Přehladka prózdninskich poskitkow
- Što nam wobrazy powědaja
Wupytamy sej w galerij Serbskeho muzeja wuměłske twórby, kiž nas wosebje narěča. Wotrysujemy wupytany wobraz a wopisujemy jón ze zynkami a słowami. Štó z was ma najlěpšu stawiznu k swojemu wobrazej? Nimo toho zhoniće tóšto wo twórbach a wuměłcach.
termin: 21.7.20 a 13.8.20, přeco 10 – 11:30 hodź.
- Na slědach serbskich bajow
Program wjedźe najprjedy přez stajnu wustajeńcu, w kotrejž móža dźěći schowane bajowe figury nadeńć. K tomu předstaja so jednotliwe baje abo bajki. Potom smě kóždy swoju najlubšu figuru molować.
termin: 23.7.20 a 4.8.20, přeco 10 – 11:30 hodź.
- Dyrdomdejske wjedźenje po starym měsće (zwonka muzeja)
Zeznajće město Budyšin na druhe wašnje! Na wšelakich stacijach stareho města zhoniće něšto k stawiznam. K tomu maja so nadawki spjelnić abo prašenja wotmołwić.
(dźiwajće na drastu za wonka)
termin: 28.7.20 a 6.8.20, přeco 10 – 12 hodź.
- „Šij, luby krawco, šij!“
Chcemy zhonić, kak su šewcy a krawcy prjedy dźěłali a po tym sami něšto šić. Hač z šijawu abo z jehličku, zhotujće sej sami waše debjenki abo accessoiry! Parlički, knefle, barby a płaty so wam k dispoziciji staja. Štóž chce, njech sej swójski płat sobu přinjese.
termin: 30.07.20 a 11.08.20, přeco 10 – 12 hodź.
Koncert – Spěwy z brunicowych kónčin
Projektny žónski chór pod nawodom Walburgi Wałdźic předstaji program nowowobdźěłanych spěwow z brunicowych kónčin – ze Slepoho a z Delnjeje Łužicy. Pólska huslerka Izabela Kałduńska přewodźa wokalne zynki z huslemi, mjezdr. loop a efekty.
Projekt so spěchuje přez MitmachFonds Sachsen.
18.7.2020 19.30 hodź. Serbski muzej
19.7.2020 17 hodź. Byrgarski dom Serbska cyrkej, Zły Komorow
Titki na štomje hižo derje rostu!
Mobilne wjedźenje přez QR-cody
Wopytowarjo móža z pomocu swójskeho mobilneho “šmóratka” a QR-codami awdijowe wjedźenje za dorosćenych abo dźěćace widejowe wjedźenje bjezpłatnje wužiwać. K tomu so code scannuje abo fotografuje. Při tym wotewri so pokazka na muzejowu stronu a stacija so rozkładźe.
Awdijowa wersija je w němskej, jendźelskej, francoskej, pólskej, ruskej, čěskej a wězo w serbskej rěči přistupna. Dźěćace wjedźenje móže so w serbskej, němskej, jendźelskej a pólskej rěči wothrać. Přejemy wšitkim wjele wjesela!
Wulět serbskich holičow
Łužiske holcy štyrjoch drastowych regionow maja shooting před Serbskim muzejom. W přichodnym času chcedźa sej přećelki zajimawostki wobhladać a wo tym rozprawjeć. Dajće so překwapić!
Z lokalneje strony Noweje doby, 28.5.1976
“W zhromadnym dźěle mjez hospodarskej radu a Radu wobwoda Drježdźany z Ministerstwom za kulturu NDR, sektor serbska kultura, je po naćiskach wot Měrćina Nowaka-Njechorńskeho Ludowy zawod drjewowe wuměłstwo Drježdźany (VEB) za IV. festiwal serbskeje kultury a 16. dźěłaćerski festiwal zhotowił jako suweněry 5000 tutych holčich skupin w serbskich narodnych drastach.”
