Wutrobnje witajće k nam,
do tysaclětneho města Budyšin! Wysoko nad Sprjewju, tam hdźež je dźens hród Ortenburg, běše něhdy sydło kmjena Milčanow. Mjeztym je wjele wody po Sprjewi běžało a Budyšin je dwurěčne srjedźišćo Hornjeje Łužicy.
Serbski muzej je hižo z lěta 1900 narodny muzej Hornich a Delnich Serbow w duchu załožićela Arnošta Muki a dalšich wótčincow. Tu móžeće naše stawizny zrozumić, kulturu dožiwjeć a wuměłstwo wobdźiwać. Wot narodnych drastow a nałožkow přez načasne wuměłstwo a hudźbu – wustajeńcy a zarjadowanja skića zajimawostki za kóždeho.
Doporučić móžemy naše awdijowe přewodniki za dorosćenych kaž tež zabawny dźěćacy widejowy přewodnik.
Wabjenski film
Wonkowny link k wabjenskemu filmej na youtube.com :
Što rěka tu mjeńšina?
Danojo, Frizojo, Serbja, němscy Sinti a Roma a Delnjoněmcy
06.04.2025 – 11.06.2025
Što woznamjenja domizna? Kotru rólu hraje rěč za našu identitu? A kak formuje kulturne herbstwo naše zhromadne žiwjenje?
Naš kraj je zdawna přez mnohe wšelake kulturne wliwy charakterizowany. Mnohotnosć, łamki a pohib – to je typiske za Němsku. K tomu słušeja tež druhe rěče a awtochtone narodne mjeńšiny a ludowe skupiny, kotrež su hižo dołho tu zakorjenjene.
Tu w Budyšinje, we wutrobje Łužicy a kulturnym centrumje Hornjoserbow, je to wšudźe přitomne. Hižo lětstotki formuja serbske žiwjenje, rěč a tradicije město. Tudy, hdźež słušatej wjacerěčnosć a kulturna mnohotnosć lětstotki do wšědneho dnja, chce pućowanska wustajeńca „Što rěka tu mjeńšina?“ składnosć skićić, wšě štyri awtochtone narodne mjeńšiny a ludowe skupiny Němskeje zeznać – dansku mjeńšinu, němskich Sinti a Romow, serbski lud a frizisku ludowu skupinu. Kóžda z tutych skupin wobsedźi jónkrótne stawizny, rěč (e) a kulturu, kotrež su husto mało znate. Tež rěčna skupina delnjoněmčina so we wustajeńcy předstaja.
Pućowanska wustajeńca Mjeńšinoweho sekretariata a jeje eksponaty skića wosobinske perspektiwy z pjeć skupin a pohnuwaja k tomu, wo přisłušnosći a kulturnej identiće rozmyslować. Wona wotwěra nowy wid na prašenja towaršnostneho zhromadneho žiwjenja a wuznama rěče a přeprošuje, so zwučenych widow wzdać a so mnohohłósnosći našeje towaršnosće z wćipnotu a wotewrjenosću bližić.
Katalog k wosebitej wustajeńcy „Wěčne pućowanje. Barba a słowo w twórbje ukrainskeho wuměłca Andrija Sharana“ nětko jako darmotny download!
W kooperaciji z Měšćanskim muzejom „Dom Gerharta Hauptmanna“ w Jelenjej Górje, smy zestajili štyrirěčny katalog, financowany přez INTERREG Pólska-Sakska. Publikacija wobsahuje wšitke wustajene mólby Sharana kaž tež 20 jeho basnjow w ukrainskim originalu ze serbskimi, němskimi a pólskimi přełožkami. Wobrazy a basnje wuměłca so přez dalše eseje wudospołnja. Awtorojo su Krzysztof Zanussi, Marina Weisband, Katarzyna Soboczyńska a Julian Nyča. Katalog přewodźa a dokumentuje wustajeńcy pod zhromadnym titulom „Wěčne pućowanje. Barba a słowo w twórbje ukrainskeho wuměłca Andrija Sharana“ w Serbskim muzeju w Budyšinje wot 17.11.2024 hač do 16.03.2025 a w Měšćanskim muzeju „Dom Gerharta Hauptmanna” w Jelenjej Górje wot 10.04.2025 hač 30.09.2025. Projekt „Wobraz a słowo. Kulturnu identitu přez wuměłstwo dožiwić ” so kofinancuje wot Europskeje unije ze srědkow Europskeho fondsa za regionalne wuwiće we wobłuku fondsa za małoprojektow Pólska – Sakska 2021 – 2027.
Wustajeńcu přewodźace zarjadowanja
Aktualnosće
08.05.2025, 19 hodź.: Narodne mjeńšiny po wólbach do Zwjazkoweho sejma
Narodne mjeńšiny po wólbach do Zwjazkoweho sejma – refleksije, wužadanja, perspektiwy Mjeńšinowa rada Was wutrobnje přeprošuje, so do aktualneje mjeńšinoweje politiki zanurić. Podiumowi hosćo su: Gitte Hougaard-Werner, předsydka Mjeńšinoweje rady Dawid Statnik, předsyda Domowiny – Zwjazk Łužiskich Serbow Ingwer Nehmensen, městopředsyda Frasche Rädj / Friziska rada sekcija sewjer z. t. Tobias Neuburger, politiski referent Centralneje […]
16.-17.05.2025: Mjeńšiny w Němskej meets serbsku młodźinu
A štó sy ty? Mjeńšiny w Němskej meets serbsku młodźinu Kooperaciski projekt serbskeho młodźinskeho towarstwa PAWK z.t. ze Serbskim muzejom
