Wutrobnje witajće k nam,
do tysaclětneho města Budyšin! Wysoko nad Sprjewju, tam hdźež je dźens hród Ortenburg, běše něhdy sydło kmjena Milčanow. Mjeztym je wjele wody po Sprjewi běžało a Budyšin je dwurěčne srjedźišćo Hornjeje Łužicy.
Serbski muzej je hižo z lěta 1900 narodny muzej Hornich a Delnich Serbow w duchu załožićela Arnošta Muki a dalšich wótčincow. Tu móžeće naše stawizny zrozumić, kulturu dožiwjeć a wuměłstwo wobdźiwać. Wot narodnych drastow a nałožkow přez načasne wuměłstwo a hudźbu – wustajeńcy a zarjadowanja skića zajimawostki za kóždeho.
Doporučić móžemy naše awdijowe přewodniki za dorosćenych kaž tež zabawny dźěćacy widejowy přewodnik.
Wabjenski film
Wonkowny link k wabjenskemu filmej na youtube.com :
Zběrać. Zachować. Zahorić.
Wot Maćičneho muzeja k Forumej wědy
Wustajeńca pokazuje wuwiće Serbskeho muzeja. Wopytowarjo zhonja wjace wo spočatkach muzealneje zběrki, prěnich wustajenskich rumnosćach, rozpušćenju zběrki 1942 a ćežkim nowozapočatku po Druhej swětowej wójnje.
Zběrka Serbskeho muzeja saha wróćo do lěta 1856, jako załoži so w Maćicy Serbskej sekcija za starožitnosće. Pod nawodom dr. Arnošta Muki rozšěri so prěnjotna zběrka bytostnje. W Serbskim domje na Lawskich hrjebjach wosrjedź Budyšina měješe w lěće 1900 załoženy muzej swójske rumnosće. Po zničenju a wupalenju Serbskeho domu 1945 namaka muzej hakle 1974 w něhdyšej sólnicy na Budyskim hrodźe swój nowy domicil.
Nětko steji muzej před nowym wažnym wotrězkom. W lěće 2029 ma „Serbski forum wědy při Lawskim arealu” swoje wrota wotewrěć. Tu matej Serbski muzej a Serbski institut nowe skutkowanišćo dóstać. Njese so projekt wot Załožby za serbski lud. Tučasnje damy z wustajeńcu wuhlad do přichoda a so zdobom z wotměnjatymi stawiznami narodneho muzeja Serbow rozestajimy.
Jutry w Serbach
Jutrowna wustajeńca z prezentaciju dobyćerskich kolekcijow wubědźowanja wo najrjeńše serbske jutrowne jejko přiwabi kóžde lěto syły turistow do Serbskeho muzeja. Při wšěm je wona tež za Serbow samych myslena, wšako pokazuja so wosebitosće tudyšich nalětnich tradicijow. Za swójby budźe wopyt runje tak zajimały, wšako hodźa so tež ze zmysłami wěcy kołowokoło jutrowneho časa dožiwić.
03.- 06.04.2026, 10-18 hodź.: Jutrowne wiki
Wot wulkeho pjatka do jutrowneje póndźele wustajeja a předawaja ludowi wuměłcy jutrowne jejka w znatych serbskich debjenskich technikach.
04.04.2026, 15 hodź.: Nalětni koncert
Ćichu sobotu přeprošujemy w 15 hodź. na nalětni koncert Zahrodnikec swójbneje trójki z Ćiska. Připosłucharjow wočakuje wotměnjawy program ze serbskej ludowej hudźbu na dudach, huslach a klarineće. K tomu trójka tež zaspěwa a jutrowne nałožki a narodne drasty rozłoži.
Dobyćerske kolekcije 2026
Jutrowne wiki
Aktualnosće
Z herbstwa Serbstwa | Objekt des Monats 4_26: Soraborum Saluti!
Soraborum Saluti! … bě postrow Sorabije, něhdyšeho Serbskeho prědarskeho towarstwa w Lipsku, najstaršeho serbskeho towarstwa a zdobom studentskeho zjednoćenstwa Němskeje. Štož započa so w lěće 1716 jako zhromadnosć ewangelskeho teologiskeho dorosta, kotryž so w serbskim prědowanju zwučowaše, změni so w 19. lětstotku na němsko-serbske towarstwo łužiskich studentow wšelakich studijnych směrow z komersom -studentskej korčmu, ale […]
18.3.2026, 15 hodź.: Kofej w třoch “Helga Graupner – Dobre wobrazy su wuznaća“
“Sydom rjanych holcow” a dalše tekstilne wuměłske twórby nastachu pod nawodom tekstilneje wuměłče Helgi Graupner w spěchowanskej skupinje při Domje za serbske ludowe wuměłstwo. Přednošk rysuje jimacy žiwjenski wobraz kreatiwneje a njesprócniweje wojowarki za wurjadne tekstilne wuměłske dźěło na polu amaterow NDR. referentce: Dr. Dagmar Neuland-Kitzerow, ludowědnica, něhdyša kustodowka při Muzeju Europskich kulturow w Berlinje […]
