06.04.2024: Wužrawanje jutrownych jejkow wuspytali
Słona kisalina na barbnych jejkach abo radšo po tradicionelnym wašnju juška kisykała na z cyblu barbjenych jejkach? – Woboje wuspyta 14 wobdźělnikow dźěłarnički zašłu sobotu 6. apryla popołdnju pod fachowym nawodom Edeltraut Gründel a Heleny Pallmannoweje w Budyskim Serbskim muzeju.
Wosebje za małe dźěći je warianta z jušku kisykała bjezstrašna a zajimawa alternatiwa. W dwěmaj skupinomaj daštej wjackrótnej dobyćerce wubědźowanja wo najrjeńše serbske jutrowne jejko swoje nazhonjenja dale. Edeltraut Gründel z Wojerec pochadźa ze serbskeje swójby, w kotrejž so přez generacije tuta přeco hižo rědka serbska technika nałožuje. Helena Pallmannowa bě so wosebje z wožiwjenjom stareje warianty po přirodnym wašnju zaběrała. Spěchowanske towarstwo Serbskeho muzeja je tutu wurjadnu dźěłarničku zarjadowało, zo by na wohroženu techniku skedźbniło.
Jutrowny program Serbskeho muzeja
17.03.2024 – 05.05.2024, 10-18 hodź.: Jutry w Serbach. Kóstku dać.
Lětuša jutrowna wustajeńca Serbskeho muzeja wěnuje so zaso nałožkam a tradicijam Serbow wot zeleneho štwórtka hač k jutrońčce. Wosebje wabja dobyćerske kolekcije kóždolětneho wubědźowanja wo najrjeńše serbske jutrowne jejko. Nimo toho spominamy na serbskeho spisowaćela Bena Budarja z inscenaciju “Na křižerjach” Němsko-Serbskeho ludoweho dźiwadła Budyšin. Pod hesłom “kóstku dać” zaběra so wuměłča Karoline Schneider z wuznamom kawrijowych šlinkow za serbsku křižersku tradiciju a za kultury po wšěm swěće. Wězo mamy tež za dźěći jutrownu zaběru přihotowanu.
29.03.2024 – 01.04.2024, 10-18 hodź.: Jutrowne wiki w Serbskim muzeju
Wot wulkeho pjatka hač do jutrowneje póndźele pokazuja ludowi wuměłcy na jutrownych wikach Serbskeho muzeja wšelake móžnosće debjenja serbskich jutrownych jejkow. W tradicionalnych technikach bosěrowanja, wóskowanja, wužrawanja a škrabanja móža so debjene jejka tež kupić.
30.03.2024, 15 hodź.: Serbska folklora na žurli
Sobotu, 30. měrca wotměje so w 15 hodź. kulturny program na žurli muzeja ze Serbskej rejwanskej skupinu Smjerdźaca z.t. Tuta zwuraznja ze serbskej rejwanskej folkloru, hudźbu a spěwami typiske nałožki a tradicije.
Tež jutrownu póndźelu je Serbski muzej wot 10 do 18 hodź. wotewrjeny!
27.03.2024, 15 hodź.: Kofej w třoch “HERCY“
Kónc 1960-tych lět zdobychu Beatles a Rolling Stones swět, w Pólskej znaješe kóždy beatband Czerwone gitary. Tež we Łužicy chcychu młodźi Serbja beatowu hudźbu činić a załožichu skupinu HERCY. K swojej hudźbje a wo swojich wosobinskich dopomnjenkach na tehdyši čas rozprawjeja čłonojo skupiny.
Zarjadowanje poćahuje so na předstajenje Němsko-Serbskeho ludoweho dźiwadła „Na tamnym boku měsačka” Lubiny Hajduk-Veljkovićoweje, kotryž je hišće hač do 6. apryla 2024 na hłownym jewišću dźiwadła widźeć.
17. měrc 2024: Jutry w Serbach. Kóstku dać
Wot njedźele, 17. měrca prezentuje Serbski muzej jutrownu wustajeńcu a wěnuje so zaso nałožkam a tradicijam Serbow wokoło jutrow. Wosebje wabja dobyćerske kolekcije wubědźowanja 2024 wo najrjeńše serbske jutrowne jejko. Nimo toho spominamy na serbskeho spisowaćela Bena Budarja z inscenaciju “Na křižerjach”. Pod hesłom “kóstku dać” zaběra so wuměłča Karoline Schneider z wuznamom kawrijowych šlinkow za serbsku křižersku tradiciju. Wustajeńca je wot 17. měrca do 5. meje 2024 přistupna.
