Wutrobnje witajće k nam,
do tysaclětneho města Budyšin! Wysoko nad Sprjewju, tam hdźež je dźens hród Ortenburg, běše něhdy sydło kmjena Milčanow. Mjeztym je wjele wody po Sprjewi běžało a Budyšin je dwurěčne srjedźišćo Hornjeje Łužicy.
Serbski muzej je hižo z lěta 1900 narodny muzej Hornich a Delnich Serbow w duchu załožićela Arnošta Muki a dalšich wótčincow. Tu móžeće naše stawizny zrozumić, kulturu dožiwjeć a wuměłstwo wobdźiwać. Wot narodnych drastow a nałožkow přez načasne wuměłstwo a hudźbu – wustajeńcy a zarjadowanja skića zajimawostki za kóždeho.
Doporučić móžemy naše awdijowe přewodniki za dorosćenych kaž tež zabawny dźěćacy widejowy přewodnik.
Wabjenski film
Wonkowny link k wabjenskemu filmej na youtube.com :
Zběrać. Zachować. Zahorić.
Wot Maćičneho muzeja k Forumej wědy
Wustajeńca pokazuje wuwiće Serbskeho muzeja. Wopytowarjo zhonja wjace wo spočatkach muzealneje zběrki, prěnich wustajenskich rumnosćach, rozpušćenju zběrki 1942 a ćežkim nowozapočatku po Druhej swětowej wójnje.
Zběrka Serbskeho muzeja saha wróćo do lěta 1856, jako załoži so w Maćicy Serbskej sekcija za starožitnosće. Pod nawodom dr. Arnošta Muki rozšěri so prěnjotna zběrka bytostnje. W Serbskim domje na Lawskich hrjebjach wosrjedź Budyšina měješe w lěće 1900 załoženy muzej swójske rumnosće. Po zničenju a wupalenju Serbskeho domu 1945 namaka muzej hakle 1974 w něhdyšej sólnicy na Budyskim hrodźe swój nowy domicil.
Nětko steji muzej před nowym wažnym wotrězkom. W lěće 2029 ma „Serbski forum wědy při Lawskim arealu” swoje wrota wotewrěć. Tu matej Serbski muzej a Serbski institut nowe skutkowanišćo dóstać. Njese so projekt wot Załožby za serbski lud. Tučasnje damy z wustajeńcu wuhlad do přichoda a so zdobom z wotměnjatymi stawiznami narodneho muzeja Serbow rozestajimy.
Aktualnosće
Z herbstwa Serbstwa | Objekt des Monats 11_2026
Jako miliony ani krošika hódne njeběchu Drohota za čas hyperinflacije 1923 nima w serbskich stawiznach runjeća. Tři skazanske kwitowanki za woteběranje dźenika Serbske Nowiny dokumentuja wuwiće drohoty a jeje přewinjenje na kóncu lěta 1923. Hriwna Němskeho kejžorstwa podleža hižo wot spočatka wójny 1914 ćicheje inflacije, dokelž wupowědźa němski stat měnjensku winowatosć papjerjanych pjenjez do złota. […]
07.10.2026: Start za twar Serbskeho foruma wědy – Zaryw
Ze zhromadnym zarywom su dźensa ministerski prezident Michael Kretschmer, kulturna ministerka Barbara Klepsch, direktor Załožby za serbski lud, Jan Budar, krajny rada Udo Witschas a wyši měšćanosta města Budyšina, Karsten Vogt, symboliski start za Serbski forum wědy na Lawskim arealu dali. Je to dotal najwjetši twarski projekt Załožby za serbski lud. W centrumje Budyšina změja […]
