Kofej w třoch „Dohlad do zašłosće. Historiske filmowe dokumenty ze serbskeho žiwjenja”

Serbski kulturny archiw při Serbskim instituće wěnuje so wot lěta 2017 digitalizaciji historiskeho serbskeho filmoweho materiala. Mjez nimi su dokumentariske nahrawanja z 1950tych a 1960tych, ale tež ze swójstwa Domowiny, Załožby za serbski lud a DEFA. Při předstajenju němych filmow podaja so na jednej stronje wobsahi, na přikład ratarske dźěła, ludowe reje a wosebite podawki Hornjeje a Delnjeje Łužicy. Na druhej stronje so serbske filmowe stawizny same reflektuja: Štó je w čejim nadawku filmy nawjerćał? Kak je so serbske filmowanje krok po kroku institucionalizowało? Kak bu serbskosć při tym předstajena, dokumentowana a inscenowana?

referentka: Dr. Annett Brězanec, wjednica Serbskeho kulturneho archiwa, přednošuje w rjedźe „Sorabistika po puću” w Serbskim muzeju

Wjedźenje „Zběrać. Zachować. Zahorić“

“Spóznaj sebje samoho“ bě hesło prěnjeje serbskeje ludowědneje prezentacije we wobłuku wustajeńcy Sakskeho rjemjesła a wuměłskeho přemysła 1896 w Drježdźanach, z kotrejež wuńdźe 1900 Serbski muzej w Budyšinje. Zakład dźensnišeho Serbskeho muzeja tworja wot lěta 1856 nazběrane drohoćinki a zběranske zasady Maćicy Serbskeje a woneje wustajeńcy, kotrež tež nowy muzej w Serbskim forumje wědy při Lawskich hrjebjach inspiruja. Wodźenje po wosebitej wustajeńcy „Zběrać. Zachować. Zahorić“ předstaja 170 lět muzejowych stawiznow.

wjedźe: Andrea Pawlikowa, Serbski muzej