Składnostnje wulkoprojekta “Wšo je krajina. Serbski moler Jan Buk ” wuńdźe nazymu 2024 wosebity zešiwk publikaciskeho rjadu Choćebuskich łopjenow. Wobsahowje wopřija wosebita publikacija wšitke referaty a přinoški, kotrež buchu na dwěmaj w Budyšinje a Choćebuzu w lěće 2023 so wotměwacymaj wědomostnymaj sympozijomaj wozjewjene. Wobšěrny wustajenski projekt, kotryž bu w zhromadnym dźěle z institucijemi, muzejemi a zarjadnišćemi Sakskeje, Braniborskeje a z woběmaj wojewódstwomaj Delnja Šleska a Lubus w Pólskej wuwity a zwoprawdźeny, wotmě so wot 2022 do 2025. Wón wopřiješe pjeć wustajenskich stacijow, tak w Budyšinje, Choćebuzu, Wrócławju, Zielonej Górje a Złym Komorowje. Nošer projekta bě Serbski muzej w Budyšinje, hdźež startowaše tež prěnja wustajeńca w oktobrje 2022.

Wosebity zešiwk Choćebuskich łopjenow pod titulom Jan Buk. Po puću k wuměłstwu. Po wuhlu. předstaja nětko 5. februara 2025 w 17 hodź. w Serbskim muzeju na zarjadowanju Jan Buk: Po puću domoj. Runočasnje chcemy so na jednotliwe stacije wustajenskeho projekta dopomnić a filmy a dopomnjenki k ekspozicijam, přewodnym wustajeńcam we wobłuku projekta Hommage á Jan Buk a wědomostne sympozije hišće raz do pomjatka zwołać. Tak ma wulkoprojekt na městnje, hdźež něhdy započa a to w Serbskim muzeju w Budyšinje po třoch lětach hódne zakónčenje namakać.