Wutrobnje witajće k nam,
do tysaclětneho města Budyšin! Wysoko nad Sprjewju, tam hdźež je dźens hród Ortenburg, běše něhdy sydło kmjena Milčanow. Mjeztym je wjele wody po Sprjewi běžało a Budyšin je dwurěčne srjedźišćo Hornjeje Łužicy.
Serbski muzej je hižo z lěta 1900 narodny muzej Hornich a Delnich Serbow w duchu załožićela Arnošta Muki a dalšich wótčincow. Tu móžeće naše stawizny zrozumić, kulturu dožiwjeć a wuměłstwo wobdźiwać. Wot narodnych drastow a nałožkow přez načasne wuměłstwo a hudźbu – wustajeńcy a zarjadowanja skića zajimawostki za kóždeho.
Doporučić móžemy naše awdijowe přewodniki za dorosćenych kaž tež zabawny dźěćacy widejowy přewodnik.
Wabjenski film
Wonkowny link k wabjenskemu filmej na youtube.com :
Što rěka tu mjeńšina ? Danojo, Frizojo, Serbja, němscy Sinti a Roma a Delnjoněmcy
06.04.2025 – 11.06.2025
Što woznamjenja domizna? Kotru rólu hraje rěč za našu identitu? A kak formuje kulturne herbstwo naše zhromadne žiwjenje?
Naš kraj je zdawna přez mnohe wšelake kulturne wliwy charakterizowany. Mnohotnosć, łamki a pohib – to je typiske za Němsku. K tomu słušeja tež druhe rěče a awtochtone narodne mjeńšiny a ludowe skupiny, kotrež su hižo dołho tu zakorjenjene.
Tu w Budyšinje, we wutrobje Łužicy a kulturnym centrumje Hornjoserbow, je to wšudźe přitomne. Hižo lětstotki formuja serbske žiwjenje, rěč a tradicije město. Tudy, hdźež słušatej wjacerěčnosć a kulturna mnohotnosć lětstotki do wšědneho dnja, chce pućowanska wustajeńca „Što rěka tu mjeńšina?“ składnosć skićić, wšě štyri awtochtone narodne mjeńšiny a ludowe skupiny Němskeje zeznać – dansku mjeńšinu, němskich Sinti a Romow, serbski lud a frizisku ludowu skupinu. Kóžda z tutych skupin wobsedźi jónkrótne stawizny, rěč (e) a kulturu, kotrež su husto mało znate. Tež rěčna skupina delnjoněmčina so we wustajeńcy předstaja.
Pućowaca wustajeńca Mjeńšinoweho sekretariata a jeje eksponaty skića wosobinske perspektiwy z pjeć skupin a pohnuwaja k tomu, wo přisłušnosći a kulturnej identiće rozmyslować. Wona wotwěra nowy wid na prašenja towaršnostneho zhromadneho žiwjenja a wuznama rěče a přeprošuje, so zwučenych widow wzdać a so mnohohłósnosći našeje towaršnosće z wćipnotu a wotewrjenosću bližić.
Aktualnosće
06.04.2025 w 15 hodź. wernisaža „Što rěka tu mjeńšina? Danojo. Frizojo. Serbja. němscy Sinti a Roma a Delnjoněmcy“
Prašenje identity je za Serbow wšědnje prezentnje, wšako so hustodosć, mjez wšelakimi identami pohibujemy. Z tutym začućom pak sami w Němskej njejsmy. Zdźerženje swójskeje rěče a kultury srjedź němskeje wjetšiny je wužadanje z kotrymž so tež druhe ludowe skupiny rozestajeć dyrbja. Runje z tutej tematiku zaběra so nowa wosebita wustajeńca W Serbskim muzeju. Přeprošujemy wšitkich […]
26.03.2025 15 hodź. „Swójbne slědźenje za započatkarjow“
Zjawne spřistupnjenje cyrkwinskich knihow katolskich wosadow biskopstwa Drježdźany-Mišnjo hač do 1875 přez internet zmóžnja tež njewučenym zajimcan lochki zastup do wuslědźenja swójbnych stawiznow. Na přikładźe swójskich rešeršow prezentuje referent Alexander Pólk přistup a wužiwanje zjawnych žórłow, pomocny grat za systematizowanje wuslědkow a te abo tamne kuriosne hačenje při slědźenju.