Prěnje kroki přećaha
Firma A-Team z Drježdźan ma ruce połne dźěła. Wot 18.5.2020 w Serbskim muzeju eksponaty měšaneho depota fotografisce dokumentuja a wěcywustojnje zapakuja. Hłownje jedna so wo keramiku, drjewjane a metalowe objekty. Zarjadowanje noweho składa na Lubiskej dróze w Budyšinje pak wostanje w nadawku Serbskeho muzeja.
Witamy hosći z nowym pismom při zachodźe muzeja
Hižo před něšto časom započa so předźěłany grafiski koncept muzeja přesadźić. Tak so logo na wuchodnu fasadu namolowa, zo bychu so wopytowarjo ze směra Maćijoweje wěže lěpje orientować móhli. Tež nowe pismiki při zachodźe buchu zašły tydźeń připrawjene. Nimo tutych nowostkow dóstanu wopytowarjo hižo wot januara při kasy nowe zastupne lisćiki. Tež darowanje dobropisow jako karta je nětko móžne.
17.5.2020 – Mjezynarodny dźeń muzejow
Njedźelu, wot 10 do 18 hodź., so přebywanje w muzeju dwójce wudani! Wšako móže so wopyt wosebiteje wustajeńcy “Jutry w Serbach” nachwatać a nimo toho je zastup bjezpłatny. Wjeselimy so na WAS!
Muzej wot 5. meje 2020 zaso přistupny
Wot 5. meje 2020 wočini Serbski muzej zaso swoje durje za zjawnosć. Za to su přidatne naprawy za zdźerženje wotstawkowych rjadowanjow a hygieniskich předpisow trěbne. Prosymy wšěch wopytowarjow, tute pokiwy wobkedźbować. Waš muzejowy team
Naprawy za wopytowarjow Serbskeho muzeja
- Nošenje zakryća za hubu a nós w Serbskim muzeju je za dorosćenych a dźěći wot 6 lět po zakonskich předpisach winowatosć a a wuměnjenje za zastup
- Prošu dźiwajće na woznamjenjene wotstawki a pokiwy w foyeru kaž tež we wustajenskich wobłukach
- Dodźeršće powšitkowne hygieniske předpisy hygieniske naprawy wotpowědnje doporučenju Roberta Kochoweho instituta
- Muzejowy personal rjaduje prudy wopytowarstwa, tak reguluja so wulkosće skupin a wopytowarske ličby w domje po zakonskich postajenjach
- Doporučujemy płaćenje z kartku
- Muzejowe wopyty z přizjewjenjom skrótšeja časy čakanja a zadźěwaja nastawacym wulkim skupinam
- Naša muzejowa kofejownja wostanje přechodnje zawrjena
- Z hygieniskich přičin wostanu interaktiwne medijowe stacije hasnjene
- W muzejopedagogiskim kabineće su za dlěši přebytk blida a stólcy we wotpowědnym wotstawku spřihotowane
- Wodźenja za swójby, kotrež su w jednej domjacnosći žiwe, su po dorěčenju móžne
- Wobkedźbujće domowy porjad Serbskeho muzeja
- Prošu informujće so wo aktualnej situaciji na homepage muzeja
Zastup jenož ze zakryćom huby a nosa móžny!
Dźěło za kulisami
Tež hdyž so tučasnje žani hosćo w Serbskim muzeju witać njesmědźa, je dźěła dosć. Wobšěrna inwentura, dokumentacija a fachowske zapakowanje eksponatow su wažne přihoty za přenjesenje něhdźe 38.000 objektow do noweho składu na Lubijskej dróze w Budyšinje. Dale so krok po kroku wšitke wustajenske witriny wurjedźa. Tež na druhich polach so planuje a organizuje. Nowy wotběh wosebitych wustajeńcow a dalšich projektow ma so na noze stajić a z tym zwisowace financowanje zaručić. W tutych dnjach so šija škitne maski za personal a za hosći. W přichodźe chcemy tež wirtuelne předstajenje eksponatow a přinoškow zmóžnić.