Wutrobnje witajće k nam,
do tysaclětneho města Budyšin! Wysoko nad Sprjewju, tam hdźež je dźens hród Ortenburg, běše něhdy sydło kmjena Milčanow. Mjeztym je wjele wody po Sprjewi běžało a Budyšin je dwurěčne srjedźišćo Hornjeje Łužicy.
Serbski muzej je hižo z lěta 1900 narodny muzej Hornich a Delnich Serbow w duchu załožićela Arnošta Muki a dalšich wótčincow. Tu móžeće naše stawizny zrozumić, kulturu dožiwjeć a wuměłstwo wobdźiwać. Wot narodnych drastow a nałožkow přez načasne wuměłstwo a hudźbu – wustajeńcy a zarjadowanja skića zajimawostki za kóždeho.
Doporučić móžemy naše awdijowe přewodniki za dorosćenych kaž tež zabawny dźěćacy widejowy přewodnik.
Wabjenski film
Wonkowny link k wabjenskemu filmej na youtube.com :
Zběrać – zachować – zahorić
Wot Maćičneho muzeja do Foruma wědy.
wot oktobra 2025
Wosebita wustajeńca da dohlad do stawiznow zběrki, nastaća a dalewuwića Serbskeho muzeja kaž tež wuhlad wulkoprojekta serbskeho foruma wědy.
Katalog k wosebitej wustajeńcy „Wěčne pućowanje. Barba a słowo w twórbje ukrainskeho wuměłca Andrija Sharana“ nětko jako darmotny download!
W kooperaciji z Měšćanskim muzejom „Dom Gerharta Hauptmanna“ w Jelenjej Górje, smy zestajili štyrirěčny katalog, financowany přez INTERREG Pólska-Sakska. Publikacija wobsahuje wšitke wustajene mólby Sharana kaž tež 20 jeho basnjow w ukrainskim originalu ze serbskimi, němskimi a pólskimi přełožkami. Wobrazy a basnje wuměłca so přez dalše eseje wudospołnja. Awtorojo su Krzysztof Zanussi, Marina Weisband, Katarzyna Soboczyńska a Julian Nyča. Katalog přewodźa a dokumentuje wustajeńcy pod zhromadnym titulom „Wěčne pućowanje. Barba a słowo w twórbje ukrainskeho wuměłca Andrija Sharana“ w Serbskim muzeju w Budyšinje wot 17.11.2024 hač do 16.03.2025 a w Měšćanskim muzeju „Dom Gerharta Hauptmanna” w Jelenjej Górje wot 10.04.2025 hač 30.09.2025. Projekt „Wobraz a słowo. Kulturnu identitu přez wuměłstwo dožiwić ” so kofinancuje wot Europskeje unije ze srědkow Europskeho fondsa za regionalne wuwiće we wobłuku fondsa za małoprojektow Pólska – Sakska 2021 – 2027.
Aktualnosće
Dźěłarnička ikonografije “wobraz a słowo” za młodostnych, 19.-20.9.2025
Štóž ma zajim, so na wosebitym poskitku z dźěłarničku a wuměnu z pólskimi młodostnymi wobdźělić, móže so pola Serbskeho muzeja přizjewić. Wulět wotměje so wot pjatka popołdnja, 19. septembra do 20. septembra w “Domje Gerharta Hauptmanna” w Jelenej Górje. Poskitk dźěłarnički “wobraz a słowo” je wosebitosć, wšako słuša pisanje ikonow k rědkim wuměłstwam. Ikona je […]
25.6.25 w 15 hodź.: Kofej w třoch „Derje składowane je poł restawrowane”
Kofej w třoch „Derje składowane je poł restawrowane. Objektej wotpowědowace hladanje za dołhodobne zdźerženje.“ Kak so historiske fota, mólby, dokumenty abo tekstilije prawje składuja? Zo bychu so swójbne drohoćinki abo archiwalije prawje hladali, so tu pokiwy a zakładne informacije posrědkuja. Nimo toho so kmane składowanske wuměnjenja za objekty a powšitkowny wobchad z nimi wujasnja. […]
