wobsahow. Tuž pohladajće do pisaneje prismy wustajeńcy.
Wupisanje dźěłoweho městna
Krajnoradny zarjad Budyšin, Zarjad za wokrjesne wuwiće, wupisa za Serbski muzej městno muzeologi (ž/m/d), cyfra: 044-23.
Wjace pod “muzej – karjera”. Wjeselimy so přez Waše powabjenje!
Serbski muzej spěchuje so přez Załožbu za serbski lud, kotraž dóstawa lětnje přiražki z dawkowych srědkow na zakładźe hospodarskich planow, wobzamknjenych wot zapósłancow Zwjazkoweho sejma, Krajneho sejma Braniborskeje a Sakskeho krajneho sejma, kaž tež přez wokrjes Budyšin a Kulturny rum Hornja Łužica-Delnja Šleska. Serbski muzej je zarjadnišćo wokrjesa Budyšin.
