11.03.2023 – 23.04.2023

Lětuša jutrowna wustajeńca je wosebje křižerskej tradiciji wěnowana, wšako spominamy hnydom na dwaj jubilejej. Před 400 lětami, dnja 16. jutrownika 1623, howrješe zběžk Radworskich křižerjow přećiwo ryćerkublerjej Christophej von Minkwitzej a před 30 lětami zmužichu so Budyšenjo na wožiwjenje swojeho křižerskeho procesiona do Radworja pod nawodom kantora Bosćija Čórlicha.

Wuměłska překwapjenka wšak so přiwšěm tola skića: Su to twórby grafikarja Ralfa Reimanna z křižowym pućom a grafiki na temu Mać Boža, kiž hodźa so do póstneho a jutrowneho časa. Jutrowna wustajeńca z prezentaciju dobyćerskich kolekcijow wubědźowanja wo najrjeńše serbske jutrowne jejko přiwabi kóžde lěto syły turistow do Serbskeho muzeja. Při wšěm je wona tež za Serbow samych myslena, wšako pokazuja so wosebitosće tudyšich nalětnich tradicijow a zajimawe požčonki, kaž wěnčki najswěrnišeho křižerja dr. Pětra Brězana.