Wutrobnje witajće k nam,
do tysaclětneho města Budyšin! Wysoko nad Sprjewju, tam hdźež je dźens hród Ortenburg, běše něhdy sydło kmjena Milčanow. Mjeztym je wjele wody po Sprjewi běžało a Budyšin je dwurěčne srjedźišćo Hornjeje Łužicy.
Serbski muzej je hižo z lěta 1900 narodny muzej Hornich a Delnich Serbow w duchu załožićela Arnošta Muki a dalšich wótčincow. Tu móžeće naše stawizny zrozumić, kulturu dožiwjeć a wuměłstwo wobdźiwać. Wot narodnych drastow a nałožkow přez načasne wuměłstwo a hudźbu – wustajeńcy a zarjadowanja skića zajimawostki za kóždeho.
Doporučić móžemy naše awdijowe přewodniki za dorosćenych kaž tež zabawny dźěćacy widejowy přewodnik.
Wabjenski film
Wonkowny link k wabjenskemu filmej na youtube.com :
Zběrać – Zachować – Zahorić
Wot Maćičneho muzeja k Forumej wědy.
Wustajeńca pokazuje wuwiće Serbskeho muzeja. Wopytowarjo zhonja wjace wo spočatkach muzealneje zběrki, prěnich wustajenskich rumnosćach, rozpušćenju zběrki 1942 a ćežkim nowozapočatku po Druhej swětowej wójnje.
Zběrka Serbskeho muzeja saha wróćo do lěta 1856, jako załoži so w Maćicy Serbskej sekcija za starožitnosće. Pod nawodom dr. Arnošta Muki rozšěri so prěnjotna zběrka bytostnje. W Serbskim domje na Lawskich hrjebjach wosrjedź Budyšina měješe w lěće 1900 załoženy muzej swójske rumnosće. Po zničenju a wupalenju Serbskeho domu 1945 namaka muzej hakle 1974 w něhdyšej sólnicy na Budyskim hrodźe swój nowy domicil.
Nětko steji muzej před nowym wažnym wotrězkom. W lěće 2029 ma „Serbski forum wědy při Lawskim arealu” swoje wrota wotewrěć. Tu matej Serbski muzej a Serbski institut nowe skutkowanišćo dóstać. Njese so projekt wot Załožby za serbski lud. Tučasnje damy z wustajeńcu wuhlad do přichoda a so zdobom z wotměnjatymi stawiznami narodneho muzeja Serbow rozestajimy.
Aktualnosće
24.09.2025, 15 hodź.: Kofej w třoch “Mato Kosyk: migracija a poezija ”
Mato Kosyk: migracija a poezija Přeprošujemy was, při kofeju a tykancu biografiji a skutkowanju Mata Kosyka připosłuchać. Wosud a dźěławosć delnjoserbskeho basnika Mata Kosyka běštej wot nazhonjenja migracije charakterizowanej. W přednošku poda so krótki přehlad wo časach a socialnych kontekstach, w kotrychž jedyn z najwuznamnišich basnikow delnjoserbskeje rěče bydleše a skutkowaše. referent: dr. Jędrzej Soliński, […]
14.09.2025: Dźeń wotewrjeneho pomnika
Na dnju wotewrjeneho pomnika, njedźelu, 14. septembra, předstaji wuměłča Carla Pohl wuslědki swojeje dźěławosće w 15 hodź. w Serbskim muzeju. Jako digitalnu prezentaciju projekta “Korjenje zemje – Stražowarki ze Slepoho”, pokazaja so portrety žonow, kotryž region je přez hórnistwo, strukturnu změnu a zhubjenje serbskeje rěče a kultury charakterizowany. Program na Dnju wotewrjeneho pomnika w Serbskim […]
