Wutrobnje witajće k nam,
do tysaclětneho města Budyšin! Wysoko nad Sprjewju, tam hdźež je dźens hród Ortenburg, běše něhdy sydło kmjena Milčanow. Mjeztym je wjele wody po Sprjewi běžało a Budyšin je dwurěčne srjedźišćo Hornjeje Łužicy.
Serbski muzej je hižo z lěta 1900 narodny muzej Hornich a Delnich Serbow w duchu załožićela Arnošta Muki a dalšich wótčincow. Tu móžeće naše stawizny zrozumić, kulturu dožiwjeć a wuměłstwo wobdźiwać. Wot narodnych drastow a nałožkow přez načasne wuměłstwo a hudźbu – wustajeńcy a zarjadowanja skića zajimawostki za kóždeho.
Doporučić móžemy naše awdijowe přewodniki za dorosćenych kaž tež zabawny dźěćacy widejowy přewodnik.
Twarski inženjer Eberhard Dučman
Mjez łužiskej drjewowej architekturu a industrielnym twarjenjom
26.05.2024 – 27.10.2024
Němsko-serbski twarski inženjer Eberhard Dučman (1926 – 2005) słuša k najwuznamnišim zastupjerjam industrielneho twarjenja a inženjerskotwarskeho wuměłstwa – nic jenož w architekturnym wuwiću w NDR, tak mjenowaneje wuchodneje moderny, ale tež w mjezynarodnym měritku.
Wustajeńca je prěnja prezentacija jeho tworjenja a pokazuje w šěsć stacijach Dučmanowe projekty. Ekspozicija je zdobom wuraz připóznaća składnonstnje 20. posmjertnin a 100. narodnin twarskeho inženjera, wysokošulskeho wučerja, slědźerja na polu twarstwa a hladarja pomnikow.
Přewodny program k wustajeńcy je mnohostronski z wjedźenjemi, přednoškami a ekskursiju, hlej přehladka. Přizjewjenje za zarjadowanja a pedagogiskej poskitkaj “Drjewjana wjeska” a “Město přichoda” pod ticket@sorbisches-museum.de abo telefonisce pod 03591/27087028. K wustajeńcy je w Ludowym nakładnistwje Domowina w Budyšinje kniha ze samsnym titulom wušła.
Aktualnosće
18.09.2024, 18 hodź. + 19 hodź.: Wjedźenje a přednošk
18. Septembra přeprošujemy we 18 hodź. na kuratorske wjedźenje z dr. dr. Betinu Kaunowej po wosebitej wustajeńcy “Twarski inženjer Eberhard Dučman. Mjez łužiskej drjewowej architekturu a industrielnym twarjenjom”. Přizamknje so přednošk w 19 hodź. dr. Alfred Roggana “Serbska twarska kultura: fakt abo mylna interpretacija němskich hladarjow pomnikow hač do lěta 1920?”.
28.09.2024, 9-17 hodź.: Wuprawa “Łužiske ludowe wašnje twarjenja”
Wuprawa z Arndom Matthesom “Łužiske ludowe wašnje twarjenja na puću k swětowamu kulturnemu herbstwu” W ramiku wustajeńcy přewjedźe so busowa jězba k wosebitym twaram łužiskeho ludoweho wašnja twarjenja. Přistup je we 8.40 hodź. w Radworju na nawsy abo w 9.00 hodź. w Budyšinje při Lawskich hrjebjach, směr nutřkowne město. Jězba wjedźe do Habrachćic, Eibau, Obercunnersdorf […]