Wutrobnje witajće k nam,
do tysaclětneho města Budyšin! Wysoko nad Sprjewju, tam hdźež je dźens hród Ortenburg, běše něhdy sydło kmjena Milčanow. Mjeztym je wjele wody po Sprjewi běžało a Budyšin je dwurěčne srjedźišćo Hornjeje Łužicy.
Serbski muzej je hižo z lěta 1900 narodny muzej Hornich a Delnich Serbow w duchu załožićela Arnošta Muki a dalšich wótčincow. Tu móžeće naše stawizny zrozumić, kulturu dožiwjeć a wuměłstwo wobdźiwać. Wot narodnych drastow a nałožkow přez načasne wuměłstwo a hudźbu – wustajeńcy a zarjadowanja skića zajimawostki za kóždeho.
Doporučić móžemy naše awdijowe přewodniki za dorosćenych kaž tež zabawny dźěćacy widejowy přewodnik.
Jutry w Serbach. Kóstku dać
17.03.2024 – 05.05.2024
Lětuša jutrowna wustajeńca Serbskeho muzeja wěnuje so zaso nałožkam a tradicijam Serbow wot zeleneho štwórtka hač k jutrońčce. Wosebje wabja dobyćerske kolekcije kóždolětneho wubědźowanja wo najrjeńše serbske jutrowne jejko.
Nimo toho spominamy na serbskeho spisowaćela Bena Budarja z inscenaciju “Na křižerjach” Němsko-Serbskeho ludoweho dźiwadła Budyšin.
Pod hesłom “kóstku dać” zaběra so wuměłča Karoline Schneider z wuznamom kawrijowych šlinkow za serbsku křižersku tradiciju a za kultury po wšěm swěće.
Wězo mamy tež za dźěći jutrownu zaběru přihotowanu.
Aktualnosće
Jutrowny program Serbskeho muzeja
17.03.2024 – 05.05.2024, 10-18 hodź.: Jutry w Serbach. Kóstku dać. Lětuša jutrowna wustajeńca Serbskeho muzeja wěnuje so zaso nałožkam a tradicijam Serbow wot zeleneho štwórtka hač k jutrońčce. Wosebje wabja dobyćerske kolekcije kóždolětneho wubědźowanja wo najrjeńše serbske jutrowne jejko. Nimo toho spominamy na serbskeho spisowaćela Bena Budarja z inscenaciju “Na křižerjach” Němsko-Serbskeho ludoweho dźiwadła Budyšin. […]
27.03.2024, 15 hodź.: Kofej w třoch “HERCY“
Kónc 1960-tych lět zdobychu Beatles a Rolling Stones swět, w Pólskej znaješe kóždy beatband Czerwone gitary. Tež we Łužicy chcychu młodźi Serbja beatowu hudźbu činić a załožichu skupinu HERCY. K swojej hudźbje a wo swojich wosobinskich dopomnjenkach na tehdyši čas rozprawjeja čłonojo skupiny. Zarjadowanje poćahuje so na předstajenje Němsko-Serbskeho ludoweho dźiwadła „Na tamnym boku měsačka” […]