Monthly Archives: June 2015

Hižo druhi raz přewjedźe so wčera, dnja 24.06. w 15.00 hodź. „Kofej w třoch“. Wobdźělichu so samo wjace hosći hač na zahajenskim přednošku. Tema přednoška běchu wašnja wokoło swjatojanskeje nocy.
Referentka Andrea Pawlikowa widźi tendencu pozitiwnje. Posktik wužiwachu starši kaž tež młódši hosćo. Wón pak njeměri so jenož na Serbow, ale tež němskich zajimcow. Referenća potom wotpowědnje reaguja.
Přeńdźewši wot zawodneho přednoška do diskusije nasta žiwa rozmołwa při kofeju a tykancu.
„Jara so mi lubi, zo wopytowar njewostanje tu jenož ‚němy’ wobkedźbowar, ale zo so aktiwnje wobdźěli.“ tak kónčny komentar wjednicy Serbskeho muzeja knjeni Boguszoweje.
Přichodny „Kofej w třoch“ budźe 23.09.2015. Referuje Christina Boguszowa wo wuměłskej zběrce Serbskeho muzeja.

Njedźelu dnja 05.07.15 wotměje so wotewrjenje wosebiteje wustajeńcy „Wuzwolene. Nowonakupjene twórby tworjaceho wuměłstwa.“ na žurli Serbskeho muzeja.
Tuž chcemy Was wutrobnje přeprosyć!
Statny sekretar knjez Uwe Gaul (Swobodny stat Sakska, Statne ministerstwo za wědomosć a wuměłstwo) rěći postrowne słowa. A zawod do wustajeńcy poda knjeni Katja M. Mieth w swojej funkciji jako direktorka Sakskeho krajneho centruma za muzejownistwo při Statnych wuměłstwowych zběrkach Drježdźany.
Ramikowy program skića wosebitu překwapjenku: směmy so na performance wuměłče Maje Nageloweje zhromadnje z rězbarjom Matthiasom Jakischom wjeselić, kotraž předstaja so pod pomjenowanjom „zmij abo plon“.

Lětsa wotměje so k druhemu razej akcija „KUNSTBUS. Kulturny bus Hornjeje Łužicy.“ a k prěnjemu razej wobdźěli so Serbski muzej jako jedyn z poskićenych cilow. „Kulturne busy“ jězdźa sobotu 27.06.15 a njedźelu 28.06.15, zdobom finisaža wustajeńcy „Karl Vouk. Satkula abo (s)twor(jen)a krajina.“

sobotu 27.06.15
12:45 hodź – hudźbny přinošk skupiny ConTakt, po tym hraje so wotměnjejo w galeriji Budissin a w Serbskim Muzeju.
13:00 a 16:00 hodź: – kuratorne wodźenje po wosebitej wustajeńcy „Karl Vouk. Satkula abo (s)twor(jen)a krajina“.

njedźelu 28.06.15 finisaža
12:45 hodź: – zahaji so hudźbny program přez skupinu SerBeat, po tym hraje so wotměnjejo w galeriji Budissin a w Serbskim muzeju.
15.00 na žurli: čitanje serbskich spisowaćelow (Zwjazk serbskich wuměłcow) – hudźbny přinošk Marion Kwicojc, folk z gitaru.
13:00 a 16:00 hodź: The artist is present! Karl Vouk wjedźe přez swójsku wustajeńcu. (Finisaža )

Zastanišćo za wšě cile w Budiskim starym měsće je Bohata wěža / hotel Best Western.

Kak, hdy, hdźe a ke komu so jězdźi – hljeće:  http://www.kunstbus-oberlausitz.de.

Za čas lětneho dźiwadła přindźe na slědowacych kóncach tydźenja k změnam wotewrjenskich časow.
Prosymy tute wobkedźbować:

27.06.2015 – KUNSTBUS – wotewrjene hač do 18.00 hodź, přistup přez Dźiwadło na hrodźe
28.06.2015 – KUNSTBUS – wotewrjeny hač do 18.00 hodź, přistup přez Dźiwadło na hrodźe,
04.07.2015 – zawrjene wot 14.00 hodź.
11.07.2015 – prawidłowny wotewrjenski čas, 10.00-18.00 hodź., přistup přez Dźiwadło na hrodźe
18.07.2015- zawrjene wot 15:30 hodź.
25.07.2015 – zawrjene wot 14.00 hodź.
01.08.2015- zawrjene wot 15.30 hodź.
02.08. 2015 – zawrjene wot 14.00 hodź.

Pod hesłom „W kuzle janskeje nocy“ wjerći so tutón króć wšo wokoło wašnjow a přiwěrkow kołowokoło lětneje wróćicy słónca.
Wokoło swjateho Jana zběraja so tež hojerske zela, wšako maja potom najsylnišu skutkownosć. Wšelake bajki wo dźiwnych podawiznach wudospołnjeja přednošk sobudźěłaćerki muzeja Andreje Pawlikoweje.
Přednošk wotměje so w muzejowym kabineće. Přidatnje k zastupej wobliča so 1,50 € na wosobu za pohosćenje z tykancom a kofejom.
Wšitcy přećeljo muzeja a zajimcy su zaso na „Kofej w třoch“ wutrobnje přeprošeni.
Za lěpšu organizaciju prosymy po móžnosći wo přizjewjenje hač do wutory 23.6.15 pola sekretarki.
Wjeselimy so na Waš wopyt!