25.02.2024 w 15 hodź.: Finisaža “DUCY DOMOJ”
W 15 hodź. wjedźe kurator Jürgen Maćij po swojej fotowej wustajeńcy “DUCY DOMOJ – UNTERWEGS NACH HAUSE”. Přizamknje so rozmołwa mjez profesorom dr. Berndom Lindnerom, Forum časowych stawiznow Lipsk a Jürgenom Maćijom. Fotografije předleža tež jako přehladka w knihomaj TIEF IM OSTEN (Mitteldeutscher Verlag Halle) a DUCE DOMOJ – UNTERWEGS NACH HAUSE (LND Budyšin).
Prózdninski poskitk w muzeju
20.02.2024, 10 hodź.: Wobrazy z mozaika
Chcemy wuknyć, kak hodźa so wšelakobarbne keramiske kamužki k dekoratiwnemu mustrej zestajeć abo kak wuhotuje so wobrazowy motiw. Štóž chce, njech tež wobraz jako mozaik sam moluje. staroba: wot 5 lět, płaćizna: 6 €
22.02.2024, 10 hodź.: DUCY DOMOJ ( fotowa wustajeńca)
Kóždy rady dowolowe dožiwjenja a wosebje rjane motiwy fotografuje. Što pak je fotograf Jürgen Maćij za wažne měł dokumentować, to widźimy we wustajeńcy “Ducy domoj”. Potym paslimy fotowu collagu, pisamy a molujemy wobrazowu stawiznu. wot 6 lět, płaćizna: 5 €
07.02.2024, 18 hodź.: Wjedźenje “Ducy domoj” a přednošk
Na předposlednje zarjadowanje wosebiteje wustajeńcy „Ducy domoj“ z fotografijemi Jürgena Maćija přeprošujemy srjedu wječor do Serbskeho muzeja. We 18 hodź. wjedźe Maćij po wustajeńcy a w 19 hodź. sćěhuje přednošk Serbskeho instituta „’Stupju so k tomu a praju sej: Sym nětko tu. Moja legitimacija je fotowy aparat’ – Sektor foto a film w Domje za serbske ludowe wuměłstwo”. Dr. Theresa Jacobsowa a dr. Ines Kellerowa přednošujetej w němskej rěči.
02.02.2024: Mjezynarodny wědomostny sympozij „Hommage à Jan Buk“
Lebuzer a delnjošleske konteksty: geografija, stawizny a wuměłstwo
Nawodnica Serbskeho muzeja Christina Boguszowa a kurator muzeja Jędrzej Soliński wobdźělitaj so na wědomostnym sympoziju w Zielonej Górje. Jako projektowa nawodnica wustajeńcy „Wšo je krajina. Serbski moler Jan Buk“ budźe Christina Boguszowa serbskeho wuměłca Jana Buka předstajić.
Sympozij, z wobdźělenjom historikarjow a wuměłstwowych historikarjow z Łužicy a Pólskeje kaž tež lubowarjow serbskich temow a časowych swědkow, mjez nimi wuměłcy kotřiž běchu z Janom Bukom spřećeleni, je jara wažny, zo by so spominało na zašłosć a dynamiku načasnych pólsko-serbskich kulturnych kontaktow hraničneje regionje na woběmaj bokomaj Wódry a Łužiskeje Nysy.
Cyłkowne zarjadowanje budźe z dwójnym wotewrjenjom wustajeńcow „Wšo je krajina. Serbski moler Jan Buk“ kaž tež „Hommage à Jan Buk (IV): ÜBERALL – NIRGENDS – DAHEIM “, krónowany.
W dwójnej wustajeńcy pokazane twórby Jana Buka pochadźeja bjezwuwzaćnje z wobsydstwa Serbskeho muzeja. Zarjadowanje je hižo štwórta stacija rjadu wustajeńcow a mjezynarodnych sympozijow.
28.1.2024: Kuratorske wjedźenje “Ducy domoj”
Njedźelu, 28. januara w 15 hodź. přeprošuje kurator Jürgen Maćij na wjedźenje po fotografiskej wustajeńcy “Ducy domoj”.
21.01.2024 w 15 hodź.: Swójbne popołdnjo “Ducy domoj”
Wutrobnje přeprošujemy na swójbne popołdnjo “Ducy domoj”, njedźelu 21. januara w 15 hodź. Chcemy wustajeńcu z fotografijemi Jürgena Maćija interaktiwnje zeznać. Wo čim drje wobrazy rěča? To zhoniće na swójbnym wjedźenju! Małe dopomnjenki kaž na přikład leporelo, nowolětki abo maski za ptači kwas a póstnicy móža so zhotowić. Dorosćenych witamy w času paslenja na kuratorske wjedźenje z Jürgenom Maćijom a Alexandrom Pólkom. Hdyž leži hišće sněh, wubědźujemy so w kulenju sněhoweho muža a sněhoweje žony. Najrjeńši eksemplar mytujemy! Poskićuje so tež přikusk. Tuž wjeselimy so na was!
- 15 hodź. swójbne wjedźenje
- kreatiwne poskitki w kabineće
- 16.30 hodź. kuratorske wjedźenje z fotografom Jürgenom Maćijom