Koncerty z programom “Spěwy z brunicowych kónčin/ Spiwy z brunicowych regionow”

“Spěwy z brunicowych kónčin/ Spiwy z brunicowych regionow” je hudźbny projekt, kotryž je 2019/ 2020 we zwisku z wupisanjom “Čin sobu – mitmachsfonds Sachsen” nastał a so z koncertami předstajił. Nětko slěduja spočatk nowembra dalše koncerty.

Poslednje lěto je so dźěl spěwow nahrawał – mjezdruhim za nowy dokumentariski film wo Serbach “Bei uns heisst sie Hanka/ Pola nas rěka wona Hanka/ Pla nas gronje jej Hanka” wot režiserki Grit Lemke. Film měješe 10.10. 2023 swětowu premjeru na Lipsćanskim Dok – filmfestiwalu a so 7. a 12. 11. na filmowym festiwalu we Choćebusu znowa předstaji.

Spěwy pochadźeja ze Delnjeje Łužicy (we delnjoserbskej rěči) a ze slepjanskeje kónčiny a su wot Walburgi Wałdźic za 3 hłósny žónski ansambl aranžowane. Pólska huslerka Izabela Kałduńska projekt z huslemi, a techniskimi naprawami kaž z loopom a efektami přewodźa. Tak nastanu orchestralne zynki podobne filmowej hudźbje a spěwam z swójskim zwukowym wobrubjenjom wosebity wuraz dadźa.
Wotmysł projekta je na pokład spěwow z tutych kónčin pokazać, na nje dopomnić a w tekstach zakotwjene stawiznički hudźbnje rysować/ předstajić.