Wutrobnje witajće k nam,
do tysaclětneho města Budyšin! Wysoko nad Sprjewju, tam hdźež je dźens hród Ortenburg, běše něhdy sydło kmjena Milčanow. Mjeztym je wjele wody po Sprjewi běžało a Budyšin je dwurěčne srjedźišćo Hornjeje Łužicy.
Serbski muzej je hižo z lěta 1900 narodny muzej Hornich a Delnich Serbow w duchu załožićela Arnošta Muki a dalšich wótčincow. Tu móžeće naše stawizny zrozumić, kulturu dožiwjeć a wuměłstwo wobdźiwać. Wot narodnych drastow a nałožkow přez načasne wuměłstwo a hudźbu – wustajeńcy a zarjadowanja skića zajimawostki za kóždeho.
Doporučić móžemy naše awdijowe přewodniki za dorosćenych kaž tež zabawny dźěćacy widejowy přewodnik.
Wabjenski film
Wonkowny link k wabjenskemu filmej na youtube.com :
Zběrać. Zachować. Zahorić.
Wot Maćičneho muzeja k Forumej wědy
Wustajeńca pokazuje wuwiće Serbskeho muzeja. Wopytowarjo zhonja wjace wo spočatkach muzealneje zběrki, prěnich wustajenskich rumnosćach, rozpušćenju zběrki 1942 a ćežkim nowozapočatku po Druhej swětowej wójnje.
Zběrka Serbskeho muzeja saha wróćo do lěta 1856, jako załoži so w Maćicy Serbskej sekcija za starožitnosće. Pod nawodom dr. Arnošta Muki rozšěri so prěnjotna zběrka bytostnje. W Serbskim domje na Lawskich hrjebjach wosrjedź Budyšina měješe w lěće 1900 załoženy muzej swójske rumnosće. Po zničenju a wupalenju Serbskeho domu 1945 namaka muzej hakle 1974 w něhdyšej sólnicy na Budyskim hrodźe swój nowy domicil.
Nětko steji muzej před nowym wažnym wotrězkom. W lěće 2029 ma „Serbski forum wědy při Lawskim arealu” swoje wrota wotewrěć. Tu matej Serbski muzej a Serbski institut nowe skutkowanišćo dóstać. Njese so projekt wot Załožby za serbski lud. Tučasnje damy z wustajeńcu wuhlad do přichoda a so zdobom z wotměnjatymi stawiznami narodneho muzeja Serbow rozestajimy.
Aktualnosće
25.11.2026: Kofej w třoch a wjedźenje
Kofej w třoch „Dohlad do zašłosće. Historiske filmowe dokumenty ze serbskeho žiwjenja” Serbski kulturny archiw při Serbskim instituće wěnuje so wot lěta 2017 digitalizaciji historiskeho serbskeho filmoweho materiala. Mjez nimi su dokumentariske nahrawanja z 1950tych a 1960tych, ale tež ze swójstwa Domowiny, Załožby za serbski lud a DEFA. Při předstajenju němych filmow podaja so na […]
Z herbstwa Serbstwa | Objekt des Monats 11_2026
Jako miliony ani krošika hódne njeběchu Drohota za čas hyperinflacije 1923 nima w serbskich stawiznach runjeća. Tři skazanske kwitowanki za woteběranje dźenika Serbske Nowiny dokumentuja wuwiće drohoty a jeje přewinjenje na kóncu lěta 1923. Hriwna Němskeho kejžorstwa podleža hižo wot spočatka wójny 1914 ćicheje inflacije, dokelž wupowědźa němski stat měnjensku winowatosć papjerjanych pjenjez do złota. […]
