20.02.2016 – 18.09.2016

Serbske jutrowne jejko je jedne z najmarkantnišich atrakcijow Łužicy. Hač jednobarbne abo pisane, wóskowane , bosěrowane, škrabane abo wužrawane –wone fascinuje přez swoju filigranosć a wuměłskosć a přez schowanu symboliku a poselstwa. Što pak wěmy woprawdźe wo našim pisanym serbskim jutrownym jejku a kak so wone dale do přichoda kula? Mjeztym wužiwa so zwjetša jako suweněr a dekoraciski objekt, tola při wšěm wostanje za mnohich we Łužicy to, štož přeco hižo běše, dar lubosće, kotryž so zjě.
Wustajeńca „Pruhi, kruhi, třiróžki“ powěda stawiznu nałožkow kołowokoło jejka, rozłoži techniki a symbole a předstaji ludowych wuměłcow, kiž tutu tradiciju ze žiwjenjom napjelnjeja a ju dale wuwija.