Barby daliny.

Moler Ante Trstenjak a Łužiscy Serbja

W tworjenju słowjenskeho wuměłca Ante Trstenjaka (1894–1970) hraje Łužica bytostnu rólu. Fascinowany wo mnohostronskosći narodneje drasty serbskich žonow a holcow pućowaše po Hornjej a Delnjej Łužicy za studije, kotrež spožčichu hač do 1960tych lět jeho wuměłskemu tworjenju charakteristiski raz.

Hižo w času jeho prěnjeho přebywanja we Łužicy 1928 nasta 30 mólbow kaž tež tójšto skicow a naćiskow. Nimo motiwow z narodnej drastu jewja so krajiny kaž tež měšćanske a wjesne napohlady.

Praha běše dołho domizna wuměłca: Studowaše na Praskej Akademiji za tworjace wuměłstwo (1920–1923) a skutkowaše tu hač do swojeho přesydlenja do słowjenskeho Maribora w lěće 1950. W času jeho studijnych lět nasta přeće, Łužicu a serbsku narodnu drastu zapopadnyć. Wuchadźišćo za to bě 1922 w Praze wustajeny Łužiski cyklus čěskeho molerja Ludvíka Kuby.